Read Chang Naga JOHAN 18 Bible Online

JOHAN 18 - Chang Naga bible

JOHAN 18

¹Ladang Jisuei khübü ngüh laukhümbei, hao haoeibü eikshuong yoa Kidron shumang danko haukei. Khünei bamang che kikei, khüto hao hoba haoeibü eikshuong haukei.

²Judas, aoei hao khümbo kuan aplabü kiteikei, haoeikei kho kaoen ngean kikei aieilausi Jisuei hanghangko khünei hao eikshuong to haüyoko kikei.

³Judasei thükkabü ungshedbü shuong si Farisi shuong ka shetenbü sepai si lombü tan che leibakei hoba wanthung, hantin hoba in si aubu jungan khüto loukei.

⁴Jisuei hao la haüthüklabü pendou ngean, longkei hoba haoen to laukei, “Kanei ao lamda?”

⁵Haoenei hao to jongaikei, “Nazaretbü Jisu.” Haoei haoen to laukei, “Ngo hao.” Judas, aoei hao khümbo kuan apbei, hao haoen yoa loan kiteikei.

⁶Ladang Jisuei haoen to, “Ngo hao” dogo laukei, haoen phai sukkei hoba kaoa tuongkei.

⁷Hibü haoei haoen ka nyiboula phekei, “Kanei ao lamda?” Haoenei laukei, “Nazaretbü Jisu.”

⁸Jisuei jongaikei, “Ngo hao yingkei dogo ngei kan la lena. Kanei ngo lamda longa, habü mütshuong ngaitiashi”

⁹ho, “Nyi kü la kubü ka ngei aokei amauti,” dogo haoei laubü loushadla yingan kiteikei.

¹⁰Simon Peterei inlou che kiteikei, kho setenkei, hoba thükkabou ungshedboueibü sambü che to wapbei, hoba haoeibü mae nou shipan apbukei. Kho sambüeibü nyen Malka kikei.

¹¹Jisuei Peter to laukei, “Kaibü inlou kho mepoua shouashi. Thung laobou Bouei kü la kua, kho ngei ayunglep lo?”

¹²Kheijinei shetenbü sepai shuong, hajar thükkabou hoba Jihudabü lombü shuongei Jisu lapbei, hoba hao khühkei

¹³hoba shaangla hao Ana jungto leian haukei, aishanga hao khüpo thükkabou ungshedbou penbou Kaifaeibü kounyangbou kiteikei.

¹⁴Ho Kaifaei, mütli shanga müt che haijan dogo Jihudabü la huon lenko kikei.

¹⁵Simon Peter si lubü eik cheei Jisu phai sembei. Kho eik kho thükkabou ungshedbouei ngean kikei hoba hao Jisu yoa thükkabou ungshedbou sang- chimang to atkei.

¹⁶Lausikei Peterje khonga koukhün junga loan kiteikei. Hibü eik, ao thükkabou ungshedbou to ngeyoan kikei, hao louan koukhüna kibü yaksa to joyokei hoba Peter leiyetkei.

¹⁷Saoei Peter to laukei, “Nokei ho müteibü eik yoa che sai?” Haoei laukei, “Ngoje aying.”

¹⁸Sambü si lombü shuongei khambü ka wankak jikan wan metkei, hoba haoen khünei kham sepbo loan kikei. Peterkei khünei haoen yoa kham sepbo lokei.

¹⁹Thükkabou ungshedbouei Jisu ka haoeibü eikshuong hoba haoeibü lenbü shangabü phekei.

²⁰Jisuei hao to jongaikei, “Ngei kaodak to tang khitko laua. Ngei ponpendou Jihudabü yoshaishang sinagog si lembüchema lenkei, hoba ngei huphanga ai alau.

²¹Kü to aila pheda? Ngei haoen to ai laukeije ditbü shuong to pheashi. Ngei ai laukeije haoenei ngekei.”

²²Ladang haoei kho laukei, loan kibü lombou yoa cheei, “Nyi thükkabou ungshedbou to hai jongaijan si?” dogo lauko Jisueibü thenyek to ipbei.

²³Jisuei hao to jongaikei, “Ngei mashikan lauan kisije mashikbü aukabü kuashi; lausikei janbü yingan kialonga aila kü to ngümda?”

²⁴Anaei hao khühan thükkabou ungshedbou Kaifa jungto litikei.

²⁵Simon Peter kham sepbo loan kikei. Haoenei hao to laukei, “Nokei haoeibü eikshuong yoa che sai?” Haoei kho athelet; haoei laukei, “Ngoje aying.”

²⁶Peterei nou shipan apbubou chempen, thükkabou ungshedboueibü sambü yoa cheei laukei, “Ngei no bamanga hao yoa ühüpou si?”

²⁷Toukei Peterei hao athelet, hoba khoyam aunak koukei.

²⁸Haoenei Jisu Kaifa chem ka governor chem to leian haukei. Kho langngelamto yingan kikei. Haoen atot akhonyoko Püetbülem shauenlabü shanga haoen chemmang toje üt.

²⁹Hibü Pilat haoen jungto khong to angkei hoba laukei, “Ho müt khulimbo kanei ai shedbü sungbada?”

³⁰Haoenei hao to jongaikei, “Ho müt ho ashed ayaütibü müt che tegüje, künei hao ka la khümbo tekukhoulabü.”

³¹Pilatei haoen to laukei, “Hao kanei lolo leilangashi, hoba kaneibü ngühkhüma kibü tegü kanei lolo mat jemashi.” Jihudabüei hao to laukei, “Kün la aokei haitila asakkukei.”

³²Kho Jisuei hao ai haiei hailabü shanga lenkei kho loushadla yingan kiteikei.

³³Pilat chemmang to ngaikei, Jisu ngakei hoba hao to laukei, “No Jihudabü Choba sai?”

³⁴Jisuei jongaikei, “Nyi ho no lolo lauda si ayingsi atei kü shangabü ka to lenkei?”

³⁵Pilatei jongaikei, “Ngo Jihudabü si? Kaibü jembü phang hoba thükkabü ungshedbou shuongei no kü la khümbo kuan apbei. Nyi ai kümbei?”

³⁶Jisuei jongaikei, “Kü sangle ho kaodak ka alouda. Kü sangle ho kaodak ka loukei tegüje, ngo Jihudabü la khümbo kuan üptila shanga ngeibü sambü shuongei wapyokhoulabü; lausikei ngeibü sangleje ho ka loukei aying.”

³⁷Pilatei hao to laukei, “Kholonga no choba lo?” Jisuei jongaikei, “Ngo choba che dogo nyi lauda. Ngo ngühmai shanga aukabü künla bukkei hoba kho shangabü ngo ho kaodak to loukei dogo ngei lauda. Aoyou ngühmaieibü ki haoenei ngeibü ngüh ditda.”

³⁸Pilatei hao to laukei, “Ngühmai kho ai?” Haoei kho lauan phaia hao nyibou Jihudabü jungto angkei hoba haoen to laukei, “Ngei ho müt to ai shedbü ühüpenda;

³⁹lausikei Püetbülema ngei kan shanga müt che litikula kho kaneibü songa ki. Ngei kan la Jihudabü choba kho litikula kanei maang angasao?”

⁴⁰Haoenei ngekyoko laukei, “Hao aying lausikei Baraba.” Baraba kho kokbü che kikei.