Read Chang Naga YOUKOIKJAI 13 Bible Online

YOUKOIKJAI 13 - Chang Naga bible

YOUKOIKJAI 13

¹Antiok lashonga thuseibü hoba lenbou shuong kiteikei: Barnaba, Niger dogo nyenbou Simon, Kurini kabü Lukia, Herod Tetrark yoa chingenbou Manean, hoba Saul.

²Haoen Bunyubou to lembo hoba mühei nyengko kijinei Soushou Saopobüei laukei, “Barnaba si Saul ngei haosi aila ngakei kho kümsilei kümtila kü shanga phangche pienan phoashi.”

³Ladang haoenei mühei nyengko haosi to shangetan welau thonkei kheijinei haoenei haosi meimeitikei.

⁴Hibü Soushou Saopobüei haosi hautikei hoba haosi Seleukia sühko koukei. Khüka haosi Kupra to longa haukei.

⁵Haosi Salamia sühlangkei hoba Jihudabü sinagoga Mühghaü ngühlang phinthonkei; hoba haosi to thuiyola Johan yoan kikei.

⁶Ladang haoen Pafosa sühko su pendou danjung haukei, haoen Jihudabü amlangbü thuseibü seibü che to kühshokkei; haoeibü nyen Bar-Jisu kikei.

⁷Hao aeibou akbou governor Sergia Paulas yoa kikei. Governorei Barnaba si Saul ngala hautikei hoba Mühghaü ngühlang ditla shanga phekei.

⁸Lausikei seibou Elimaei (kho haoeibü nyen tetlabü) governor mailem ka ngaitila haujembo haosi khulimbei.

⁹Lausikei Saul, aoto Paul dogo laukei, Soushou Saopobüei shenko haoei hao to nyek thean chühkei hoba laukei,

¹⁰“No shabüeibü shou, khüpsilang hoba huonei youei shenan, saopobü pendoueibü dangbou, nyi tou Bunyuboueibü lam peksekbü haka athaklep lo?

¹¹Ditashi, toutham Bunyubou ikok ka thüka kia; no nyek thulabü hoba longche nyi chanyu ühüplabü.” Mangde deihak hoba nakthüh hao thükto lotkei, hoba hao jentila shanga müt lamla haujembei.

¹²Governorei haüthükbü kho hapbei, hoba mailembü che la yeikei. Bunyubou shangabü lenbü khünei hao maangpangkei.

¹³Paul si hao jambü shuong Pafos ka longa hauan Pamfiliaa Perga to loukei; lausikei Johanei haosi apyokei hoba Jerusalem to ngaikei.

¹⁴Haosikei Perga ka satkei hoba Pisidia kabü Antiok to loukei. Haosiei Nounyet sinagog to atkei hoba setkei.

¹⁵Ngühkhüm hoba thuseibü le wean phaia sinagog kabü yaangbü shuongei haoen jungto ngühlang hai hautikei, “Jaisinasi shuong, kanei mütshuong shanga denche thungei jangeilabü ngühlang kisije lenashi.”

¹⁶Paul loenkei hoba ik jungeiko hai laukei, “Israelbü hoba Mühghaü to hatbü shuong ditashi.

¹⁷Ho Israel mütli Mühghaüei seneibü pisibou shuong pienkei hoba haoen Ijep kaodaka yenla lean kijinei mütli yaangbü la yeitikei. Haoeibü thükenbü hauei haoen khüka leibakei.

¹⁸Haoei haoen lamanga po saonyi thüng pangteikei.

¹⁹Kheijinei haoei Kanan kaoa phangshuong nyet sühko shemtikei hoba haoeneibü kao Israelbü la letikei.

²⁰Po saongao leito anjinsem danan phaia tokei haoei haoen la thuseibü Samuel jih asühshongko matjembü shuong kukei.

²¹Nyiboua haoenei Choba che hikei, hoba Mühghaüei haoen la Benjamin phang kabü, Kish shou Saul kukei, aoei po saonyi songdakkei.

²²Kho phaia haoei Saul kuktikei hoba haoeneibü Choba shanga Dawid longtikei. “Mühghaüei hao shangabü aukabü leko hai laukei, ‘Ngei Jesse shou Dawid hapoua. Ngeibü dambü pendou künan haulabü lele hao kho maangsembü müt che ki.’

²³Kho müteibü thensilen ka, haoei theletbü tegü Mühghaüei Israelbü la khümenbou che sungbakei, hoba hao kho Jisu ki.

²⁴Hobaje hao aloujinei Johanei Israel mütshuong pendou shanga maangpon sepeibü tetsida lenko baptikubü huileda.

²⁵Ladang Johan haoküm haolei thonko loukei haoei laukei, ‘Kanei ngo ao dogo damda? Ngo hao aying, lausikei kü phainei, aoeibü nguoklüh sengkula ngo amu, hao louada.’

²⁶“Jaisinasi shuong, Abraham thensilen shuong, hoba kan Mühghaü to soumo hatbü dan, kho khümenbü ngühlang kho kün jungto hautikukei;

²⁷aishanga Jerusalembü hoba haoeneibü lei- yeibü danei hao ashen, hoba haoenei hao la shedbü kuko Nounyet weko webü thuseibü ngüh shuong loushedtikei.

²⁸Hao haitilabü lele aukabü ai ühüpsikei haoenei hao haitila shanga Pilat to phekei.

²⁹Ladang haoenei hao shanga doan kibü tegü pendou loushedtikei, haoenei hao peisei ka sungyankei hoba hee chenei khünkei.

³⁰Lausikei Mühghaüei hao haikhün ka langngaitikei.

³¹Hao yoa Galil ka Jerusalem to haubü shuong la chalou lounyu haptikei; hoba haoen tou mütshuong to haoeibü aukabü ki.

³²Künei kan la Ngühlang Maibü songlenda, khei Jisu Khrista langngaitibü danko, sen haoeneibü shisi shuong shanga pisishuong to theletbü kho nyiboubü Nyensang Chiaa lenan kibü tegü hai loushedkei: ‘No kü shou; tat ngo Kabou la yeia.’

³³

³⁴Mangkhün nyaübü to ladangkei nyibou angailabü lele haoei hao haibü ka langngaitia, hoba khüto yoko haoei hai laua: ‘Ngei ka la Dawid la thekubü saopobü hoba tükdebü haülabü kulabü.’

³⁵Maimaitham haoei lubü nyensang chiaa lauda: ‘Nyi kaibü saopobü kho anyaütilabü.’

³⁶“Tou Dawid hao metena Mühghaüei tetenbü tegü khangenan phaia haikei, hoba hao pisi shuong yoa khünkei. Hao nyaületkei.

³⁷Lausikei ao Mühghaüei langngaitikei haoje anyaü.

³⁸Hibü, jaisinasi shuong, kanei ho ngeashi, hao danko shabü apbubü kho kan to phinthonda,

³⁹hoba kan Mosa ngühkhüm phanga laobouei atangtien pendou ka hao to mailembü weko tangtibü hapbei.

⁴⁰Hibü sangashi! Thuseibü lea lenbü loushedlakei thükkei;

⁴¹‘Chühashi, kan nyikubü dan! Maangpangashi hoba mauashi; aishanga ngei kan jiha kümsilei che kümda, kümsilei che laobou kan to atei wanan lenasikei kanei ladangkei maialemlabü!’ ”

⁴²Paul si Barnaba ngaijinei jeteibü ngühnyek haoen to loulabü Nounyetkei laukushi dogo mütshuongei haosi to phekei.

⁴³Ladang kamshai linkei, khünei lembo shaibü Jihudabü hoba Jihuda songle to sepeibü shuong Paul si Barnaba phai sembei hoba haosiei haoen to Mühghaü onou thüka nongan kila shanga thungeijangeikei.

⁴⁴Sühlangbü Nounyet sangnyu kabü khümbo tegü Bunyubou ngühlang ditla takshatkei.

⁴⁵Lausikei ladang Jihudabü shuongei kho hapbei haoenei nyek to shatkei. Haoenei nyikukei hoba Paulei laubü to pekngeidang lekei.

⁴⁶Paul si Barnabaei hau kiko laukei, “Mühghaü ngühlang kho kan la shaang lenjan yingan kikei. Lausikei kanei ho wailetda hoba thon akibü langkei hapla amukei dogo kan lolo lenensije, kün tou Küksithang to sepeida.

⁴⁷Bunyubouei kün la sakkubü ngühkhüm kho ho ki: ‘Kaodak thonbüa sühko khümenbü hangsilam shanga, ngei no Küksithang to ngesakbü che yingla pienkei.’ ”

⁴⁸Küksithang shuongei kho ditan olinyokei hoba haoei Bunyubou ngühlang soneikangtikei. Thon akibü langkei shanga pienan phobü shuong mailembü la yeikei;

⁴⁹hoba Bunyubou ngüh kaonyek phambo phinthonkei.

⁵⁰Lausikei Jihudabü shuongei Mühghaü lembü yaangbü saoshuong hoba sangnyu kabü khuleibü tensepbei; haoenei Paul si Barnaba khulimbo shieikoe khangkei, hoba haoen kaonyek ka shian sattikei.

⁵¹Lausikei Paul si Barnabaei haoen khulimbo you ka thamngu kangan apbei hoba Ikonia to haukei.

⁵²Hobaje eikshuong kho olinbü hoba Soushou Saopobüei shenkei.