Read Chang Naga JOHAN 14 Bible Online

JOHAN 14 - Chang Naga bible

JOHAN 14

¹“Kaneibü maangpon teleilu. Mühghaü to mailemashi; kütokei mailemshi.

²Kübou chema kishang juongnyu kia. Khei aying tegüje, ngo kan shanga kishang lamlekula hauda dogo lenlep si?

³Hobaje ngo hauan kan shanga kishang lamlea longa, ngo nyibou longeilabü, hoba ngo lanei kilaje khünei kankei kilabü lele ngei kan kü jungto leilanglabü.

⁴Ngo laeto haudaje kanei lam kho ngeakei.”

⁵Thomaei hao to laukei, “Bunyubou, no laeto haudaje künei angekei; künei lam kho lai ngekei?”

⁶Jisuei hao to laukei, “Ngo lamnyu, ngühmai hoba langkei. Ngo adankoje aokei Kübou jungto alouda.

⁷Kanei ngo ngea tegüje, kanei Küboukei ngelabü. Tou ka jaüan kanei hao ngea hoba hao hapa.”

⁸Filipei hao to laukei, “Bunyubou, kün la Bou lenbü; kholonga kün khoei soua.”

⁹Jisuei hao to jongaikei, “Filip, ngo kan pendou yoa halokche kida lausikei kanei ngo angekei lo? Aoei ngo hapa haoei Boukei hapa. Aila kanei, ‘Kün la Bou lenbü’ dogo lauda?

¹⁰Ngo Bou to kida hoba Bou kü to kida dogo kanei maialemda lo? Ngei kan pendou to ai lenda ngei ngeibü jembü hauei alauda; ho kü to kibü Bou ki hoba hao jembü kümsilei kümda.

¹¹Ngo Bou to ki hoba Bou kü to ki dogo kü to mailemkai; khei ayingsikei kümsilei shanga ongkei mailemshi.

¹²Ngühmaia ngei kan to lenda, aoei kü to mailemdaje haoeikei ngei kümbo kibü kümsilei kümlabü hoba ho to yaangbü kümsilei haoei kümlabü, aishanga ngo Bou jungto hauda;

¹³hoba kanei kü nyena ai ong hilaje, Shou to Bou soneikangtilabü shanga ngei kümlabü.

¹⁴Kanei denche shanga ongkei kü nyena hialonga ngei kho kümbulabü.

¹⁵“Kanei kü to sanoua longa kanei kü ngühkhüm jungeilabü;

¹⁶hoba ngei Bou to hilabü hoba ponpen kan yoa kilabü lele haoei kan la lubü Thuibou che kulabü,

¹⁷kho ngühmai Soushou, ao kaodakei asungletenda; aieilausi kaodakei hao ladangkei ühüpda ayingsi angeda. Kanei hao ngeakei aishanga hao kan yoa kida hoba kan to ki.

¹⁸“Ngei kan litham üpyolabü, ngo kan jungto louada.

¹⁹Longche kian kaodakei ngo touje ühüplabü, lausikei kanei ngo haplabü. Aieilausi ngo lang kia, kankei lang kilabü.

²⁰Khünyet kanei ngo Kübou to ki, khei, kan kü to hoba ngo kan to kida dogo kanei ngelabü.

²¹Aoei kü ngühkhüm ngeda hoba khübü jungeida haoei kü to sanouda; hoba aoei kü to sanouda hao Kübouei sanoulabü, hoba ngei hao to sanoulabü hoba ngo lolo hao to tang khitlabü.”

²²Judas, (Iskhariot ayingko lubü che) ei hao to laukei, “Bunyubou, ailaibü no kaodak toje tang akhitko, kün to ong tang khitla?”

²³Jisuei hao to jongaikei, “Müt atei kü to sanoua longa haoei kü ngüh jungeilabü, hoba Kübouei hao to sanoulabü, hoba küsi hao jungto loulabü hoba hao yoa kilabü.

²⁴Aoei kü to asanouda haoei kü ngüh ajungeida; hoba kanei ditbü ho kü ngüh ji, lausikei ngo hautibou Boueibü ngüh ki.

²⁵“Ngo kan yoa kijinei ngei habü ngüh ho kan to laukua;

²⁶lausikei Thuibou, Soushou Saopobü, ao Bouei kü nyena hautilabü ki, haoei kan la pendou lenlabü hoba ngei kan to laubü pendou damentilabü.

²⁷Hakso, ngei kan la bangbü jongsak apyokuda, kaodakei kubou kheibü aying lausikei ngeibü hakso ngei kan la kuda. Kaneibü maangpon teleilu hoba tehüt.

²⁸Ngei kan to, ‘Ngo hauan apda, hoba ngo kan jungto nyibou longeilabü,’ dogo laubü kanei dida. Kanei kü to sanousije ngo Bou jungto haudabü kan olinlabü, aieilausi Bou kü to yaangbou ki.

²⁹Ho ladang loushadlaje kheijinei kanei mailemlabü shanga, ho mohaüthükjinei

³⁰ngei kan to lalok ajoyolabü, aishanga kaodak songdakbou kho louada. Lausikei hao kü thüka ai hau aki;

³¹habü pendou kho khei ngei Bou to sanouda hoba ngei Bouei kü la ngühkhüm kubü tegü kümda dogo kaodakei ngelabü shanga ong ki. Meimeiashi, sen haka satakho.