Read Chang Naga YOUKOIKJAI 18 Bible Online

YOUKOIKJAI 18 - Chang Naga bible

YOUKOIKJAI 18

¹Kho phaia Paulei Athen apyoan Korint to loukei.

²Haoei Aquila nyenbü Jihudabü che, Itali ka nyangko loushedbü Pontia mütli che hapbei; aishanga Klaudiaei Jihudabü pendou la Rom apyoan satla ngühkhüm kukei. Hao haoen jungto loukei,

³haoeneibü namsei kümsilei kho phekhun shibü kikei, hoba haokei kheibü yingsije haoei haoen yoa homan liko kümbeileikei.

⁴Nounyet weko haoei sinagoga aukabü kuko laukei, hoba Grikbü si Jihudabü ham suletla haujembei.

⁵Ladang Sila si Timoti Makedonia ka lousühkei, Jihudabü la Messia kho Jisu yingkei dogo ngühchung kuko hao lolo khümbo kuan jih pendou songlenla lekei.

⁶Ladang haoenei hao khulimbei hoba nyikukei, haoei haoeibü nei ka thamngu kangan apbo haoen to laukei, “Kan maualonga kho kaneibü shedbü ong yinglabü. Ho on ngei akünda. Tou ka jaüan ngo Küksithang to haulabü.”

⁷Haoei apyokei hoba Mühghaü lembü che Titia Jasta nyenbü chem to atkei; haoeibü chem kho sinagog to lepan kikei.

⁸Krispa nyenbü sinagog kabü yaangbü che, haoeibü chemdang pendou thonan Bunyubou to mailembei; hoba songlenbü ditan Korintbü juongei mailembei hoba baptikei.

⁹Bunyubouei Paul to mangsanga lenkei, “Tehüt; lendang leashi, sangsembo teki,

¹⁰aishanga ngo ka yoa kia.”

¹¹Hibü haoei kho sangnyua po che lit lak thüngko haoen to Mühghaü ngühlang lenkei.

¹²Galio Akhaiaa governor kijinei Jihudabü pendou chenei thipan Paul khulimbo lokei hoba matjemshang to,

¹³“Ho mütei Ngühkhüm khulimbo Mühghaü lemtila shanga mütshuong suletla haujemda” dogo lauko leibakei.

¹⁴Paulei ngühlau khangla kümbo kitoua Galioei Jihudabü to laukei, “Jihudabü shuong, ho aiche kümshed leishedtibü ayingsi kokbü yepeibü tegüje ngei kan to ditkukhoulabü,

¹⁵lausikei ho ngüh shuong hoba nyen shuong hoba kaneibü ngühkhüm shangabü yingalonga, khoje kanei lolo chühshi; ngei kheibü mat jemmang asühda.”

¹⁶Hobaje haoei haoen matjemshang ka shian ngaitikei.

¹⁷Kheijinei haoen pendouei Sosthena, sinagog yaangbü lapan matjembü khonga ngümeikei; lausikei kho shanga Galioei aikei aphanei.

¹⁸Paul khünei chalou lounyu thüngkei. Kho phaia haoei jaisinasi shuong to bangngüh lenan Priskila si Aquila yoa Siria to longa haukei. Haoei Kenkhraa khu shuan apbei, aishanga haoei thebülanbü lekei.

¹⁹Haoen Efesiaa sühkei hoba haoen apyojung hao sinagog to atkei hoba Jihudabü yoa ngühchung kuko laukei.

²⁰Haoenei hao loushangko thüngla phekei, lausikei haoei athelet.

²¹Hobaje haoen to bangngüh lenan phaia haoei laukei, “Mühghaüei maang angsije ngo kan jungto longeilabü.” Kho phaia hao Efesia ka longa haukei.

²²Hao Kaisariaa thakkei hoba Jerusalem to haukei hoba lashongbü to salem lenkei. Kho phaia hao Antiok to yankei.

²³Khünei chalou shijo thüngan, haoei haoen apyojung Galatia si Frigia kaonyeka kaoen che ka che to shonko eikshuong pendou hau kitijung haukei.

²⁴Alexandria mütli Apolo nyenbü Jihudabü che Efesia to loukei. Hao Lai shangalia shatbü hoba ngühsong kakbü müt che kikei.

²⁵Hao kho Bunyubou lamnyua lenenan kiteikei, hoba haoei Johanei baptibü shanga ong ngeasikei haoei aeibou soushou maangdakbüa Jisu shangabü tükde lauko lenkei.

²⁶Haoei sinagoga aeibou maangkhaiko laukei. Ladang Priskila si Aquilaei haoei laubü ditkei haosiei leilangan Bunyubou lamnyu shanga aei shangashatko lenkei.

²⁷Hao Akhaia to haumang sühkei, hoba jaisinasi shuongei hao thungeijangeikei hoba eikshuong jungto hao sunglettila shanga le dokukei. Hao ladang sühlangkei, Mühghaü onou danko hao kho mailembü shuong shanga aeibou thuibü yingan kikei;

²⁸aieilausi haoei aeibou hau kiko Messia kho Jisu yingan kikei dogo Lai ka aukabü sungenan kuko wetyoan Jihudabü shuong pühdaka thüklangkei.