Read Chang Naga JOHAN 6 Bible Online

JOHAN 6 - Chang Naga bible

JOHAN 6

¹Kho phaia Jisu Galil si thidang to haukei, (kho Tiberia si.)

²Khünei noknyüh hao phai seman kikei, aieilausi haoenei haoei mütshuong shatbü maitibü amaaphilabü hapbei.

³Jisu shongh to angkei hoba khünei hao eikshuong yoa setkei.

⁴Püetbü lem, Jihudabü lem kho nyangko kikei.

⁵Ladang Jisuei limchühkei hoba mütshang yaang hao jungto louko kibü hapbei, haoei Filip to laukei, “Habüei shaula shanga senei wentek laka jekla?”

⁶(Haoei kho hao takteila laukei; aishanga haoei ai kümlabü ki kho haoei ngekei.)

⁷Filipei hao to jongaikei, “Mütpem weko hanbang ong shomasikei sempak saoaneibü wentekei haoen asoulabü.”

⁸Eikshuong yoa che, Simon Petereibü na Andriaei hao to laukei,

⁹“Hanei nashou hanbü che kia, haoei barli wentek ngao hoba ngau penyi kia; lausikei müt khüjoche shanga khoei ai kümbula?”

¹⁰Jisuei laukei, “Mütshuong settiashi” (khünei sang juongnyu kikei.) Hibü mütshuong setkei; haoen hajar ngao thüng kiteikei.

¹¹Jisuei wentek kho sungkei, hoba Mühghaü la nyensang kuan phaia mütshuong setan kijinei haoen la shombukei, hoba ngaukei khei kümbei. Mütpem wekoei photko shaukei.

¹²Ladang haoen senyühshembei, haoei hao eikshuong to laukei, “Ai amaulabü lele jouletbü netshou shuong heshaiashi.”

¹³Hibü haoenei khübü yoshaikei, hoba shaubü shuongei barli wentek ngao ka joutibü khoei kam anthüknyi shenkei.

¹⁴Haoei kümbü amaaphelabü hapbü mütshuongei laukei, “Maimaitham kaodak to loula kibü Thuseibou kho ho ki.”

¹⁵Hibü Jisuei, haoenei hao lapan choba la yeitilabü dogo kibü kho ngean, hao hao mütpem shongh aeto satan apbukei.

¹⁶Ladang chasem yeikei hao eikshuong yungnyu to yankei.

¹⁷Haoen long che to atkei hoba Kapernaum to danko kikei. Kho touje nangnaka hoba Jisu haoen jungto molouko kikei;

¹⁸hoba dei shoueila khangko kikei, aishanga yungnyua yei yaang souko kikei.

¹⁹Haoenei longa mail sem si lei phongan phaia haoenei Jisu dei thüka paiko long junga sühko louko hapbei; hoba haoen hatkei.

²⁰Haoei haoen to laukei, “Ho ngo yingkei; tehüt.”

²¹Kheijinei haoenei hao long to leiyetmang sühkei, lausikei longche danga long khoei haoen hauko kibü kaoen sühkei.

²²Nyibounyet, yungnyu thi aedanga shaibü noknyühei, khünei long che ong kiteikei hoba Jisu hao eikshuong yoto long to üet lausikei hao eikshuong lansan ong haukei dogo damenkei.

²³Tiberia ka lubü long shuong, laonei haoenei Jisuei nyensang kuan phaia wentek shaukei, kho kaoen nyangko lousühkei.

²⁴Hibü, ladang noknyühei khünei Jisu ayingsi haoeibü eikshuong ongkei ühüp, haoenei haoen lolo long to atkei, hoba Kapernaum to Jisu lamjung loukei.

²⁵Ladang haoenei hao yungnyu thinei hapbei, haoenei hao to laukei, “Lenbou, no ladang hato loukei?”

²⁶Jisuei haoen to jongaikei, “Maimaitham ngühmaia ngei kan to lenda, kanei ngo kanei amaaphilabü hapbü shanga aying, lausikei kanei wentek janshauan senyühshembü ka lamyoda.

²⁷Nyaülabü shausi- yung shanga tekümtelei; thalabü hoba ponpen langkei sungbala, laobou Müteibü Shouei kan la kulabü ki, kheibü shausiyung shanga kümaleiashi; aishanga Bou Mühghaüei hao thüka haoeibü hau tetsida jankua.”

²⁸Haoenei hao to laukei, “Künei Mühghaü kümsilei kümlabü lele künei ai kümla?”

²⁹Jisuei haoen to jongaikei, “Mühghaü kümsilei kho ho ki, khei haoei ao hautikei kanei hao to mailemjan.”

³⁰Hibü haoenei hao to laukei, “Künei kho haplabü hoba ka to mailemlabü lele nyi ai amaaphilabü kümda? Nyi kümlabü kho ai?

³¹Laishibaei, ‘Haoei haoen la khuthük ka shausiyung kukei’, dogo lenan kibü tegü küneibü pisibousi shuongei yama mana shaukei.”

³²Jisuei haoen to laukei, “Ngei kan to ngühmaia ngüh juong lenda; Mosaei kan la khuthük ka shausiyung kukei aying; lausikei Kübouei tükdebü shausiyung kan la khuthük ka kuda.

³³Aishanga Mühghaü shausiyung kho laobou khuthük ka louyenda hoba kaodak la langkei kuda kho ki.”

³⁴Haoenei hao to laukei, “Yaangbou, kün la ponpen kho shausiyung kubü.”

³⁵Jisuei haoen to laukei, “Ngo langkei shausiyung; ao kü jungto louda hao mühei ühailabü, hoba aoei kü to mailemda hao ladangkei nyibou dei alalabü.

³⁶Lausikei kanei ngo hapasikei kanei kü to maialemda dogo ngei kan to lena.

³⁷Bouei kü la kubü shuong pendou kü jungto loulabü, hoba ao kü jungto louda hao ngei shian asattilabü,

³⁸aieilausi ngo jembüei maangangbü kümla khuthük ka loukei aying, lausikei ngo hautibouei maangangbü kümla loukei.

³⁹Ho ngo hautibouei maangangbü ki, khei haoei kü la kubü ka ngei che ongkei amautijan, lausikei thonbü Chaloua haoen pendou langngaitijan.

⁴⁰Aishanga aoyouei Shou hapda hoba hao to mailemda haoei pon- pen langkei haplabü kho Kübouei maangangbü ki; hoba ngei hao thonbü Chaloua langngaitilabü.”

⁴¹Hibü Jihudabü shuongei hao shangabü nyamnyambei aishanga haoei, “Ngo khuthük ka loubü shausiyung” dogo laukei.

⁴²Haoenei laukei, “Ho Josef shou Jisu aying lo? Haobou si haonyu senei angekei lo? Khülonga haoei tou lai küman, ‘Ngo khuthük ka loukei’ dogo lauda?”

⁴³Jisuei haoen to jongaikei, “Kan yoa tenyamnyamyo.

⁴⁴Ngo hautibou Bouei asenba longa aokei kü jungto loula athük; hoba ngei hao thonbü Chaloua langngaitilabü.

⁴⁵Thuseibü lea ho doakei, ‘Hobaje haoen pendou la Mühghaüei lenlabü.’ Aoyouei Bou to ditda hoba hao ka ditletda hao kü jungto louda.

⁴⁶Müt atei Bou hapa dogo ngei alauda, khei Mühghaü ka laobou Che khüto limanje; haoei ong Bou hapa.

⁴⁷Ngühmaia ngei kan to lenda, aoei mailemda, haoei thon akibü langkei ki.

⁴⁸Ngo langkei shausiyung.

⁴⁹Kaneibü pisibousi shuongei yama mana shaukei, lankei haoen haikei.

⁵⁰Mütei shaulabü hoba ühailabü shanga ngo khuthük ka loubü shausi- yung.

⁵¹Ngo khuthük ka louyenbü lang kibü shausiyung. Atei ho shausiyung shausije hao ponpen lang kilabü; hoba ngei kulabü shausiyung kho kü phe; kaodakbü langkei shanga ho kuda.”

⁵²Hibü Jihudabüei haoen yoa ngühsak nepyoko laukei, “Ho mütei lai küman sen la haoeibü phe shaula kula?”

⁵³Jisuei haoen to laukei, “Ngühmaia ngei kan to lenda, kanei Müteibü Shou phe ashau longa hoba hao sii ayung longa kan jembü lolo to langkei aki.

⁵⁴Aoei kü phe shauda hoba kü sii yungda haoei athonbü langkei ki, hoba ngei hao thonbü Chaloua langngaitilabü.

⁵⁵Aishanga kü phe kho tükdebü shausiyung, hoba kü sii kho tükdebü yunglabü.

⁵⁶Aoei kü phe shauda hoba kü sii yungda hao kü to kida hoba ngo hao to kida.

⁵⁷Lang kibü Bouei ngo ailai hautikei, hoba ngo Bouei lang kida, kho tegü aoei ngo shauda haokei ngo danko lang kilabü.

⁵⁸Ho khuthük ka louyenbü shausiyung; ho kaneibü pisibousi shuongei shaubü kho tegü aying, aishanga kho shausiyungei haoen alangda; lausikei aoei ho shausi- yung shauda hao ponpen langkei kilabü.”

⁵⁹Haoei ho Kapernauma sinagoga lenjinei laukei.

⁶⁰Haoenei ladang ho ditkei, hao eikshuong juongei laukei, “Ngüh hoje sekakei. Aoei ho ditenla?”

⁶¹Ho shangabü haoeibü eikshuongei nyamnyamda dogo Jisuei ngekei, hoba haoen to laukei, “Hoei kan phaiyetda lo?

⁶²Khülonga kanei Müteibü Shou hao shangied kishang to angko hapsije lai kümla?

⁶³Ho langkei kubou Soushou ki; pheje jim aki. Ngei kan to lenbü ngüh shuongje Soushou hoba langkei ki.

⁶⁴Khei yingasikei kan yoa atje maialembü kia.” (Aishanga maialembü aoyou, hoba aoei hao yaakshaula khübü kho Jisuei khanglathama ngean kiteikei.)

⁶⁵Hobaje haoei laukei, “Bouei akulonga aokei kü jungto loula athük dogo ngei kan to lena.”

⁶⁶Kho jih ka jaüan hao eik juongnyu sepeijung ngaikei hoba hao yoa apaiko apbei.

⁶⁷Kheijinei Jisuei Anthüknyi to laukei, “Kankei ngaimang sühda sai?”

⁶⁸Simon Peterei hao to jongaikei, “Bunyubou, kün ao jungto sepeila? Nyi thon akibü langkei ki;

⁶⁹hoba künei mailema hoba no Mühghaüeibü Saopobou ki dogo ngeena.”

⁷⁰Jisuei haoen to jongaikei, “Ngei kan Anthüknyi kho apien lo? Lausikei kan yoa cheje huonbou ki.”

⁷¹Haoei Simon Iskhariot shou Judas shangabü lauko kiteikei; aishanga hao Anthüknyi yoa che yingasikei, hao yaakshaulabü lele kiteikei.