Read Chang Naga JOHAN 17 Bible Online

JOHAN 17 - Chang Naga bible

JOHAN 17

¹Jisuei khübü laukei. Hobaje haoei khuthük to chühangtikei hoba laukei, “Abou, jihsiphai lousüha; shouei no soneikangtilabü lele kashou soneikangtikai;

²aishanga nyi hao la kubü pendou la thon akibü langkei kulabü lele nyi hao la khunak shousi pendou thüka hau kuan phoakei.

³No tükdebü Mühghaü che, hoba nyi hautibou Jisu Khrista ngelabü ho thon akibü langkei ki.

⁴Nyi kü la nongkubü kümsilei wantibü danko ngei ho kaodaka no soneikangtia.

⁵Tou, O Abou, kaodak moyaüjinei kiteibü soneikangbüei nyi ngo ka yoa soneikangtikai.

⁶Kaodak ka nyi kü la kubü mütshuong to ngei ka nyen tang khittia. Haoen kaibü kiteikei, nyi haoen kü la kukei, hoba ka ngüh ditda.

⁷Nyi kü la kubü ajanjan pendou kaka louda dogo haoenei touje ngeda;

⁸aieilausi nyi kü la kubü ngüh shuong ngei haoen la kua, hoba haoenei khübü sungleda, ngo kaka loukei dogo haoenei tükde ditleda, hoba nyi ngo hautikei dogo haoenei mailema.

⁹Ngei haoen shanga welauda; ngei kaodak shanga awelauda, lausikei nyi kü la kubü shuong shanga welaukuda, aishanga haoen kaibü.

¹⁰Khübü pendou ngeibü, hoba ngeibü pendou kaibü ki, hoba ngo haoen to soneikanga.

¹¹Ngo touje kaodaka aki, lausikei haoen kaodaka kia, hoba ngo ka jungto louada. Saopobü Abou, haoenkei seti tegü che ong yingtila shanga, nyi kü la kubü ka nyen hauei hatlepshi.

¹²Ngo ladang haoen yoa kikei, nyi kü la kubü ka nyen hauei ngei haoen hatlepbei, hoba ngei haoen lombei, hoba Lai loushadlabü lele, maula tetbü che to liman, haoen aokei amau.

¹³Tou ngo ka jungto louada, hoba haoenei ngeibü olin penkosouko haplabü lele ngei ho ngüh kaodaka lauda.

¹⁴Ngei haoen la kaibü ngüh kua, hoba kaodakei haoen mangsenkei, aieilausi ngo lai kaodakeibü aying kho tegü haoenkei kaodakeibü aying.

¹⁵Nyi haoen kaodak ka sunglangashi dogo ngei asuajada, lausikei nyi haoen amaibou ka püetashi dogo sudajada.

¹⁶Ngo lai kaodakeibü aying kho tegü haoenkei kaodakeibü aying.

¹⁷Haoen ngühmaia saüenkushi. Kaibü ngüh kho ngühmai ki.

¹⁸Nyi ngo kaodak to hautibü tegü, ngeikei haoen kaodak to hautia;

¹⁹hoba haoenkei ngühmaia saüenlabü lele, ngei ngo lolo haoen shanga saüenda.

²⁰“Ngei habü shuong shanga ong aying lausikei haoeneibü ngüh danko kü to mailembü shuong shangakei welauda.

²¹Abou, haoen pendou che ong yeitishi; nyi ngo hautikei dogo kaodakei mailemtila, no kü to hoba ngo ka to kibü tegü haoenkei seti to kitishi.

²²Seti lai ki kho tegü haoenkei che ong yeitila shanga, nyi laobou soneikangbü kü la kua, kho soneikangbü nyi haoen la kua;

²³ngo haoen to hoba no kü to kibü danko haoen che ong yeilabü, khei yingsije nyi kü to sanoubü tegü haoen to kei sanouda dogo kaodakei ngelabü.

²⁴“Abou, haoen nyi küla kukei hoba nyi haoen, ngo lanei kije khünei kitimang sühda, khei yingsije nyi kü la kubü ngeibü soneikangbü haplabü, aieilausi kaodak moyaüjinei thama nyi ngo sanoukei.

²⁵Saopobü Abou, kaodakei no angeenkei, lausikei ngei no ngeakei, hoba habü mütshuongei nyi ngo hautikei dogo ngeakei.

²⁶Nyi haoen la ka nyen ngetia, toukei ho ngetilabü; hoba laobou sanouei nyi ngo sanoua kho haoen to kilabü, hoba ngo haoen to kilabü.”