Read Chang Naga YOUKOIKJAI 17 Bible Online

YOUKOIKJAI 17 - Chang Naga bible

YOUKOIKJAI 17

¹Haosi Amfipoli hoba Apolonia danko paikei hoba Thesalonika, laonei Jihudabü sinagog che kikei, khüto loukei.

²Haoeibü song tegü, Paulei haoen yoa yoan Nounyet sem sühko haoei haoen to Lai ka,

³Messia khonsaklabü hoba sembounyet haikhün ka langngailabü kho janbü yingan kikei dogo wanan lenko hoba aukabü kuko lenyokei. Haoei laukei, “Jisu ao shanga ngei kan to phinthonda, kho Messia ki.”

⁴Haoen at mailemtikei hoba Mühghaü lembü Grikbü shuong yaang hoba yaangbü sao shuong juongnyuei Paul si Sila phai sembei.

⁵Lausikei Jihudabüei nyekto shatkei. Haoenei khong ka shoongeibü sousiwat tan leisheian sangnyu pendou lapangyotikei. Haoenei Jason chem kombei hoba haosi püh shaishang to leibala shanga lameikei.

⁶Haoenei haosi aminousije Jason yoa jaisinasi shuong at sangnyu matjembü shuong jungto, “Kaodak khüpeilangeitibü shuong hatokei louakei, hoba Jasonei haoen haoeibü chem to leiyetkei.

⁷Haoen pendouei Jisu nyenbü lubü Choba che kia dogo lauko Kaisar ngühkhüm khulimbo kümda,” dogo ngekko senbakei.

⁸Haoenei kheinyu lauko ditko shaibü matjembü shuong si noknyüh lapangtikei.

⁹Matjembü shuongei Jason si lubü shuong ka angnam shauan litikei.

¹⁰Kheijinei jaisinasi shuongei Paul si Sila khüyoutham Beria to hautikei. Haoen sühlangan Jihudabü sinagog to atkei.

¹¹Khübü mütshuong Thesalonikabü to maibou kiteikei hoba haoenei ngühlang kho maangtakko sungletkei hoba Paul si Silaei lenbü kho tükde yinglaoje dogo chaangboua Lai to takteian chühkei.

¹²Haoen müt juong, Grikbü yaangbü sao shuong hoba bousu juong mailembü la yeikei.

¹³Ladang Thesalonikabü Jihudabü shuongei Paulei Mühghaü ngúhlang kho Beria akei lena dogo ditkei, haoen khütokei louan noknyüh pendou pühnyintikei.

¹⁴Kheijinei jaisinasi shuongei tongde Paul yungko to hauan aptikei hoba Sila si Timoti kho kaoena setngaitikei.

¹⁵Paul hangbü shuongei hao Athen sühtikukei hoba Sila si Timoti hao lambo thükpangteiko enyu kai dogo lentibü ngüh künan haoen bangkei.

¹⁶Paul Athena haosi haiyeiko setjinei sangnyu kho heangshoei nyakan hapjinei hao aeibou maangto shatkei.

¹⁷Hibü haoei sinagoga Jihudabü hoba lembü shuong to hoba namseishanga chalou angbü haüyobü pendou to aukabü kuko lenyokei.

¹⁸Epikuria hoba Stoik songbüdobü müt atei hao to ngüh wanyokei. Atei laukei, “Ho ngühjuongbou mütei ai lenmang sühda?” Atei laukei, “Hao Küksithang mühghaü phinthonbou che yingla jankuda,” aishanga haoei Jisueibü Ngühlangmaibü hoba langngaibü shanga songlenko kikei.

¹⁹Haoenei hao Areopaga kamshang to leibakei. Haoenei laukei, “Nyi lenko kibü songle haanbü ho shangabü künlakei ngetibü yingma?

²⁰Nyi küneibü noukhün to maangpanglabü ngüh at sungbada. Khübü ngüh at ai yingkeije küneikei ngemang sühda.”

²¹Athenbü hoba khükabü yenbou shuong pendouei ngüh haanbü che lenko ayingsi ditko ong jih dantiko kikei.

²²Paul Areopaga kambü thedanga loan laukei, “Athen kabü mütshuong, kan songlea aeibou kaangakei dogo hangsilam pendoua shenda.

²³Aishanga ngei kaneibü lembüsabü to chühko paijinei, ngei khübü yoa heangsho che, ‘Angebü Mühghaü che to,’ dogo doan hapbei. Kanei laobou lemda lausikei angekei, kho shangabü ngei kan to tou phinthonda.

²⁴Kaodak hoba khünei shenko kibü pendou kümbou Mühghaü ikei dangbü lembüchema akida. Hao kho khuthük hoba kaodak Bunyubou ki.

²⁵Ayingsi haoei ajanjan küman kibü tegütham müteibü ikei akhangenda, aishanga pendou la haoeneibü langkei hoba hak hoba peisilei pendou haoei kuda.

²⁶Kaodak pendoua kitila shanga haoei khunak shousi phang weko müt che ka paktikei. Phangshuong ladang loan ladang tuongjan hoba haoen tükde lanei kijan kho haoei janenkei.

²⁷Hao to joyola hoba hao haptila dambüa haoenei Mühghaü lamjan yingan kikei; hoba hao sen ka aineikei saako bangan aki.

²⁸Aishanga hao to sen kida, topeida hoba lang kida; kaneibü chia atbü ateikei hai lauakei: ‘Aishanga sen mangkei haoeibü shisi shuong ki.’

²⁹Mühghaü shisi shuong yingan senei Mühghaü kho müteibü huonei seiei jaken yaüenbü peisilei hon, chandinam, ayingsi laang che tegü adamjan.

³⁰Angebü jihsiphai kho Mühghaüei khei ong phokukei, lausikei tou pendou aenei pendou maangpon sepeila haoei ngühkhüm kuda.

³¹Aieilausi haoei pienbü müt che danko kaodak kho ngühmaia matjemla shanga haoei chalou che takletan phoakei. Pendou la haoei kho müt haibü ka langngaitibü danko aukabü kua.”

³²Ladang haoenei haibü ka langngaitibü shanga ditkei, atei nyikukei; lausikei ateije laukei, “Künei ka ka ho shangabü nyiboukei ditlabü.”

³³Hibü Paulei kho kambü apyokei.

³⁴Müt atei hao to yokei hoba mailembü la yeikei; khübü yoa Areopaga Kambü nyenkabü Dionisia yoan kikei; hoba Damari nyenbü yaksa che, hoba lubü shuongkei yoan kikei.