Read Chang Naga JOHAN 9 Bible Online

JOHAN 9 - Chang Naga bible

JOHAN 9

¹Jisuei hao haujinei, bukjineithama nyek thubü müt che hapbei.

²Haoeibü eikshuongei hao to phekei, “Lenbou, hao nyek thuan buklabü lele, ho mütei si, haonyu haobouei shabü shonkei?”

³Jisuei jongaikei, “Ho haoeibü shabü ayingsi haoeibü nyusiboueibü shabüeikei aying; lausikei hao danko Mühghaü kümsilei tang khittila shanga hao nyek thuan bukkei.

⁴Senei changea ngo hautiboueibü kümsilei kümjan. Aoeikei akümaleienlabü lele nangnak louda.

⁵Ngo kaodaka ki shongko ngo kaodak ngesakbü.”

⁶Haoei khei lauan phaia, haoei kaoa eok thuokkei, hoba eoka thamdak totkei; haoei thamdak kho müteibü nyeka naangkukei,

⁷hoba hao to laukei, “Hauashi, hoba Siloam shumanga sakashi.” (Siloam ngühtet Hautikei.) Hibü hao hauan sakkei, hoba nyekei hapbo longeikei.

⁸Lepbü shuong hoba nyishou aoyouei hao hishau hiyungbü che dogo shenan kikei haoenei laukei, “Ho müt setan hishau hiyungko kibou kho aying lo?”

⁹Atei laukei, “Haü”; lubü shuongei laukei, “Ji, lausikei haoei hao phatkei.” Müt khoei haoei lolo laukei, “Kho ngo.”

¹⁰Haoenei hao to laukei, “Kholonga kaibü nyek lai küman ipbei?”

¹¹Haoei jongaikei, “Jisu nyenbü müt cheei thamdak totkei hoba ngeibü nyeka naangkukei, hoba kü to laukei, ‘Siloam to hauashi hoba sakashi.’ Hibü ngo haukei hoba sakkei, hoba hapbei.”

¹²Haoenei hao to laukei, “Hao lanei ki?” Haoei laukei, “Ngei angekei.”

¹³Shangied nyek thuan kibü müt kho haoenei Farisibü jungto leian haukei.

¹⁴Jisuei thamdak totan haoeibü nyek khittikubü kho Nounyet yingan kiteikei.

¹⁵Farisi shuongei haoei lai küman hapbei kho hao ka nyiboula phekei. Haoei haoen to laukei, “Haoei thamdak totan ngeibü nyeka naangkukei hoba ngei sakkei hoba ngei hapbei.”

¹⁶Farisibü atei laukei, “Kho kümbou müt kho Mühghaü ka aying, aieilausi haoei Nounyet ajungeida.” Atei laukei, “Müt ao shabü müt che ki haoei lai küman kheibü sei kümenla?” Hobaje haoen yoa janyinbü longkei.

¹⁷Haoenei nyek thubou to nyiboulakei laukei, “Haoei kaibü nyek ipbukei laudabü nyikei hao shangabü ai lauda?” Haoei laukei, “Hao kho thuseibü che ki.”

¹⁸Jihudabüei hao nyek thuan kibü maikei laubü ngühli kho haoeibü nyusibou angaba shongko maialem,

¹⁹hoba haoenei haosi ka phekei, “Bukjineithama nyek thuan bukkei dogo kanei laubü kasieibü shou kho ho sai? Kholonga haoei tou laibü hapda?”

²⁰Haoeibü nyusibouei jongaikei, “Hao küsieibü shou hoba hao nyek thuan bukkei dogo kanei ngeakei;

²¹lausikei haoei tou lai küman hapda künei angekei, ayingsi aoei haoeibü nyek ipbukeije künei angekei. Hao ka pheshi, hao jaishou yingkei; haoei jembü shanga laulabü.”

²²Haoeibü nyusibouei khei laukei, aishanga haoen Jihudabü to hatkei; aieilausi Jihudabü shuongei hai yeian kikei, khei müt atei ongkei hao Messia dogo theleda longa hao sinagog ka shian sattilabü.

²³Khoei ong müt khoeibü nyusibouei laukei, “Hao jaishou yingkei, hao ka pheshi.”

²⁴Hibü nyiboukei haoenei nyek thuan kiteibou kho ngabakei hoba hao to laukei, “Ngühmai lenshi. Ho shabü müt che dogo künei ngeakei.”

²⁵Haoei jongaikei, “Hao shabü müt che si ai yingkeije ngei angekei; lausikei ngei che ngeakei kho, ngo nyek thuan kiteikei hoba tou ngei hapda.”

²⁶Haoenei hao to laukei, “Haoei kato ai kümbei? Haoei kaibü nyek lai ipbukei?”

²⁷Haoei haoen to jongaikei, “Ngei kan to lenan apa, hoba kanei aditku. Kanei aila ho nyibou ditmang sühda? Kankei haoeibü eik la yeimang sühda sai?”

²⁸Haoenei hao to nyikuko laukei, “No haoeibü eik; kün Mosaeibü eikshuong.

²⁹Mühghaüei Mosa to joyokei dogo künei ngeakei; lausikei ho mütje hao lakabüje künei angekei.”

³⁰Müt khoei haoen to jongaikei, “Maangpanglabü kho ho ki, khei hao lakabüje kanei angekei, khei yingasikei haoei kü nyek ipbukei!

³¹Mühghaüei shabü müt to aditkuda dogo senei ngeakei, lausikei müt atei Mühghaü to hadalonga hoba hao maangangbü kümsije, Mühghaüei hao to ditkuda.

³²Müt cheei ongkei nyek thuan bukbü müt la nyek khittikukei dogo kaopakbü ka jaüan ladangkei ditan achüh.

³³Kho müt Mühghaü ka aying tegüje, haoei aikei tekümenkhoulabü.”

³⁴Haoenei hao to jongaikei, “Khangbü ka thama no shabüa bukkei. Kün to songlenlabü no ao?” Hobaje haoenei hao sinagog ka inletkei.

³⁵Haoenei hao inleda dogo Jisuei ditkei, hoba ladang haoei hao hapbei, haoei laukei, “Nyi Müteibü Shou to mailemda lao?”

³⁶Haoei jongaikei, “Yaangbou, ngei hao to mailemlabü lele hao kho ao?”

³⁷Jisuei hao to laukei, “Nyi hao hapa, hoba tou aoei kato joyoda, kho hao.”

³⁸Haoei laukei, “Yaangbou, ngei mailemda”; hoba haoei hao thedanga khüpetkei.

³⁹Jisuei laukei, “Aoyouei ühüpda haoenei haplabü lele, hoba aoyouei hapda haoen nyekthubü yeilabü lele matjemla shanga ngo ho kaodak to loukei.”

⁴⁰Hao yoa kibü Farisi shuongei kho ditkei hoba laukei, “Künkei nyekthubü sai?”

⁴¹Jisuei haoen to laukei, “Kan nyekthubü tegüje kan shabü tekikhoulabü. Lausikei kanei, ‘Künei hapda’, dogo laudabü kaneibü shabü khei ong kia.”