Read Chang Naga JOHAN 3 Bible Online

JOHAN 3 - Chang Naga bible

JOHAN 3

¹Farisibü che Nikodema nyenbü Jihudabü leiyeibü che,

²nangnak Jisu jungto loukei, hoba hao to laukei, “Lenbou, no Mühghaü ka lenbou che tegü loukei dogo künei ngekei, aishanga Mühghaü hao yoa ayolonga, aoeikei nyi kümbü amaaphilabü habü ho akümen.”

³Jisuei jongaikei, “Maimaitham ngühmaia ngei kala lenda, mütei thükae ka abukngai shongko Mühghaü Sangle hapla athük.”

⁴Nikodemaei hao to laukei, “Müt baushi sinan hao lai küman bukla? Haonyueibü shimung to atngaian bukla thüklep lo?”

⁵Jisuei jongaikei, “Maimaitham ngühmaia ngei kato lenda, mütei dei hoba soushou danko abuklonga, haoei Mühghaü Sangle to atla athükkei.

⁶Müt mang ka ai bukkei kho phe hoba soushou ka ai bukkei kho soushou.

⁷Ngei kato, ‘Kan pendou thükae ka bukngaijan’, dogo laubüei maang tepang.

⁸Yeiei lae soumang sühdaje khiae souda, hoba nyi kho langh ditda, lausikei kho laka louda hoba lae to hauda kho nyi angekei. Hibü soushoua bukbü pendou kho tegü ki.”

⁹Nikodemaei hao to jongaikei, “Khübü lai küman haüthükla?”

¹⁰Jisuei laukei, “No Israelbü lenbou che yingan, nyi khübü kho angekei si?

¹¹Maimaitham ngühmaia ngei kato lenda, künei künei ngebü shanga lauda, hoba künei hapbü shangabü aukabü kuda; khei yingankei kan aoeikei küneibü aukabü asungletda.

¹²Ngei kaodakbü ngüh lensi kanei maialem longa, ngei khuthükbü ngüh lensije kanei lai mailemla?

¹³Müteibü Shou, ao khuthük ka louyenkei, hao to limanje aokei khuthük to üang.

¹⁴“Aoyouei mailemda haoen danei hao to ponpen langkei hapla shanga, Mosaei lai yama pinyu tonenkei kho tegü Müteibü Shoukei tonenjan.

¹⁶Aishanga Mühghaüei kaodak to kheinyutham sanoubü ka aoyouei hao to mailemda ühailabü, lausikei pon- pen langkei hapla shanga hao Shou Jayangshou kukei.

¹⁷Aishanga khunak shousi la shedbü kutila aying lausikei hao danko khunak shousi khümenla shanga Mühghaüei hao Shou kaodak to yantikei.

¹⁸Aoei hao to mailemda hao la shedbü aku; aoei maialem hao la shedbü kuan apa, aieilausi haoei Mühghaü Jayangshou to maialem.

¹⁹Shedbü kubü kho hai; ngesakbü kho kaodak to loua, lausikei mütei ngesakbü ayingko nakthühbouje sanoukei, aishanga haoeneibü kümsilei kho amaibü kikei.

²⁰Amaibü kümbü danei ngesakbü mangsenda, hoba haoeibü kümsilei tang khittisi amaibüla dogo ngesakbü to alouda;

²¹lausikei aoei ngühmai kümda haoeibü kümsilei kho Mühghaü to nongan kümbei dogo lenenlabü lele ngesakbü to louda.”

²²Kho phaia Jisu si hao eikshuong Jihuda kaodak to loukei; hoba hao khünei haoen yoa kikei hoba baptikukei.

²³Johaneikei Salim nyangko Enona baptikuko kikei, aieilausi kho kaoena dei juongnyu kikei; hoba mütshuong louan baptikuko kikei;

²⁴aishanga Johan thüngdang to mojinko kikei.

²⁵Johaneibü eik si Jihudabü müt che kanglanga saüenbü hangsilam aoa ngüh pekyokei.

²⁶Haoen Johan jungto loukei hoba hao to laukei, “Lenbou, chühashi! Jordan thinei ka yoa ao kikei, ao shangabü nyi aukabü kukei, haoei baptikuda, hoba müt pendou hao jungto hauda.”

²⁷Johanei jongaikei, “Khuthük ka hao la aku shongkoje müt cheei aikei sungletla athükkei.

²⁸‘Ngo Messia aying, lausikei ngo hao thedangto hautikei’, dogo ngei laubü ngeibü aukabü kho kan danshuong ki.

²⁹Aoei leiyetnyu ki hao chemkanbou; lausikei chemkanboueibü thangbou, ao ditko loda, haokei chemkanboueibü ngüh kho ditan aeibou olinda. Hibü ngeibü olin penasoua.

³⁰Hao yaangjan hoba ngo hanjan.”

³¹Ao thükae ka louda hao kho pendou thüka ki; ao kaodaka ki hao kaodakbü ki, hoba haoei kaodak hangalama lauda. Ao khuthük ka louda hao kho pendou thüka ki.

³²Haoei ai hapbei hoba ai ditkei kho shangabü haoei aukabü kuda; lausikei aoeikei haoeibü aukabü asungletda.

³³Aoei haoeibü aukabü sungletda haoei Mühghaü kho ngühmai dogo chongchinga.

³⁴Ao Mühghaüei hautikei haoei Mühghaü ngüh lauda, aishanga Mühghaüei soushou jongsak atakletda.

³⁵Bouei Shou to sanouda, hoba ajanjan pendou hao ik to khümbo kua.

³⁶Aoei Shou to mailemda, haoei ponpen langkei ki; aoei Shou to ngüha aleda haoei ponpen langkei ühüplabü, lausikei Mühghaü maangshat hao thüka ki.