Read Chang Naga YOUKOIKJAI 16 Bible Online

YOUKOIKJAI 16 - Chang Naga bible

YOUKOIKJAI 16

¹Paul Derbe si Lustra to loukei hoba khünei eik che Timoti nyenbü kikei. Hao kho mailembü Jihuda sao cheeibü shou lausikei haobouje Grikbü kikei.

²Lustra si Ikoniaa jaisinasi shuongei hao maibü shanga aukabü kuko laukei.

³Paulei hao hao yoa thonan haumangsühkei hoba khübü kaoen kabü Jihudabü aoa haoei hao leibaan kipbukei, aieilausi haobouje Grikbü dogo pendouei ngean kiteikei.

⁴Haoen haubü sangnyu wekoa youkoikjai si jaishou shuongei Jerusalema janenbü ngühkhüm jungeila lenko ngühlang kujung dankei.

⁵Khoei lashong dan mailema hau kiko chingkei hoba chalou angbüa mütshang haakei.

⁶Haoen Frigia si Galatia kaophei danko haukei. Asiaa Mühghaü ngüh alentila Soushou Saopobüei haoen shiletkei.

⁷Ladang haoenei Misia leilang sühkei, haoen Bithinia to atla haujembei lausikei Jisueibü Soushouei haoen la asakku.

⁸Haoenei Misia danjung Troa to loukei.

⁹Khüyou Paulei mangsang che hapbei: “Makedonia to louan kün thuikai,” dogo sukojako Makedoniabü che loan hapbei.

¹⁰Ladang haoenei mangsang kho hapbei, Mühghaüei haoen la Ngühlang Maibü songlentila kún ngada dogo shuokenan tongde Makedonia to haula haujembei.

¹¹Kün Troa ka shaüde Samothrak to longa haukei, hoba nyibounyet Neapoli to haukei.

¹²Khüka kün Makedonia kaopheia shaangbou sangnyu hoba Rombü kishang Filipi to loukei. Kün kho sangnyua chalou shijo setkei.

¹³Nounyet kün welaushang kaoen kilabü dogo daman bakhün aiko yungko to haukei, hoba khünei shaian kibü yaksa shuong to joyokei.

¹⁴Lidia nyenbü Mühghaü lembü yaksa cheei ditko kikei; sao kho Thiatira sangnyu kabü nakthüngan sakbü nei yakbü kikei. Bunyubouei saoeibü maangpon ipbuan saoei Paulei lenbü to aeibou maangtakko ditkei.

¹⁵Ladang sao hoba sao chemdang baptikei, saoei kün to, “Kanei ngo tükdebü Bunyubou phai sembü yingkei dogo chühenan kia longa kaiya hoba kü chema setashi,” dogo lauko sukeijakei; hoba kün sao yoa leian haukei.

¹⁶Kün welaushang to haujinei thulenbü soushou kibü aaosao che haüyokei. Saoei seibütakbü ka saoeibü bunyu shuong la pailetbü yaang sungbakukei.

¹⁷Saoei Paul hoba kün phai, “Habü mütshuong ho Thükkabou Mühghaü sambü shuong ki. Haoenei kan to khümenbü lam che ngekletda,” dogo lauko sembei.

¹⁸Saoei chalou lounyu hai ong lauko khüpbei. Paul aeibou kipjimtisi haoei sepeian soushou to laukei, “Sao ka longan apshi dogo Jisu Khrista nyena ngei ka la ngühkhüm kuda;” hoba khoyam longan apbei.

¹⁹Ladang saoeibü bunyu shuongei haoen ku pailetshang aki dogo ngekei, haoenei Paul si Sila lapan namyakshang kaoen to songdakbü shuong jungto senan haukei.

²⁰Haoenei matjembü thedang to haoen leibakei hoba laukei, “Habü mütshuongei kün sangkhong aeibou banglangtida; haoen Jihudabü yingkei.

²¹Sen Rombüei ai song asungletda hoba jungeijan aying kho song haosiei lenda.”

²²Shuongkei khünei thipan haosi shieikei, hoba matjembü shuongei haosieibü mangkabü neisimei jitnyinkuan saüan apbukei hoba juei semeila ngühkhüm kukei.

²³Haoenei aeibou ngümeian phaia thüngdangto jinkei hoba thüngbou la maisho lomla shanga ngühkhüm kukei.

²⁴Hibü haoei haosi mangkabou to jinan, haosieibü you kho thüngdang to attian phokei.

²⁵Metuphanga Paul si Sila Mühghaü to welauko hoba nyensangbü chia lauko kikei, hoba thüngdanga kibü shuongei haosi to ditko kikei.

²⁶Mangde thüngdang chem pendou nyaakeiko selo kaang nyikei; kheijineitham koukap pendou ipbei hoba thüngdang kabü shuong pendoueibü yangmen thetletkei.

²⁷Thüngbou laksepbei hoba ladang haoei thüngshang koukhün pendou ipan hapbei, thüngdangkabü shuong satkhüma dogo daman haoei haoeibü inlou setenkei hoba jembü lolo hailabü ong kiteikei.

²⁸Lausikei Paulei ngüh yaangbüei ngekko laukei, “Jembü lolo tekom; aieilausi kün pendou hanei kia.”

²⁹Kheijinei thüngbouei hantin hikei hoba wenjung atkei. Hobaje hao hatbüei lühko Paul si Sila thedanga khüpetkei.

³⁰Kheijinei haoei haosi tongde leilangan phaia haosi to laukei, “Yaangbü shuong, khümenlabü shanga ngei ai kümjan?”

³¹Haosiei laukei, “Bunyubou Jisu to mailemashi hoba no hoba kan chemdang khümenlabü.”

³²Haosiei hao hoba haoeibü chemdanga kibü pendou la Mühghaü ngüh lenkei.

³³Kheijineitham haoei haosi leilangan moukhün sakkukei. Hobaje khoyam hao hoba haoeibü chemdang pendou baptikukei.

³⁴Haoei Paul si Sila hao chem to leian haukei hoba oknyinkei; hoba hao Mühghaü to mailembü yeibü shanga hao yoa chemdang pendou yoan olinyokei.

³⁵Ladang langngekei, matjembü shuongei, “Khübü mütshuong litiashi,” dogo ngühkhüm jungan thenkabü yaangbü shuong hautikei.

³⁶Thüngbouei Paul to kho ngühlang lenko laukei, “Matjembü shuongei kasi litila shanga ngühkhüm kuakei. Hibü tou longashi, hoba eaaoa ngaiashi.”

³⁷Lausikei Paulei haoen to laukei, “Küsi to shedbü ai akiko haoenei küsi to pühthea ngümbei hoba kün Rom mütli ki! Haoenei kün thüngdang to jinkei. Hobaje tou haoenei kün huphangshoua ngaitila se? Ladangkei aying! Haoen lolo louan kün sungentiashi.”

³⁸Yaangbü shuongei kho ngühlang matjembü shuong la lenkei hoba haoen Rombü dogo ditan aeibou hatyokei.

³⁹Haoen louan haosi to ap hikei hoba haosi sungenan phaia haoenei haosi to sangnyu apyola sukeijakei.

⁴⁰Kheijinei haosiei thüngdang chem apyokei hoba Lidia chem to haukei; khünei jaisinasi shuong to haüyoan hoba thungeijangeian phaia haosi bangkei.