Read Chang Naga YOUKOIKJAI 2 Bible Online

YOUKOIKJAI 2 - Chang Naga bible

YOUKOIKJAI 2

¹Ladang Pentekost chalou sühkei, haoen liko yoshaian kibü jiha

²mangde müh ka langh yaangbü che yeinak soubü tegü ditkei, hoba khoei haoen setan kibü chem pendou nyakkei.

³Wanlong tegü phatan longbü khübü kho haoen mütpem weko thüka janyin shaknyinko pakkei.

⁴Haoen pendou Soushou Saopobüei shenkei, hoba Soushouei sei kubü ka haoenei lubü ngühyemei laula khangkei.

⁵Khünei Jerusalema Jihudabü shuong hoba kaodaka phang pendou kabü mailema kaangbü shuong kiteikei.

⁶Ladang kho langh ditkei kheijinei mütshuong pendou yoshaikei hoba maangpang- yokei, aieilausi haoen mütpem wekoei jembü ngüha lauko ditkei.

⁷Haoen maangpangkei hoba laukei, “Tou lauko kibü shuong habü pendou ho Galilbü shuong ayingsi?

⁸Khülongaje senei ho laibü haoenei sen lulueibü ngühyema lauko ditda?

⁹Sen Parthiabü, Medebü, Elamaitbü, Mesopotamaia kabü mütshuong, Jihuda hoba Kapadokia, Ponta, hoba Asiabü,

¹⁰Frigia hoba Pamfilia, Ijep hoba Kurini Libia kaonyek, hoba Rom ka seman chühbü shuong,

¹¹Jihudabü hoba Jihuda songle to sepeibü shuong, Kretan hoba Arabbü shuong ki. Senei kho lai küman haoenei Mühghaüeibü maangpanglabü kümsilei shuong sen lulueibü ngüha lauko ditda?

¹²Ho ai tetlabü yingla?” dogo lauko haoen pendou maangpangkei hoba phenyembei.

¹³Ateije nyikuko laukei, “Haoen ih alebüei jakakei.”

¹⁴Lausikei youkoikjai anthük- che yoa Peter loenan ngüh yaangbüei haoen to laukei, “Jihudabü shuong hoba kan Jerusalema kibü shuong pendou, ngei kan shanga ngetilabü che kia. Kü to ditkai.

¹⁵Habü mütshuong ho kanei dambü tegü ajaketkei, aieilausi tou angh gü jih thüng ong yingkei;

¹⁶lausikei ho Joel thuseibüei lenbü kho loushatda:

¹⁷‘Mühghaüei lauda, thonbü chaloua, ngei khunak shousi pendou la kü soushou khüpan jinkulabü: kaneibü jayangshou hoba nouyangshou shuongei tetenlabü, kaneibü heshou shuongei mangsang haplabü, hoba kaneibü baushi shuongei mangh lilabü.

¹⁸Ngeibü sambü shuong thükto mangkei, bousu yaksa pendou la, khübü chaloua ngei soushou khüpan jinkulabü, hoba haoenei tetenlabü.

¹⁹Ngei thükaenei müha maangpanglabü, hoba phangaenei kaodaka tetsida, khei sii, wan hoba wankhük sangmei tegübü lenlabü.

²⁰Bunyuboueibü Chalou, yaangbü hoba soneikangbüChalou kho asühtoua, chanyu kho nakthühbüla, hoba litnyu kho sii la yeilabü.

²¹Hobaje kheijinei aoyouei Bunyubou nyena ngalaje haoen khümenlabü.’

²²“Israel mütshuong ditashi: Mühghaüei kan la hautikubou müt che, Nazaretbü Jisu shangabü ngei lauda. Mühghaüei hao danko kan yoa seikümseilei, maangpanglabü hoba tetsida juong küman lenbü kaneikei ngeakei.

²³Kho müt kho Mühghaüei haoei teten janenbü nyekchüha kan la khümbo kukei, hoba kanei hao peiseia thüngkei hoba küksithang müteibü ikei haitikei.

²⁴Lausikei Mühghaüei hao haibü khonku ka satentikei hoba hao haibü ka langkeitikei, aishanga haibüei khühlepan kilabü kho hao shanga athüklabü kümsilei ki.

²⁵Aishanga Dawideikei hao shangabü hai lauda, ‘Ngei ponpendou Bunyubou kü thedanga hapbei, aishanga ngo anyaakeitilabü lele hao ngeibü maenei ki.

²⁶Khoei ngeibü maang haiko kikei hoba ngeibü lishang olinkei; kho ong ayingko ngeibü maangkei maanglema kilabü.

²⁷Aishanga nyi kü soushou yemlam to kuan üplabü, ayingsi nyi kaibü Saopobü kho anyaülettilabü.

²⁸Nyi kü la langkeibü lamnyu ngetia; nyi ngo no yobü olinbüei shentilabü.’

²⁹“Jaisinasi shuong, ngei kan la boukim Dawid shangabü atoknokko lenla thükkei; hao haian khünkei hoba haoeibü hee kho tat sühko sen yoa kia.

³⁰Hao kho thuseibü che kiteikei hoba Mühghaüei hao to haoeibü thensilen ka haoeibü Choba setshang jeila müt che longtilabü dogo haüko thebülanbü lekei;

³¹hibü Dawidei kho hapan kiteikei hoba Messia langngailabü shanga hai lauko lenkei, ‘Hao yemkaodak la khümbo kuan üp’, hoba haoeibü mang la ‘nyaületbü ühüpti.’

³²Kho Mühghaüei langngaitibou Jisu kikei; hoba ho shangabü kün pendou aukabü ki.

³³Hibü ladang hao kho Mühghaü mae ikei tonlangkei, hoba Bou ka haoei theletbü Soushou Saopobü sungletkei, haoei kanei tou ai ditda hoba hapda kho Soushou khüpan jinkukei.

³⁴Aishanga khuthük to angbou kho Dawid aying. Haoei lauda, ‘Bunyubouei ngeibü Bunyubou to laukei,

³⁵Ngei kaibü dangbou shuong kaibü younakshang la ayeiti shongko, ngeibü maenei setashi.’

³⁶Hibü kanei maanga shubü pendou apyoan ho ngeashi khei kanei peiseia haitibou Jisu kho Bunyubou hoba Messia ham la yeitia.”

³⁷Ladang haoenei kho ditoukei haoen la maangpona meioukei, hoba haoenei Peter si lubü hangangbü shuong to laukei, “Jaisinasi shuong, künei ai kümla?”

³⁸Peterei laukei, “Maang- pon sepeiashi, hoba kan mütpem wekoei kaneibü shabü aptila shanga Jisu Khrista nyena baptiashi, hoba kanei Soushou Saopobü sungletlabü.

³⁹Theletbü kho kan shanga, hoba kaneibü shousi shuong shanga, hoba saabüa kibü shuong pendou, khei seneibü Bunyubou Mühghaüei ngabü phai shanga ki.”

⁴⁰Lubü ngüh juong yoan haoei haoen huiletkei, hoba, “Ho sükbü meten ho ka satenashi”, dogo lauko sukeijakei.

⁴¹Hibü haoei lenbü sungletbü shuong baptikukei, hoba khünyet müt hajar sem thüng haoeneibü lühbak to jinyokei.

⁴²Haoenei youkoikjai shuongeibü lembüa, hoba welaua khümbo kuyokei.

⁴³Müt pendou hatbü mokbüei shenkei, hoba maangpanglabü hoba sei juong youkoikjai shuong danko kümbei.

⁴⁴Mailembü shuong pendou chela yingkei hoba ajanjan pendou hambei.

⁴⁵Haoenei haoenei kibü peisilei yakan haoen yoa akialebü to liko janyokei.

⁴⁶Chalou angbüa haoenei lembü- chema atheko takshatkei, haoenei chema liko wentek shaknyin janyinkei hoba olin maangmai nyakshau liko shaukei.

⁴⁷Kho tegü ong haoenei Mühghaü nyen sangko hoba mütshuong yoa maangshikyoko loukei. Hobaje chaangboua Bunyubouei haoen yoto songlela lotbü mailembü shuong aei aei jinyokukei