Read Chang Naga YOUKOIKJAI 15 Bible Online

YOUKOIKJAI 15 - Chang Naga bible

YOUKOIKJAI 15

¹Jihuda ka müt at yanan jaisina shuong to haoenkei Mosa songa kakbü tegü akiplonga khümenla athüklabü dogo lenkei.

²Paul si Barnabaei haoen to ngühthang ayenko kaang wetyoko lemenkei, hibü haoenei kho lemenbü ngüh kho shanga Paul si Barnaba yo to haoen ka at yoan Jerusalem to hangangbü shuong si jaishou shuong jungto haula lamlekei.

³Haoen lama lashongbüei thuiyoko hautikei, hoba haoen Foenika si Samaria danko Küksithang shuong maangpon sepeibü lenko haukei; hoba haoenei jaisinasi shuong pendou la olinbü yaang kukei.

⁴Ladang haoenei Jerusalem sühkei, lashong hoba hangangbü shuong hoba jaishou shuong pendouei haoen olinko sungletkei, hoba haoenei Mühghaüei haoen lai jungeikei kho lenkei.

⁵Lausikei Farisibü dan yoa mailembü atei loenan, Küksithang shuong kipjan hoba Mosa ngühkhüm jungeila lenjan dogo laukei.

⁶Kheijinei youkoikjai si jaishou shuong kho ngüh daman chühla shanga kambei.

⁷Ngüh juong wetyoan phaia Peter loenkei hoba haoen to laukei, “Jaisinasi shuong, ngo danko Küksithang shuongei Ngühlang Maibü ditlabü hoba mailemlabü shanga shangieda ngo kan yo ka pienkei dogo kanei ngeakei.

⁸Hobaje maangpon ngebou Mühghaüei, sen la kubü tegü haoenlakei Soushou Saopobü kuko haoen sungletbü aukabü lekei.

⁹Haoei sen si hao aoa ai abangnyin, aishanga mailemei haoei haoeneibü maangpon asaüenkukei.

¹⁰Laobou buleng seneibü pisibou ayingsi senei asüh kho mailembü shuongeibü ngüma jinkuko kanei aila Mühghaü takteida?

¹¹Khei aying, Bunyubou Jisueibü onou danko sen si haoen jetei khümenkei dogo senei mailemda.”

¹²Shuong pendou küpjembei hoba Barnaba si Paulei haoen danko Mühghaüei Küksithang yoa sei hoba maangpanglabü kümbü pendou thenan lenbü to ditko setkei.

¹³Ladang haosiei laukhümbei Jakobei thenkei, “Jaisinasi shuong, kü to ditkai.

¹⁴Küksithang ka hao shanga phangshuong che longtila shanga Mühghaüei shaanglathama lai thounoukei kho tou Simonei thenan lena.

¹⁵Ho thuseibü ngüh to jiakei; Laishibaei lenda,

¹⁶‘Kho phaia joubü khunak shousi, hoba ngei lela ngabü Küksithang pendouei Bunyubou lamlabü lele ngo longeilabü hoba ngei Dawid kishang tuongbü kümetlabü. Ngei kho leilubü kümetlabühoba ho nyibou phonngailabü dogo, shangiednyu habü ngetibou Bunyubouei lauda.’

¹⁹“Hibü, senei Küksithang shuong aoyou Mühghaü jungto sepeia haoen la khonsak akujan,

²⁰lausikei silip jabü shausiyung, asangalanbü, nyatettibü shausi- yung, hoba sii ka bangenan kila shanga senei haoen to le dojan dogo damda.

²¹Aishanga Mosaei shangiedbü chalou ka thama hao shanga phinthonla phojung loua. Haoeibü ngühkhüm Nounyet weko sinagoga wekei.”

²²Kheijinei youkoikjai si jaishou shuong yoa kambü shuong pendou yoan, Paul si Barnaba to dangan Antiok to hautilabü müt pienkei. Haoen mailembü yoa leiyeibü shuong Barsaba dogo nyenbou Juda si Sila pienkei.

²³Haoenei ngühlang hai dobü hautikei: “Antiok, Siria hoba Kilikia pendoua Küksithang jaisinasi shuong to youkoikjai hoba jaishou jaisinasi shuongei salem küntida.

²⁴Kün yo kabü müt atei, kün to ai apheshuokko louan kaneibü maangpon phenyemtiko ngüh laua dogo künei dida.

²⁵Hibü künei shuong yoka müt at pienan küneibü sanoubü Barnaba si Paul,

²⁶aoyou langkei seneibü Bunyubou Jisu Khrista nyena khümbo kua, haosi yoto hautilabü dogo janenkei.

²⁷Hibü kanei haoen lolo kan la sembungei lenlabü lele Juda si Sila hautida.

²⁸Habü kongnyu phai to liman kan thükto lubü onat ajinyokulabü shanga ho Soushou Saopobü hoba künei janenbü kikei:

²⁹silip jabü shausiyung ka, sii ka, nyatettibü shausiyung pendou ka, hoba asangalanbü ka bangenan kilabü. Kan lolo khüka satenan kialonga aeibou mailabü. Bangmai.”

³⁰Hibü haoen khüka linan phaia Antiok to yankei. Haoenei shuong pendou takshattikei hoba le kho kukei.

³¹Le kho wean lenkei hoba khoei haoen thungeijangeibü shanga kambü shuong olinyokei.

³²Juda si Sila, thuseibü yingsije, ngüh lounyu lauko jaisinasi shuong thungeijangeikei hoba hau kingeitikei.

³³Haoen khünei longche thüngkei. Kheijinei jaisinasi shuongei haoen hautibü shuongla haoeneibü salem lenngaila shanga haoen to phean phaia haoen ungtikei.

³⁴(Lausikei Silaeije khün setngaila janenkei.)

³⁵Paul si Barnaba, lubü juong yoan Bunyubou Ngühlang Maibü songlenko Antioka setkei.

³⁶Chalou shijo kian phaia Paulei Barnaba to, “Setije ngaian setiei Bunyubou ngühlang phinthonshang sangnyu weko to hauan jaisinasi shuong lai ong kije pean chühakho,” dogo laukei.

³⁷Barnabaei Mark dogo laubou Johan haosi yoto leimang sühkei;

³⁸lausikei aoei haosi Pamfiliaa apyoan haosi yoa kümtoleito ayang, kheibü müt leilaje Paul la amaikuko dambei.

³⁹Khünei lem aseyobü yaang longan haosi bangkei, hoba Barnabaei Mark leian Kupra to longa haukei.

⁴⁰Paulei Sila heenkei hoba jaisinasi shuongei Bunyubou onoubü la nongtian phokukei.

⁴¹Hao Siria si Kilikia danko lashong dan hau kitiko haukei.