Read Chang Naga JOHAN 21 Bible Online

JOHAN 21 - Chang Naga bible

JOHAN 21

¹Kho phaia Jisu jembü lolo Tiberia yungnyua longan lenkei. Haoei hao lolo hai longan lenkei.

²Simon Peter, Thoma (laobou tetlabü, “Phokshou”), Galila Kanabü Nathaniel, Zebedi shounyi hoba haoeibü eik lubü nyi dogo chela kiteikei.

³Simon Peterei haoen to laukei, “Ngo ngau lapla kouda.” Haoenei hao to laukei, “Künkei ka yoto loulabü.” Haoen koukei hoba long to atkei, hoba khüyou haoenei ai alap.

⁴Chaphamlamto Jisu yungkoa lokei, lausikei eikshuongei kho hao yingkei dogo ange.

⁵Jisuei haoen to laukei, “Nashousi shuong, kanei aiche laplao?” Haoenei hao to jongaikei, “Alap.”

⁶Haoei haoen to laukei, “Tak kho long mae aedangto tekashi, hoba kanei shijo laplabü.” Hibü haoenei tekkei hoba ngau juongnyu minsije touje haoenei tak senenla athükko kikei.

⁷Eik, aoto Jisuei sanoukei, haoei Peter to laukei, “Ho Bunyubou yingakei.” Ladang Simon Peterei kho Bunyubou yingkei dogo ditkei, haoei nei huombei, (aishanga haoei kho hangletan phokei), hoba dei to tomatlangkei;

⁸lausikei lubü eikshuongje, taka ngau shenko minan, senjung haoeneibü longa loukei, aishanga haoen deiko ka yongan eheko, phak anjinsem thüng ong kiteikei.

⁹Ladang haoenei deikoa sühlangkei haoenei wankaka wan metenan, kho thüka ngau hoba wentek dogo phoan hapbei.

¹⁰Jisuei haoen to laukei, “Kanei tou lapbabü ngau ka at sungba.”

¹¹Simon Peter long to likei hoba ngau yaangbüei shenko kibü tak kho kaomai to senbakei. Khünei ngau saongaoto anjinsemto sem kiteikei; khünei ngau juongnyu minasikei tak ajitthet.

¹²Jisuei haoen to laukei, “Kaiya, hoba lem jokashi.” Kho Bunyubou yingkei dogo ngean, eikshuong yoa aoeikei hao to, “No ao?” dogo phela maang ayaangen.

¹³Jisu loukei, hoba wentek sungkei hoba haoen la shonkukei hoba ngaukei kho tegü ong kümbei.

¹⁴Hao haibü ka langngaian phaia Jisuei hoei semboubü hao eikshuong la longan lenkei.

¹⁵Ladang haoen lemjok wankei, Jisuei Simon Peter to laukei, “Jona shou Simon, nyi kü to habü pendou to aei sanouda lao?” Haoei hao to laukei, “Haü, Bunyubou, ngei no sanouda dogo nyi ngekei.” Jisuei hao to laukei, “Kü san shoushou shuong samashi.”

¹⁶Jisuei hao to nyiboukei laukei, “Jona shou Simon, nyi ngo sanouda lao?” Peterei hao to laukei, “Haü, Bunyubou, ngei no sanouda dogo nyi ngekei.” Jisuei hao to laukei, “Kü san shuong lomashi.”

¹⁷Jisuei hao to semboukei laukei, “Jona shou Simon, nyi ngo sanouda lao?” “Nyi ngo sanouda lao?” dogo hao to semboula laubü shanga Peter ngangkei; hoba haoei Jisu to laukei, “Bunyubou, nyi pendou ngekei; ngei no sanouda dogo nyi ngekei.” Jisuei hao to laukei, “Kü sanshuong samashi.

¹⁸Maimaitham ngühmaia ngei ka to lenda, no heshoudanga nyi lolo neihuom kaikei hoba no haumang sühbü pendou to haukei; lausikei ladang no sinlaje, nyi kaibü ik shinglabü hoba no laeto haumang asühda khüto no leilanglabü.”

¹⁹(Haoei kho ai haibüei Peterei Mühghaü soneikangtilabü kikei kho shean lenko laukei.) Kho phaia Jisuei hao to laukei, “Kü phai semashi.”

²⁰Peterei sepeian chühngaikei hoba eik ao to Jisuei sanoukei, hao phainei hapbei. (Ho, nyakshaujinei Jisueibü khukua nongan, “Bunyubou, no khümbo kuan aplabou kho ao?” dogo laubou kho kikei.)

²¹Ladang Peterei hao hapbei, haoei Jisu to laukei, “Bunyubou, hao shangabü lai?”

²²Jisuei hao to laukei, “Ngei ngo alou shongko hao lang kitimang süha tegükei, ka shanga ai ki? Nyi kü phai semshi.”

²³Hibü kho eik ühailabü lauda dogo jaisinasi shuong yoa phinthonkei, khei yingasikei Jisuei hao to hao ühailabü dogo alau, lausikei, “Ngei ngo alou shongko hao lang kitimang süha tegükei, ka shanga ai ki?” dogo laukei.

²⁴Habü shangabü aukabü kubou hoba khübü doshaibou eik kho hao ki. Haoeibü aukabü tükde dogo senei ngekei.

²⁵Jisuei kümbüleibü lubükei juongnyu kia; haoen thenei thenko doa tegüje, kho dolabü le kho kaodakei mangkei atinlabü dogo ngei damda.