Read Chang Naga JOHAN 2 Bible Online

JOHAN 2 - Chang Naga bible

JOHAN 2

¹Sembounyeta Galila Kana sanga chemkanbü kikei, hoba Jisueibü nyukei khünei kiteikei.

²Jisu si hao eikshuong pendou kho chemkanbü lem to ngakei.

³Ladang ih khümbei, Jisueibü nyuei hao to laukei, “Haoenei ih aki.”

⁴Jisuei sao to laukei, “Yaksa, aila nyi küla kipjim kuda?” Ngeibü jih asühkei.

⁵Hao nyuei sambü shuong to lenkei, “Haoei kan la ai ong lenlaje kümashi.”

⁶Tou Jihudabü saüenbü songa kibü tegü, che chenei jephot nyi si sem atbü, laang ka jakenbü ilechak pem lak tenan kikei.

⁷Jisuei haoen to laukei, “Ilechak kho deiei shentishi.” Haoenei khübü kho sopbo shentikei.

⁸Kheijinei haoei haoen to laukei, “Tou at khuenashi, hoba lembubou jungto jungan haushi.” Hobaje haoenei kho khuenkei.

⁹Lem bunyuei, ih la yeitibü dei kho jepan chühkei, dei khubü sambü shuongei ngeasikei, kho lakabüje haoei ange. Haoei chemkanbou kho ngakei

¹⁰hoba hao to laukei, “Müt pendouei shaang ih maibou kho shomda, hoba müt juongbouei yungan phaia ong amaishangbou shomda, lausikei nyi tou sühko ih maibü kho phoakei.”

¹¹Jisuei kho Galil kabü Kana sanga haoeibü shaangbou amaaphilabü kümbei, hoba haoeibü soneikangbü lenkei; hoba hao eikshuongei hao to mailembei.

¹²Kho phaia hao, nyu, haonasi shuong hoba haoeibü eikshuong Kapernaum to yankei, hoba haoen khünei bale shijo thüngkei.

¹³Jihudabü Püetbü Lem nyangko kikei hoba Jisu Jerusalem to angkei.

¹⁴Lembüchema haoei masu, sanlon hoba dukutuk yakbü shuong hoba namjeibü dan setan hapbei.

¹⁵Haoei semlabü lühthep kümbei hoba san si masu yoan pendou lembüchem ka shian sattikei. Haoei namjeibü shuongeibü namnet sakletkukei hoba haoeneibü denshang khokan apbukei,

¹⁶hoba dukutuk yakbü shuong to laukei, “Habü ho haka langashi; Küboueibü chem namseishang la teyeiti.”

¹⁷“Ka chem maangtakbüei ngo lonlabü” dogo Laiei laubü kho haoeibü eikshuongei damenkei.

¹⁸Jihudabü shuongei hao to laukei, “Habü kümsilei kümbü danko nyi ai amaaphilabü kün la lenda?”

¹⁹Jisuei haoen to jongaikei, “Ho lembüchem leiluashi hoba chalou sema ngei phonlabü.”

²⁰Kheijinei Jihudabüei laukei, “Ho lembü- chem dangla po saonyito lak lea, nyi ho chalou sema phonngailep lo?”

²¹Lausikei haoeibü mang lembüchem shangabü lauko kiteikei.

²²Ladang hao haibü ka langngaikei, haoei ho laukei dogo haoeibü eikshuongei damenkei; hoba haoenei Laishiba ngüh, hoba Jisuei laubü ngüh to mailembei.

²³Püetbülem chaloua, Jisu Jerusalema kijinei, haoei kümbü amaaphilabü hapan müt juongei hao to mailembei.

²⁴Lankei, Jisuei haoen to maangalem, aishanga haoei müt pendou ngekei

²⁵hoba müt shangabü aukabü künla aokei akham, aishanga müt to ai ki kho haoei ngekei.