Read Chang Naga YOUKOIKJAI 11 Bible Online

YOUKOIKJAI 11 - Chang Naga bible

YOUKOIKJAI 11

¹Küksithang shuongeikei Mühghaü ngühlang sungleda dogo youkoikjai hoba Jihudaa kibü jaisina shuongei ditkei.

²Ladang Peter Jerusalem to loukei, kipbü danshuongei hao to oyokei.

³Haoenei laukei, “Nyi akipbü mütshuong pean chühkei hoba haoen yoa shauayunga.”

⁴Hibü Peterei khangbü ka thenei thenko haoen la lenko laukei,

⁵“Ngo Joppa sangnyua welauko kikei, hoba ngei yemphama mangsang che hapbei. Ngei khuthük ka neinyu yaangbü che phatko neithon leia yaüan lottiko hapbei hoba kü junga shatkei.

⁶Ngei khüto maangsangko hoba haüko chühkei hoba khünei you lei yembü meisiau, kaoa shanbü meisiau hoba seengbü ausiyuk pendou hapbei.

⁷Tokei ngei kü to hai lauko ditkei, ‘Meimeiashi Peter, haitiashi hoba shauashi.’

⁸Lausikei ngei laukei, ‘Lakabü, Bunyubou, aishanga asaüenbü ayingsi asaopobü aikei kü sembung to atan achühkei.’

⁹Khuthük ka ngüh cheei nyibou jongaikei ‘Mühghaüei ai saopotia, kho nyi asaüenbü dogo telau.’

¹⁰Kho semnei sühko haüthükkei, hoba pendou kho khuthük to nyibou tuan langkei.

¹¹Mangde müt sem ngo sühshang to loukei. Haoen kho Kaisaria ka kü jungto hautibü kiteikei.

¹²Soushouei ngo ai asukatembo haoen yoa haula lenkei. Habü jaisina müt lakkei kü yoto loukei, hoba kün khoeibü chem to atkei.

¹³Haoei lai küman khuthük hangangbü hao chema loan hao to, ‘Joppa to müt hautiashi, hoba Peter dogokei nyenbou Simon ngala hautishi,

¹⁴hoba haoei no hoba ka chemdang pendou lai khümenla kho lenlabü,’ dogo lenko lokei kho kün la lenkei.

¹⁵Ngei lau khangan phaia, khangla sen thükto lotbü tegütham Soushou Saopobü haoen thükto lotkei.

¹⁶Ngei Johanei laubü kho damenkei, ‘Johanei deia baptikukei; lausikei kan Soushou Saopobüa baptikulabü.’

¹⁷“Hibü, sen Bunyubou Jisu Khrista to mailembü yeijinei kubü tegütham Mühghaüei haoenlakei jeteibü jongsak kukei yingalonga, Mühghaü shingeklabü lele ngo tokei ao yingbü?”

¹⁸Ladang haoenei kho ditkei haoen lemenbü thakkei; hoba haoenei Mühghaü la soneikangbü kuko laukei, “Touje Mühghaüei Küksithang lakei langkei haplabü lele maangpon sepeibü kua.”

¹⁹Tou aoyou Stefen laüa shieikoejinei satyokei haoen Foenika hoba Kupra hoba Antiok sühko aakei, hoba haoenei ngühlang kho Jihudabü la ong lenkei.

²⁰Haoen yoa atje Kupra hoba Kurinibü, ladang haoen Antiok to atkei Küksithang lakei Bunyubou Jisu Khrista Ngühlangmaibü songlenko joyola khangkei.

²¹Bunyubou ik haoen yoa kikei hoba juongnyu mailembü la yeiko Bunyubou jungto sepeikei.

²²Haoen shangabü ngühlangei Jerusalem kabü lashong sühlangkei, hoba haoenei Antiok to Barnaba hautikei.

²³Ladang hao sühlangkei hoba Mühghaü onou kibü aukabü hapbei hao olinkei hoba Bunyubou to maangnyu angko kaangkhühtham hatyoan kila shanga haoei haoen pendou thungeikei;

²⁴aishanga hao müt maibü, Soushou Saopobü hoba mailemei shenan kikei. Hobaje mütshang yaang Bunyubou jungto sungbakei.

²⁵Barnaba Tarsas to Saul lamla haukei,

²⁶hoba ladang hao haüyokei haoei hao Antiok to leibakei. Po che sünga haosi lashong to phenyoan kikei hoba mütshang yaang la songlenkei. Eikshuong to Antioka shaang Khristan shuong dogo ngakei.

²⁷Khübü chaloua thuseibü shuong Jerusalem ka Antiok to yankei.

²⁸Haoen yoa Agaba dogo nyenan müt che loenkei hoba kaonyudak pendoua mühsinou yaang loulabü dogo Soushouei tetenko lenkei. Kho Klaudia jihsiphaia haüthükkei.

²⁹Eikshuong luluei thükbüei Jihuda kabü jaisina shuong la thuibü hautila maangangenkei.

³⁰Haoenei khei kümbei hoba Barnaba si Paul ik danko jaishou shuong la hautikukei.