Read Chang Naga JOHAN 5 Bible Online

JOHAN 5 - Chang Naga bible

JOHAN 5

¹Kho phaia khünei Jihudabü lem che kikei, hoba Jisu Jerusalem to angkei.

²Jerusalema, San Bakhüna, Jihuda ngühyema Bethzatha dogo nyenan khünei thim che kia; khonei dip ngao kia.

³Khünei shatbü juongnyu nyekthubü, sokebü, ayingsi you si ik phei sibü dan (dei shoueibü haiteiyoko kikei.

⁴Aishanga khuthük hangangbü che jih jiha louyenkei hoba dei kho shoueitikei. Kheijinei dei shoueibü phaia shaang atbou müt kho haoeibü shatsinyat pendou ka maiko kikei.)

⁵Khünei müt che po khujinto set shatbü yoan kikei.

⁶Ladang Jisuei hao khünei lengan hapbei hoba hao khünei jihsiphai lounyu kida dogo ngekei, haoei hao to laukei, “No maimang sühdalao?”

⁷Shatbou müt khoei hao to jongaikei, “Yaangbou, thim shoueijinei ngo leian atlabü aokei aki; lausikei ngo lamoua kitoua lubü che ong kü thedangto hauda.”

⁸Jisuei hao to laukei, “Loenashi, ka yepshang peashi hoba paiashi.”

⁹Khoyam müt kho maikei, hao yepshang pekei hoba paikei. Kho Nounyet chalou che kiteikei.

¹⁰Hibü Jihudabüei maian kibü müt khüto laukei, “Ho Nounyet yingkei; kaibü shen pelabü kho kala ngühkhümei asakkuda.”

¹¹Haoei haoen to jongaikei, “Ngo maitikubou mütei kü to laukei, ‘Ka yepshang peashi hoba paiashi.’ ”

¹²Haoenei hao to phekei, “Ka yepshang peashi hoba paiashi, dogo ka to laubou müt kho ao?”

¹³Lausikei maitikubü müt khoei hao ao yingkeije ange. Jisu meimeijung satan kikei, aieilausi kaoen khünei mütshang juongnyu kikei.

¹⁴Kho phaia Jisuei hao lembüchema hapbei, hoba hao to laukei, “Chüha, no maian apa, nyi ka to hoto amaibü haüthüktimang asühlonga, touje shabü teshon.”

¹⁵Müt kho haukei hoba hao maitibou kho Jisu yingakei dogo Jihudabü la lenkei.

¹⁶Kho laüa Jihudabüei Jisu shieikoela khangkei, aishanga haoei khübü kho Nounyet kümbei.

¹⁷Jisuei haoen to jongaikei, “Ho jih hanei sühko Kübouei kümdaleida, hoba ngei haoei tegü kümsilei kümda.”

¹⁸Kho aukabüa Jihudabüei hao haitila aeiche lambei, aieilausi haoei Nounyet ong leilukei aying, lausikei Mühghaü to hao jetei yeiko, Mühghaü kho haoeibü Bou dogo laukei.

¹⁹Jisuei haoen to laukei, “Maimaitham ngühmaia ngei kan to lenda, Shouei hao lolo aikei kümla athükkei, haoei Bouei kümbo hapbü kho ong kümla thükkei; aishanga Bouei ai ong kümda, Shoueikei kho kümda.

²⁰Aishanga Bouei Shou to sanouda hoba haoei kümbüleibü pendou hao la lenda, hoba kan maangpangyolabü lele haoei hao la khübü to yaangbou kümsilei lenlabü.

²¹Bouei lai haibü langngaitida hoba haoen la langkei kuda, kho tegü ong Shoueikei haoei pienbü shuong la langkei kuda.

²²Maimaitham Bouei ao mat ajemda, lausikei haoei matjembü pendou Shou la kua,

²³khei haoenei Bou to soumo hatbü tegü, pendouei Shou to soumo hatlabü. Aoei Shou la soumo akuda, haoei hao hautibou Bou la soumo akuda.

²⁴Maimaitham ngühmaia ngei kan la lenda, aoei kü ngüh ditda, hoba ngo hangangbou to mailemda, haoei ponpen langkei ki, hoba matjembü to alouda, lausikei haibü ka langkeibü to hauda.

²⁵Maimaitham ngühmaia ngei kan la lenda, haian kibü shuongei Mühghaü Shou ngüh ditlabü jihsiphai che louada, hoba kho tou ki, hoba aoyouei kho ditlaje lang kilabü.

²⁶Aishanga Bou la langkei pakshang ki, kho tegü haoei Shou la langkei pakshang yeitila shanga kukei.

²⁷Khoto liman haoei hao la matjemlabü shanga hau kua, aishanga hao kho Mühghaü Shou ki.

²⁸Khünei maang tepang, aieilausi heemanga kibü shuong pendouei haoeibü ngüh ditlabü jihsiphai che louada,

²⁹hoba longlabü; aoyoueibü kümsilei maian kikei haoen pendou langkeishang to langngailabü; shedbü kümbü shuong matjemshang to langngailabü.

³⁰“Ngei ngeibü haua ai kümla athükkei; ngei Bouei kü to lenbü tegü mat jemda; hoba ngeibü matjem kho tükdebü ki, aieilausi ngei kü maangangbü alamda, lausikei ngei ngo hangangbouei maangangbü lamda.

³¹“Ngei kü shangabü aukabü kualonga ngeibü aukabü kho ngühmai aying.

³²Kü shangabü aukabü kubou lubü che kia, hoba haoei kü shangabü laobou aukabü kuda kho ngühmai dogo ngei ngekei.

³³Kanei Johan jungto hautikei hoba haoei ngühmai la aukabü kukei.

³⁴Ngei müteibü aukabüa anongda, lausikei kan khümenlabü shanga ngei khübü kho lauda.

³⁵Hao kho longko kibü ngesakbü wanthung che kikei, hoba kan longche shangabü haoeibü ngesakbüa olinyola maangangko kikei.

³⁶Lausikei ngei laobou aukabü ki kho Johaneibü aukabü to yaangbou, aishanga kümsilei laobou Kübouei kü la kümphemtila kukei, khübü kümsilei ngei kümda hoba khübüei Bouei ngo hautikei dogo Kü shangabü aukabü kuda.

³⁷Hobaje Bou aoei ngo hangangkei haoeikei kü shangabü aukabü kukei. Kanei ladangkei hao ngüh aditkei, ayingsi hao the ühüp.

³⁸Haoeibü ngüh kan to athüngda, aishanga kanei haoei hautibou Che khüto maialemda.

³⁹Kanei Laishiba phanda, aieilausi kanei khünei ponpen langkei ki dogo kanei damda, lankei kü shangabü aukabü kubou kho khübü ki,

⁴⁰hoba kanei ponpen langkei haplabü shanga kanei kü jungto loula maang üangda.

⁴¹Ngei müteibü soumo to anongda,

⁴²lausikei kanei maangpona Mühghaü to sanoubü aki dogo ngei ngekei.

⁴³Ngo kübou nyena louakei, hoba kanei ngo asungletda. Müt at haoeibü jembü nyena lousije kanei hao sungletlabü.

⁴⁴Kan cheei che ka nyensang leda, hoba Mühghaü Che ong kabü nyensang alamda, kanei lai mailemenla?

⁴⁵Bou thedanga ngei kan attilabü dogo tedam. Kan attibou khoje Mosa, kanei ao to kaneibü maanglem phosepan ki.

⁴⁶Kanei Mosa to maileman kikei tegüje kanei kü to maileman kikhoulabü, aishanga haoei kü shangabü dokei.

⁴⁷Kanei haoei dobü to maialemen longaje, lai küman kanei kü ngüh to mailemla?”