Read Chang Naga JOHAN 20 Bible Online

JOHAN 20 - Chang Naga bible

JOHAN 20

¹Balea shaangbounyet ete, jijimomoa Mari Magdalin hee to loukei hoba laang kho khüka khoklangan hapbei.

²Hibü sao laangjung Simon Peter si lubü eik aoto Jisuei sanoukei, haosi jungto loukei hoba haosi to lenkei, “Haoenei Bunyubou heekhün ka sunglanga, hoba haoenei hao lanei phokeije künei angekei.”

³Hibü Peter si lubü eik nyiei apyojung heedang aeto haukei.

⁴Ham liko laangkei; lausikei lubüei Peter leilangkei hoba heea shaang sühlangkei.

⁵Haoei seman chühlitikei, hoba nei inyaibü kho hangletan hapbei, lausikei hao maangto üt.

⁶Simon Peterkei hao phaito loukei, hoba heekhün to atkei; hoba haoei nei inyaibü kho hangletan hapbei,

⁷hoba khukabü nei khoje nei inyaibü yoa aying, lausikei kaoen chenei nopshaian kiteikei.

⁸Kheijinei lubü eik, ao shaang heea sühlangkei, haokei maangto atkei, hoba hapbei hoba mailembei;

⁹aishanga hao haibü ka langngaijan dogo laubü Laishiba ngüh haoenei moditen.

¹⁰Hibü eikshuong chem to haan ngaikei.

¹¹Mari heekoa haapbo loan kiteikei. Saoei haapbo haapbo heemang to semlitikei,

¹²hoba saoei, khuthük hangangbü nyi, thupaibü helea, Jisu mang phoshang khukhüm aenei che hoba che youdanga dogo setan hapbei.

¹³Haosiei sao to laukei, “No aila haapda?” Saoei haosi to laukei, “Haoenei ngeibü Bunyubou mang sunglanga, hoba haoenei hao lanei khünkeije ngei angekei.”

¹⁴Saoei khei lauan phaia sepeian chühngaikei hoba Jisu loan hapbei lausikei saoei kho Jisu dogo ange.

¹⁵Jisuei sao to laukei, “No aila haapda? Nyi ao lamda?” Hao bamang lombou dogo daman saoei hao to laukei, “Yaangbou, nyi hao langan kisije, kü la lenbü, hoba ngei hao ngailanglabü.”

¹⁶Jisuei sao to laukei, “Mari!” Saoei sepeikei hoba hao to Ibri ngühyema laukei, “Rabuni!” (kho tetlabü, Lenbou.)

¹⁷Jisuei sao to laukei, “Kü to tejung, aishanga ngo Bou jungto mo üangkei; lausikei ngeibü jaisinasi shuong jungto hauashi hoba haoen to, ‘Ngo kü Bou jungto hoba kaneibü Bou jungto, kü Mühghaü jungto hoba kaneibü Mühghaü jungto angda,’ dogo lenashi.”

¹⁸Mari Magdalin ngaikei hoba eikshuong to lenkei, “Ngei Bunyubou hapa,” hoba haoei sao to khübü lenkei dogo laukukei.

¹⁹Kho balea shaangbounyet, chasem kiteikei, hoba Jihudabü to hatbü ka eikshuong kishang kou khinngailangan kikei. Jisu loukei hoba haoen yoa lokei, hoba haoei haoen to laukei, “Kan yoa hakso kishi.”

²⁰Haoei kho lauan phaia haoei haoen la haoeibü ik hoba haoeibü hiplang lenkei. Eikshuongei Bunyubou hapan olinyokei.

²¹Jisuei haoen to nyiboukei laukei, “Kan yoa hakso kishi. Bouei ngo hautibü tegü, ngeikei kan hautida.”

²²Haoei kho lauan phaia, haoei haoen la metan jinkuko laukei, “Soushou Saopobü sungletashi.

²³Kanei aoyoueibü shabü amai apbulaje, haoeneibü shabü apa; aoyou la kanei üpbulaje haoeneibü shabü nangakei.”

²⁴Thoma (laobou ngühtet, “Phokshou”), Anthüknyi yo kabü che Jisu loujinei haoen yoa akitei.

²⁵Lubü eikshuongei hao to laukei, “Künei Bunyubou hapa.” Haoei haoen to laukei, “Ngei haoeibü ik manga kojal nali ühüp longa, hoba kojal moa ngeibü ikjishou ütti longa, hoba haoeibü hiplang to ngeibü ik ütti longa, ngei maialemlabü.”

²⁶Chalou set kian phaia nyibou hao eikshuong chem manga kikei hoba Thomakei haoen yoa kiteikei. Kou khinngailangan kikei lausikei Jisu lotan haoen yoa lokei hoba laukei, “Kan yoa hakso kishi!”

²⁷Kho phaia haoei Thoma to laukei, “Kaibü ikjishou hato thenashi hoba kü ik to chühashi; kaibü ik litiashi hoba kü hiplanga phekattikai; maialemenko teki, lausikei mailemkai.”

²⁸Thomaei hao to jongaikei, “Kü Bunyubou, kü Mühghaü.”

²⁹Jisuei hao to laukei, “Nyi ngo hapabü nyi mailemda lo? Aoyouei ühüp lausi dogokei mailema, haoen olinbou.”

³⁰Ho lea adobü amaaphilabü juongnyu Jisuei eikshuong thedanga kümbei;

³¹lausikei Jisu kho Mühghaü Shou, Messia, dogo kanei mailemla shanga, hoba mailembo kanei hao nyena langkei hapla shanga ho ngüh doda.