Read Chang Naga YOUKOIKJAI 14 Bible Online

YOUKOIKJAI 14 - Chang Naga bible

YOUKOIKJAI 14

¹Ikoniaa kei haoen Jihudabü sinagog to atkei hoba Jihudabü si Grikbü shuong yaangbü che mailembü la yeilabü lele lauenkei.

²Lausikei maialembü Jihudabü shuongei Küksithang maangpon pühnyinkei hoba jaisinasi shuong khulimbo khüjin khaüjintikei.

³Haoenei khünei Bunyubou to maanglem phoan hau kiko ngüh lauko chalou lounyu dantikei, hoba onoubü ngühlang kho Bunyubouei haoen la sei hoba maangpanglabü hau kuko sungletkei.

⁴Touje sangnyu kabü mütshuong kho Jihudabü ae hoba at eikshuong ae yeiko janyinkei.

⁵Ladang Jihudabü si Küksithang ham yoa leiyeibü dan yoan haoen amaiko jungeiko laangei tetla huonkei,

⁶haoenei kho lapenkei hoba haoen Lukonia kabü Lustra si Derbi sangnyu hoba lepsanga sühko satkei.

⁷Khüneikei haoenei Ngühlang Maibü songlenkei.

⁸Lustraa ladangkei haoeibü you jungeian achühbü müt che kikei. Hao bukjineithama sokebü hoba ladangkei apai.

⁹Hao Paulei laubü ditko setkei. Paulei hao to tangko chühkei, hoba kho mailabü lele hao to mailem kibü chühenan

¹⁰haoei ngüh yaangbüei laukei, “Kaibü youei tangshaitham loashi.” Müt khoei saikolakko loenan paikei.

¹¹Ladang mütshuongei Paulei kümbü kho hapbei, haoenei Lukonia ngühyema ngekkei, “Mühghaü shuong mütmai la yeian sen jungto lotakei.”

¹²Haoenei Barnaba la Zea nyenkukei hoba Paul la Herme, aieilausi kongnyubou ngühlaubou kho hao kiteikei.

¹³Sangnyu bakhün aenei lemshang kibou Zea ungshedbou shuongei noknyüh thedanga lembü kumang sühko bakhün to masu pongsu si chipen yak sungbakei.

¹⁴Ladang eik nyi, Barnaba si Paulei kho ditkei haosiei maangshatei nei jitnyinkei hoba shuong yoto hai

¹⁵phangko tomjung atkei, “Mütshuong, kanei aila hai jungeida? Künkei kan tegübü ong, khuthük si kaodak hoba yungnyu hoba khonei kibü pendou kümbou langkeibü Mühghaü jungto ho tegübü jim akibü hangsilam ka kan nasepeia dogo künei kan la Ngühlang Maibü songlenda.

¹⁶Danbü meten haoei phangshuong pendou jembü lam to haula sakkua.

¹⁷Khei yingasikei haoei mütshuong kho haoeibü aukabü ayoko üpyo. Haoei khuthük ka lang yantiko hoba shusiphon jihsiphai hautiko haoeibü sanou kan to lenkei, hoba haoei kan shaueiyungei senyühshemtida hoba kaneibü maangpon olinbüei shentida.”

¹⁸Kheinyu lenkokei haosi to lemla loubü shuong kho haosiei ushaleko ong shingekkei.

¹⁹Lausikei Pisidia kabü Antiok si Ikonia ka Jihudabü shuong lousühkei. Haoenei shuong kho phokthetan Paul to laangei sonkei hoba haia dogo daman sangnyu aiko senlangkei.

²⁰Lausikei ladang eikshuongei kaijembei kheijinei hao laksepbei hoba sangnyu to atkei. Nyibounyet hao Barnaba yoa Derbe to haukei.

²¹Haosiei kho sangnyubü to Ngühlang Maibü lenkei, hoba eik juong haatian phaia haoen Lustra, Ikonia hoba Pisidia kabü Antiok to ngaikei.

²²Haoenei eikshuong hau kitikei hoba mailema ngühmaang lanko khüpla shanga hai laukei, “Khonku juongnyu danthetko ong sen Mühghaü Sangle to atjan ki.”

²³Haoenei lashong wekoa jaishou shuong heenkukei, hoba mühei nyengko welauan phaia haoenei mailembü Bunyubou la haoen khümbo nongtian phokukei.

²⁴Haoen Pisidia danko hauan phaia Pamfilia to loukei,

²⁵hoba haoenei Pergaa songlenan phaia haoen Atalia to loukei.

²⁶Khüka haoen, laobou kaoena Mühghaü onoua kümlaleila nongkubü tou khümtia, kho Antiok to longa haukei.

²⁷Sühlangan phaia lashongbü chela kamtian Mühghaüei haoen jungeibü hoba haoei ailai Küksithang shuong la mailem koukhün ipbukei kho ngühlang lenkei.

²⁸Hobaje haoen eikshuong yoa chalou lounyu thüngkei.