Read Chang Naga YOUKOIKJAI 12 Bible Online

YOUKOIKJAI 12 - Chang Naga bible

YOUKOIKJAI 12

¹Kho jihsiphaia Herod Chobaei khonkutila shanga lashongbü at thükto ik shatkei.

²Haoei Johaneibü jai Jakob inlouei haitikei.

³Haoei ladang khoei Jihudabü olintia dogo chühenkei, haoei Peter kei lapla meimeikei. (Kho Tokai ajinbü Wentek Lem kiteikei.)

⁴Haoei hao lapbei hoba sepai lei bang san lei la lomtiko thüngdanga phokei. Haoei Püetbülem phainei pühdak matjemshang to leibalabü dogo dambei.

⁵Hibü lombü phoan Peter thüngdang to jinkei, lausikei lashongje hao shanga kaangkhühtham Mühghaü to welauko kiteikei.

⁶Herodei hao matjemshang to leibalabü lele lamlean kikei. Khüyou Peter yangmen penyi phenan sepai nyi kanglanga yeptian kikei hoba lombü shuongkei thüngdang koukhüna lombo kiteikei.

⁷Mangde ong Bunyubou khuthük hangangbü hao thüka lokei hoba thüngshanga ngesakbü che haukei. Haoei Petereibü hip to meitiko kangan laukei, “Hali laksepashi.” Hobaje haoeibü ik ka yangmen thetletkei.

⁸Khuthük hangangbüei hao to laukei, “Nei homashi hoba nguok lonashi.” Haoei khei kümbei. Kheijinei haoei Peter to laukei, “Kaibü mangyuk homashi hoba kü phai semshi.”

⁹Peter satkei hoba hao phai sembei. Haoei Mühghaüei khuthük hangangbü danko ai kümda kho tükdebü dogo ange, lausikei haoei mangsang che hapda dogo dambei.

¹⁰Haosiei shaangbou lomshang koukhün hoba nyiboubükei dankei, hoba thonla sangnyu aeto libü bakhüna louphambei. Kho jembü lolo ipbei, hoba kho aian phaia lamnyu che to yankei. Kheijinei khuthük hangangbüei hao apyokei.

¹¹Ladang Peter maia phambei haoei laukei, “Ngei tou chongchinga, khei Herodeibü hau hoba Jihuda mütli shuongei chüheiko kibü ka ngo püetla shanga Bunyubouei haoeibü khuthük hangangbü hautibü yingakei.”

¹²Ladang haoei kho shangashatkei Mark dogokei nyenbou Johaneibü nyu Mari chem, lanei juong takshatan welauko kiteikei, khüto haukei.

¹³Haoei koukhüna koukap to kuokkei hoba Roda nyenbü sambü sao che jola loukei.

¹⁴Saoei Petereibü ngüh shenkei, hoba aeibou olinbü ka kou ipbulabü khanto laangjung ngaian haoen to Peter khonga loakei dogo lenkei.

¹⁵Haoenei sao to laukei, “No langet angda.” Lausikei saoei tükdebü yingkei dogo kaosakkei. Haoenei laukei, “Kho haoeibü khuthük hangangbü yinglabü.”

¹⁶Lausikei Peterei kuokdang lekei. Ladang haoenei kou ipbei hoba hao hapbei, maangpangkei.

¹⁷Haoei haoen to alemenla shanga ikei shentiko laukei, hoba Bunyubouei hao lai thüngdang ka leibakei kho wanan lenkei; hoba haoei laukei, “Ho Jakob si jaisinasi shuong la lenashi.” Kheijinei haoei apyoan lubü kaoen che to haukei.

¹⁸Ladang lang ngekei, Peter to ai haüthükkei kho shanga sepai shuong aeibou la pangyokei.

¹⁹Herodei hao lamtikei, ühüpdang lesi haoei kokpheian chühan phaia lombü shuong haitila leilangtikei. Kheijinei hao Jihuda ka Kaisari to satkei hoba khünei thüngkei.

²⁰Herod Tair si Sidon mütli to aeibou khauangkei. Haoen chela takshatan, shaangla Blasta, Choba chema konglebou suletan phokei hoba haoen Choba jungto sangmai hiletla loukei, aishanga shausiyung shanga haoen kho haoeibü kaonyek to nongan kikei.

²¹Pienbü chalou chenei Herodei haoeibü Choba hele lean haoeibü Choba setshanga setkei hoba pühdak ngühlau kukei.

²²Mütshuongei “Hoje müteibü ngüh aying, mühghaüeibü ngüh,” dogo ngekko laudang lekei.

²³Mangde Bunyubou khuthük hangangbüei hao ngüman koutikei aishanga haoei soneikangbü Mühghaü la aku; hoba hao yangbemei künan haikei.

²⁴Lausikei Bunyubou ngühlang athakko haako yaangko haukei.

²⁵Barnaba si Saul Jerusalem ka haosieibü kümsilei wanan longeikei, hoba haosiei Mark dogokei nyenbou Johan haosi yoa leibakei.