Read Chang Naga JOHAN 16 Bible Online

JOHAN 16 - Chang Naga bible

JOHAN 16

¹“Kan aphaiyettila shanga ngei kan la khübü ngüh lenkei.

²Mütshuongei kan sinagog ka shian sattilabü. Maimaitham aoei ong ladang kan haitilaje haoei songle kümsilei kümda dogo damlabü jihsiphai che louada.

³Haoenei kho kümlabü aishanga haoenei Bou ayingsi ngokei angekei.

⁴Ladang khübü haüthüklabü jihsiphai lousühlaje, ngei khübü shanga kan la lena dogo kanei damenla shanga ngei khübü kho kan to lena. “Ngei khanglaje kan to habü alen, aieilausi ngo kan yoa kikei.

⁵Lausikei ngo tou ngo hautibou jungto ngaida, hoba kan aoeiche ongkei, ‘No lato hauda?’ dogo aphe;

⁶lausikei ngei khübü lenabü maangmauei kaneibü maang- pon shena.

⁷Khei yingasikei ngei kan to ngühmaia lenda; ho kan maila yaangla shanga ngo hauan apjan, aishanga ngo hauan üplonga, kan jungto Thuibou kho aloulabü; lausikei ngo ngaia longa ngei hao kan jungto hautikulabü.

⁸Hao ladang loulaje haoei kaodakbü la shabü, saopobü, hoba matjembü shangabü ngühtet lenlabü; hoba müt kho latetche shabü, kho aukabü kulabü.

⁹Haoei haoen la kü to maialembü kho shabü dogo lenlabü.

¹⁰Haoei ngeibü saopobü aukabü kulabü khola ngo Bou jungto hauda, khola kanei ngo touje ühüplabü.

¹¹Haoei matjembü kho lousüha dogo aukabü kulabü, khola ho kaodakbü songdakbou kho mat jeman apa.

¹²Ngei toukei kan to juong lenlabü jouakei, lausikei kanei kho touje anatenlabü;

¹³lausikei ladang hao ngühmai Soushou loulaje, haoei kan ngühmai pendou to leilabü, aishanga haoei jembü hauei alaulabü, lausikei haoei ai ong ditda haoei laulabü, hoba haoei kan la loula kibü shanga lenlabü.

¹⁴Haoei ngo soneikangtilabü, aieilausi haoei kan la ai lenlaje kho haoei ngeibü ka lelabü.

¹⁵Boueibü ai ong kho pendou ngeibü; khoei ngei, haoei kan la ai lenlaje kho haoei ngeibü ka lelabü, dogo laukei.

¹⁶“Longche kian kanei ngo ühüplabü; toukei longche kian kanei ngo haplabü.”

¹⁷Haoeibü eikshuong atei at to laukei, “Haoei sen to, ‘Longche kian phaia kanei ngo ühüplabü; tokei longche kian phaia kanei ngo haplabü,’ hoba ‘Aishanga ngo Bou jungto hauda,’ dogo laubü tetlabü ai?”

¹⁸Hibü haoenei laukei, “Haoei ‘Longche kian phaia,’ dogo laubü kho tetlabü ai? Haoei ai laudaje senei angekei.”

¹⁹Jisuei haoenei hao to phemang sühbü kho ngeenkei hoba haoen to laukei, “Kan yoa ai shangabü pheyoda? Ho ngei, ‘Longche kian phaia kanei ngo ühüplabü.’ dogo laubü shangabü sai?

²⁰Maimaitham ngühmaia ngei kan to lenda, kan haapyolabü hoba manghaaplabü, lausikei kaodakei olinlabü; kan maangto shatlabü lausikei kaneibü maangshat kho olinbü la yeilabü.

²¹“Ladang yaksa cheei na bukda, sao to maangmauei shatda aieilausi saoeibü jih süha; lausikei ladang saoei na kho bukdaje, kaodak to müt che bukbü olinbüei sao khonkubü kho touje adamenda.

²²Kankei tou maangmau kia; lausikei ngei kan nyibou haplabü, hoba kaneibü maangpon olinlabü, hoba aoeikei kaneibü olin kan ka asolanglabü.

²³Khünyet kanei kü to aikei aphelabü. Maimaitham ngühmaia ngei kan to lenda, kanei Bou ka kü nyena denche ongkei hialonga haoei kan la kho kulabü.

²⁴Tou sühko kanei kü nyena aikei ihikei; hiashi hoba kanei haplabü, khei yingsije kaneibü olin penbüsoubü yeilabü.

²⁵“Ngei habü ho kan to ngühtetei ong joyoa. Ngei kan to ho tegübüei alaulabü, lausikei ngei Bou shangabü kan to shangshenko lenlabü jihsiphai che lousühada.

²⁶Kho chaloua kanei kü nyena Bou ka hilabü, hoba ngei kan nyena Bou ka phekulabü dogo alauda;

²⁷aishanga Bouei jembü lolo kan to sanouda, aieilausi kanei ngo sanoukei hoba ngo Mühghaü ka loukei dogo kanei mailembei.

²⁸Ngo Bou ka loukei, hoba ngo kaodak to loukei; nyiboukei ngei kaodak apyoda hoba ngo Bou jungto hauda.”

²⁹Haoeibü eikshuongei laukei, “Chüha! Nyi touje ngühtetei ayingko shangshenko lauda.

³⁰Nyi pendou ngeakei hoba aoeikei kaka phelabü kümsilei aki dogo künei ngeda; kho danko no Mühghaü ka loukei dogo künei mailemda.”

³¹Jisuei haoen to laukei, “Kanei touje mailemda lo?

³²Chühashi, kan mütpem weko lulu chem to aalabü hoba kanei kü mütpem apyolabü kheibü jihsiphai che louda hoba kho lousüha; khei yingasikei ngo kü mütpem aying, aieilausi Bou kü yoa ki.

³³Kü to kanei hakso hapla shanga ngei khübü kho kan to lena. Kaodaka kan khonsak khonku kilabü. Lausikei maang khaiashi, ngei kaodak thükena.”