Read Chang Naga JOHAN 7 Bible Online

JOHAN 7 - Chang Naga bible

JOHAN 7

¹Kho phaia Jisu Galila paikei. Haoei Jihuda koletkei aishanga Jihudabü shuongei hao haitila lameikei.

³Hibü haonasi shuongei hao to laukei, “Ka eikshuongeikei nyi kümbü kümsilei yaangbü haplabü lele ho kaoen apyoashi hoba Jihuda to hauashi.

⁴Aishanga aoei hao pühdaka shentimang sühda, haoei huphanga ai akümda. Nyi khübü kümda longaje no lolo kaodak la haptiashi.”

⁵Aishanga haonasi shuongei ongkei hao to maialem.

⁶Jisuei haoen to laukei, “Kü shanga tükdebü jih molousüh; lausikei kan shanga jihsi- phai kho ponpen lamleakei.

⁷Kaodakei kan mangsenla athük, lausikei hoei ngo mangsenda aieilausi haoeibü kümsilei shuong amai dogo ngei kho shanga aukabü kuda.

⁸Lem khüto kan angashi. Ngo kho lem to üangda aishanga ngeibü jih molousüh.”

⁹Haoei kho lauan phaia hao Galila thüngkei.

¹⁰Lausikei ladang haonasi shuong lem khüto angkei, kheijinei haokei, pühthea ayingko, huphanga angkei.

¹¹Jihudabü shuongei hao Lem khünei lambo laukei, “Hao lan ki?”

¹²Noknyüha hao shangabü aeibou nyamnyam- yokei, atei laukei, “Hao müt maibü yingkei”, lubüei laukei, “Aying, haoei noknyüh ayinglamto leida.”

¹³Lausikei Jihudabü to hatla, aoeikei hao shangabü pühthea alau.

¹⁴Ladang Lemjibou sühkei, Jisu Lembüchem to angkei hoba lenla khangkei.

¹⁵Jihudabü shuong maangpangkei hoba laukei, “Ho mütei ditletbü akiko lai küman webü songsido khütetche hapbei?”

¹⁶Jisuei haoen to jongaikei, “Ngei lenbü kho kü ngüh ji, lausikei ngo hautiboueibü ki.

¹⁷Müt atei hao maangangbü kümla maangangsije, ngei laubü kho Mühghaü ngüh si, ayingsi ngei jembü hauei laudaje kho haoei ngelabü.

¹⁸Aoei haoeibü jembü haua laudaje haoei jembü soneikangbü lamda; lausikei aoei hao hautiboueibü soneikangbü lamda, hao ngühmai; hao to asaopobü aki.

¹⁹Mosaei kan la Ngühkhüm aku lo? Khei yingasikei aoeikei Ngühkhüm ajungeida. Kanei aila ngo haitila komeida?”

²⁰Noknyühei jongaikei, “Kato shabü mühghaü kia. Aoei no haitila komeida?”

²¹Jisuei haoen to jongaikei, “Ngei kümsilei che kümbei hoba kan tou sühko khoei maangpangda.

²²Mosaei kan la kiplabü phejan kukei kho Mosa ka aying, lausikei pisibousi ka laobou kanei Nounyet mangkei kipda.

²³Mosa Ngühkhüm alulimla shanga müt cheei Nounyet mangkei kipda longaje, Nounyet ngei müt che maisho maitikua dogo kan kü to maangpokda lo?

²⁴Tang ka chühbüei mat tejem lausikei kaneibü matjembü kho tangbü yingshi.”

²⁵Jerusalem kabü mütshuong atei laukei, “Ho haoenei haitila komeibü müt kho aying lo?

²⁶Lausikei chühashi, haoei pühthea lauda hoba haoenei hao to ai alauda. Ho Messia yingkei dogo seneibü khuleibü danei tükde ngebü yinglaoma?

²⁷Senei ho müt ho lakabüje ngeakei; lausikei ladang Khrista loulaje, aoeikei hao lakabüje angelabü.”

²⁸Jisuei lembü chema ngekko laukei, “Kanei ngo ngekei hoba ngo lakabüje kanei ngekei. Lausikei ngo jembü hauei loukei aying, lausikei ngo hautibou kho ngühmai ki, hoba hao kanei angekei.

²⁹Ngei hao ngekei, aishanga ngo hao ka ki, hoba haoei ngo hautikei.”

³⁰Haoenei hao lapla haujembei, lausikei aoeikei hao to ik ashat, aieilausi haoeibü jihsiphai mosüh.

³¹Noknyüh juongei hao to mailembei hoba laukei, “Ladang Khrista kho loulaje, ho mütei kümbü amaa- philabü to aei haoei kümlep lo?”

³²Noknyühei hao shangabü nyamnyamyobü Farisi shuongei ditkei, hoba ungshedbü shuong si Farisibü shuongei hao lapla khusabü shuong hautikei.

³³Jisuei laukei, “Ngo kan yoa longche kilabü hoba ngo hautibou jungto haulabü.

³⁴Kanei ngo lamlabü, lausikei kanei ngo ühüplabü hoba ngo lan ki kan loula athük.”

³⁵Jihudabü shuongei haoen lolo lauyokei, “Senei hao ühüplabü lele hao lato haula kümeida? Hao Jihudabü linan Grikbü yoa kibü yoto hauan Grikbü la lenla kümeida sai?

³⁶‘Kanei ngo lamlabü, lausikei kanei ngo ühüplabü, hoba ngo lan ki kan loula athük’, dogo laubü haoeibü ngüh kho ai tetlabü?”

³⁷Lem thonla, youjemnyet, Jisuei loenan ngekko laukei, “At dei lasije kü jungto kaiya hoba yungashi.

³⁸Laishibaei laubü tegü, ‘Aoei kü to mailemda hao ka langkei dei shumang koulabü.’ ”

³⁹Aoyouei hao to mailembei haoenei ai Soushou sungletla kiteikei kho shangabü haoei laukei, aieilausi Soushou kho mokuko kikei, aishanga Jisu mo sonei akangkei.

⁴⁰Ladang noknyüh yoa atei khübü ditkei haoenei laukei, “Maimaitham ho Thuseibou kho ki.”

⁴¹Lubü shuongei laukei, “Ho Khrista kho ki;” lausikei atei laukei, “Galil ka Khrista longlep lo?

⁴²Dawid lilabü ka, hoba Dawid kibü Bethlehem sang ka Khrista kho longlabü dogo Laishibaei alenkei lo?”

⁴³Hibü noknyüha hao hangshong janyinbü longkei.

⁴⁴Haoen ateije hao lapmang sühkei, lausikei aoeikei hao to ik ashat.

⁴⁵Kheijinei khusabü shuong ungshedbü shuong si Farisi shuong jungto loukei hoba haoenei haoen to laukei, “Aila kanei hao aleiba?”

⁴⁶Khusabü shuongei jongaikei, “Aoeikei ho mütei laubü tegüje alaukei.”

⁴⁷Farisi shuongei haoen to jongaikei, “Kankei ayinglamto leilangtia sai?

⁴⁸Seneibü khuleibü ayingsi Farisibü atei ongkei hao to mailema si?

⁴⁹Lausikei ho noknyüh, aoyouei Ngühkhüm kho angekei haoenje shedsikhau baua.”

⁵⁰Lausikei haoen yoa che, Nikodema, ao Jisu jungto shangied loukei, haoei haoen to laukei,

⁵¹“Shaangla müt khoeibü ngüh ditan achühko, hoba haoei kümbü alamenko, seneibü Ngühkhümei hao mat jemda sai?”

⁵²Haoenei hao to jongaikei, “Nokei Galil ka sai? Laishiba phanashi hoba Galil ka thuseibü ao alongda dogo nyi ngelabü.”

⁵³(Hobaje haoen mütpem weko lulu chem to ngaikei;)