Read Chang Naga YOUKOIKJAI 19 Bible Online

YOUKOIKJAI 19 - Chang Naga bible

YOUKOIKJAI 19

¹Apolo Korinta kijinei Paul kaolam peiko hauan Efesiaa sühlangkei. Khünei haoei eik at haüyokei,

²hoba haoei haoen to laukei, “Kan mailemjinei Soushou Saopobü sungleda lo?” Haoenei hao to laukei, “Künei Soushou Saopobü che kia dogo ongkei aditkei.”

³Haoei laukei, “Khülonga kan ainei baptikei?” Haoenei laukei, “Johanei baptikei.”

⁴Haoei laukei, “Johanei mütshuong haoen maangpon sepeibü tetsida leko baptikukei. Mütshuong to haoeibü ngühlang kho hao phainei Che, ao louada, kho Jisu, hao to mailemjan dogo kikei.”

⁵Haoenei ladang kho ditkei haoenei Bunyubou Jisu nyena baptikei;

⁶hoba ladang Paulei haoeneibü khua shangetan welaukukei, haoen thükto Soushou Saopobü lotkei, haoenei lubü ngühyemei laukei hoba tetenkei.

⁷Haoen pendouei müt anthüknyi thüng kiteikei.

⁸Hao sinagog to atkei hoba lit sem sühko wetyoko hoba sueijaiko Mühghaü sangle shanga haoei maangkhaiko lenkei.

⁹Ateije tukeisekkei hoba Lamnyu shanga shuong thedanga amaibü lauko maialem, hibü haoei haoen apyoan satkei; hoba Turana leweshanga chalou angbüa haoei aukabü kuko laukei.

¹⁰Kho tegü po nyi ontikei; khoei Asiaa kibü Jihudabü hoba Grikbü pendouei Bunyubou ngühlang ditkei.

¹¹Mühghaüei Pauleibü ik danko aeila sei jungeiko kikei.

¹²Mütshuongei Paulei jungeibü lemhamjin si shenpeinei jungan hauan shatbü maitikei, hoba shabü sou mangkei haoen ka satkei.

¹³Shabü sou shian sattiko shoongaibü Jihudabü seibü atei shabü sou kibü shuong to Bunyubou Jisu nyen jungeiko, “Paulei songlenbü Jisu nyena longan apshi dogo ngei ngühkhüm kuda,” dogo lauko haujeman chühkei.

¹⁴Shua nyenbü Jihudabü thükkabü ungshedbou cheeibü shou müt nyetei khei jungeiko kikei.

¹⁵Kheijinei shabü souei jongaikei, “Ngei Jisu ngeakei, ngei Paulkei ngeakei, lausikei kan ao?”

¹⁶Hobaje shabü sou kibü müt kho haoen thük to toman shatkei. Haoei haoen pendou thükkei hoba amaiko ngümeisije haoen chem khüka mütkong hoba leiluko satyokei.

¹⁷Kho Efesiaa kibü Jihudabü hoba Grikbü pendouei ngekei. Haoen aeibou hatyokei hoba Bunyubou Jisu nyen aeibou haangko toneikei.

¹⁸Mailembü yoka juong loan kümbüleibü tang khitko theletko lenkei.

¹⁹Kheibü sei jungeibü müt juongei haoeneibü le takshatan pühthea jikan apbei; haoenei kho munam tetsi sempak hajar anjinsem longkei.

²⁰Kho tegübü haua Bunyubou ngühlang kho phinthonko haako juongko haukei.

²¹Khübü haüthükbü phaia Paulei Makedonia danko Akhaia to hauan khüka Jerusalem to danla janenkei. Haoei laukei, “Ngo khüto hauan phaia ngei Romkei chühjan.”

²²Haoei hao to thuibou Timoti si Erasta Makedonia to hautikei, lausikei haoje Asiaa longche setngaikei.

²³Kho jihsiphaia Lamnyu shangabü aoa panglangbü yaang longkei.

²⁴Chandinam yaübou, nyenei Demetria Artemi lembü chem chandinam noksa kümbou, haoei kümbüyaübü shuong la namsei haang yaang sungbakei.

²⁵Haoei haoen jeteibü kümsilei kümbü shuong takshattian laukei, “Mütshuong, ho namyaknamsei ka seneibü nyaksinam haada dogo kanei ngekei,

²⁶hoba ho Paulei Efesiaa ong ayingko Asia khümboa tegü mütei kümbü mühghaü shuong khoje mühghaü aying dogo lenko mütshuong juong suletko ayingbü to leilangda dogo kanei hapda hoba ditda.

²⁷“Seneibü namyak kümsilei ho khulimlabü thushed ong aying, lausikei yaangbü mühghaü sao Artemi lembü chem hokei aikei aweeilabü, hoba sao, laobou Asia khümbo hoba kaodak pendouei lemda, kho yaangenbü saoeibü nyen mangkei hangletlabü.”

²⁸Haoenei ladang kho ditkei, haoen aeibou khauangkei hoba, “Efesiabü Artemi kho yaangbü ki!” dogo ngekdang lekei.

²⁹Kho lemenbü sangnyu pendoua aakei; hoba haoenei Paul wakoua youjambü Makedoniabü Gaia si Aristarkha lapbei hoba louyoshang to nyuyoko yangkei.

³⁰Paulei shuong yoto atmang sühkei lausikei eikshuongei shingekkei.

³¹Asia kommanga yaangbü shuong, hao to maangjambü ateikei hao louyoshang khüto lotla hautejem dogo subüjabü hautikei.

³²Atei at, atei at, dogo ngekyobü ka kambü shuong aeibou lemenkei; hoba kambü yoka juongbouei haoen aila chela kambeije kho ongkei ange.

³³Shuong yoa ateije ho Alexander yingakei dogo ong thontikei, aishanga Jihudabü shuongei hao thedang to thungan hautiko kikei. Alexanderei ik topeiko noknyüh to hao ashedkei dogo lenmang sühkei.

³⁴Lausikei ladang haoenei hao Jihudabü dogo damenkei, haoen pendouei ngüh che la lean, “Efesiabü Artemi kho Yaangbü ki” dogo lauko ngekyokei, hoba haoenei ho angh nyi sühko ngekdangkang lekei.

³⁵Ladang sangnyu dobouei haoen küpjemtikei, haoei laukei, “Efesia mütshuong, Efesia sangnyu kho Yaangbou Artemi lembü chem lombou hoba kho noksa kho khuthük ka lotkei dogo angebü ao ki?

³⁶Kho aoeikei ji dogo alauenlabü hibü kan küpjemmeiashi hoba aikei panteiko akümjan.

³⁷Kanei hato lembü chem ka akokbü ayingsi seneibü mühghaü sao anyikubü habü mütshuong ong leibuakei.

³⁸Hibü Demetria hoba hao yokabü kümbüyaübü shuong müt at to ngüh kisije, kho shanga matjemshang kia; haoen haoen khulimyotishi.

³⁹Lausikei kanei lubü ngüh sungbamang sühalonga, khokei nyiboubü pühkamshanga jemlabü.”

⁴⁰Aishanga ho lemenbü hanei tatbü kambü ngühaje künkei thusheda kia. Panglangbü ho shanga aikei khangshang akitei, hibü honei künei aikei aukabü akuenlabü.

⁴¹Khübü ngühei haoei kambü shuong lintikei.