Read Chang Naga YOUKOIKJAI 10 Bible Online

YOUKOIKJAI 10 - Chang Naga bible

YOUKOIKJAI 10

¹Kaisariaa müt che Kornilia dogo nyenan Itali sepai san chenei saongao thüka leiyeibü che kikei.

²Hao hoba haoeibü chemdang kho khümbo kubü hoba Mühghaü to hatbü chemdang che kiteikei, haoei Jihuda mütshuong maila yaangla shanga maangmai onou kümsilei juong kümbei hoba Mühghaü to athakko welaukei.

³Nyetche chasemlamto angh sem thünga haoei mangsanga shangashatko Mühghaëibü khuthük hangangbü che hao jungto louko hapbei, hoba hao to laukei, “Kornilia.”

⁴Korniliaei hao to laukei, “Yaangbou, aiche sai?” Khuthük hangangbüei hao to laukei, “Kaibü welau hoba maangmai kümsilei khübü khoei Mühghaü junga lousüha, hoba haoei no damena.

⁵Hibü touje Joppa to müt hautiashi, hoba Peter dogokei nyenbou Simon ngala hautiashi.

⁶Hao kho yungkoa kibou Simon dogo nyenan phekhun shibou chema sühakei.”

⁷Ladang hao to joyobou khuthük hangangbü kho satkei, haoeibü chembabü sambü müt nyi hoba hao khangenbü yo ka khümbo kubü langkei sepai che dogo ngabakei.

⁸Haoei haoen la pendou wanan lenkei hoba Joppa to hautikei.

⁹Nyibounyet ladang haoen sangnyu sühlamto lamoua hauko kikei, kheijinei Peter chajihboua welaula chemdak to nguikei.

¹⁰Hao mühei haikei hoba shaumang sühkei. Haoenei nongeikuko kitoua hao haileleko nyeket shikei,

¹¹hoba haoei müh ipan denche neinyu yaangbü che tegü louyenko hapbei. Kho neithon lei pendoua yaüan kao to lottikei,

¹²hoba khünei you lei yembü hoba kaoa shanbü meisiau hoba sengbü ausiyuk pendou kiteikei.

¹³Kheijinei hao jungto ngüh che hai loukei, “Meimeiashi Peter, haitiashi hoba shauashi.”

¹⁴Peterei laukei, “Lakabü, Bunyubou, aishanga ngei ladangkei asaüenbü ayingsi asaopobü shauan achühkei.”

¹⁵Toukei nyiboukei hao jungto ngüh che loukei, “Mühghaüei ai saopotia, kho nyi asaüenbü dogo telau.”

¹⁶Kho semnei sühko haüthükkei hoba insing chenei ong neilop tegübü kho khuthük to anlangkei.

¹⁷Ladang Peter haoei hapbü mangsang tetlabü shanga phen- yembo kikei, kheijinei Korniliaei hautibü mütshuong koukhüna lousühkei, hoba Simoneibü chem phekei,

¹⁸hoba haoenei Peter dogokei nyenbou Simon kho khünei sühkeilaoje dogo phekei.

¹⁹Ladang Peter kho mangsang shangabü mangan apan dameiko kikei, kheijinei Soushouei laukei, “Müt semei no lamda.

²⁰Pienan yanashi; hoba ai ajemtenko haoen yoa hauashi, aieilausi haoen hautibou kho ngo yingkei.”

²¹Peter haoen jungto yanan laukei, “Kanei lameibü müt kho ngo yingkei. Kan aila loubü?”

²²Haoenei laukei, “Saongao thüka leiyeibou Kornilia, ao tangshaibü hoba Mühghaü to soumo hatbü müt hoba Jihuda mütli pendouei aukabü kuenbü müt ki, hao to Saopobü khuthük hangangbü danko no hao chemto ngabaan nyi ai ong lenlaje kho ditashi dogo hao la lenkei.”

²³Kheijinei haoei haoen kho hao yenbou la lean leiyetkei. Nyibounyet kho hao haoen yoa meimeian haukei hoba Joppa ka jaisina atei hao hangkei.

²⁴Nyibounyet kho haoenei Kaisariaa sühlangkei. Kheijinei Korniliaei chempen shuong si jenabou shuong ngashaian hao haiyeiko kikei.

²⁵Ladang Peter atkei Korniliaei hao to shuokyokei hoba haoeibü you junga khüpetan hao to lembei.

²⁶Lausikei Peterei hao phonenko laukei, “Loenashi, ngokei müt ong yingkei.”

²⁷Peterei hao to joyoko chem to atkei hoba müt juong chela shaian hapbei.

²⁸Haoei haoen to laukei, “Kan pendouei ngeakei, Jihudabü che kho küksithang che to jamlayangla ayingsi joyola kho asakkukei. Lausikei ngei aotoche ongkei asaüenbü ayingsi asaopobü dogo alautila shanga Mühghaüei kü la shangashattia.

²⁹Khoei ladang nyi ngo ngala hautikei, kheijinei ngei manga ai ashuko loukei. Hibü ngei pheda, kanei ngo ailache ngada sai?”

³⁰Korniliaei laukei, “Chalou lei dana, ngo angh sem jiha kü chema welauko kikei, kheijinei kü thedanga thupaibü neisimei lean müt che lokei.

³¹Haoei laukei, ‘Kornilia, kaibü welau dida, hoba kaibü maangmai kümsilei kho Mühghaü thedanga damena.

³²Hibü Joppa to hautiashi, hoba Simon, aoto Peter dogokei lauda, hao ngashi. Hao yungkoa kibü Simon, phekhun shibou chema sühakei.’

³³Hibü khoyam ngei no ngala hautikei hoba no hai lousühsi aeibou maikei. Hobaje tou kün pendou Bunyubouei ka la ai lentilaje kho ditla shanga Mühghaü thedanga yoshaiakei.”

³⁴Kheijinei Peterei haoen to hai lauko lenkei, “Ngühmaia ngei damenda, Mühghaüei the to achühda,

³⁵lausikei phangshuong wekoa aoei Mühghaü to soumo hatda hoba tangshaitham kümda hao khoje haoei sungletda.

³⁶Kho haoei Israelbü shuong jungto Ngühlang Maibü sangmai, pendou thüka Bunyubou Jisu Khrista shanga ngetiko hautibü Ngühlangmaibü kho ki.

³⁷“Baptibü shanga Johanei lenbü ka jaüan Galil ka khangan Jihuda pendoua ai ong haüthükkei kho kanei ngeakei.

³⁸Soushou Saopobü hoba sei yoan Mühghaüei lai Nazaretbü Jisu naangenkei kho kanei ngeakei. Hao maibü kümbo hoba Satanei khonkutibü maitikuko paikei, aishanga Mühghaü hao yoa kikei.

³⁹Hobaje Jihudabü kaonyek hoba Jerusalema kümbü pendou shanga kün aukabü shuong kikei. Haoenei hao peiseia thüngetnyu haitikei.

⁴⁰Lausikei Mühghaüei hao sembounyeta langngaitikei, hoba hao,

⁴¹mütshuong pendou la aying, lausikei kün aoyou Mühghaüei thedangto thama piensapan phokei hoba aoyou hao haibü ka langngaian phaiakei hao yoa liko shaukei yungkei, khübü aukabü shuong la ong haptikei.

⁴²Mütshuong to songlenla hoba langkeibü si haibü ham matjemla Mühghaüei pienbou kho hao ki dogo aukabü kula haoei kün la sakkukei.

⁴³Hao to mailembü wekoei hao nyen danko shabü ap hapda dogo thuseibü shuong pendouei aukabü kuko phinthonbü kho hao ki.”

⁴⁴Ladang Peterei kho lauko kikei kheijinei Ngühlang to ditko kibü shuong pendou thükto Soushou Saopobü lotkei.

⁴⁵Peter yoa loubü Jihudabü mailembü shuong maangpangkei, aishanga küksithang shuong thüktokei Soushou Saopobü khüpan jinkukei,

⁴⁶aishanga haoenei haoen kho lubü ngühyemakei lauyoko hoba Mühghaü nyen sangko ditkei. Kheijinei Peterei laukei,

⁴⁷“Habü ho baptikula shanga müt ateije deikei shingekla thükkei sai? Haoeneikei künei tegü Soushou Saopobü sungleda.”

⁴⁸Hobaje haoei haoen Jisu Khrista nyena baptila shanga maisho lenkei. Kheijinei haoenei hao chalou shijo setngaila shanga sukeijakei.