Read Chang Naga YOUKOIKJAI 20 Bible Online

YOUKOIKJAI 20 - Chang Naga bible

YOUKOIKJAI 20

¹Ladang lemenbü thonkei, Paulei eikshuong ngala hautian thungeijangeikei. Haoei haoen to bangngüh lenan phaia Makedonia to haula shanga bangkei.

²Haoei khübü kaophei danjung haukei hoba thungeijangeibü ngüh juong lenan phaia hao Akhaia to haukei,

³khünei hao lit sem thüngkei. Hao Siria to meimeila dambo kitoua Jihudabü shuongei hao khulimbo huon che takkei, hibü haoei Makedonia danko ngaila janenkei.

⁴Pirha shou Beriabü Sopater, Thesalonika ka Aristarkha si Sekunda, Derbebü Gaia, Timoti hoba Asia kabü Tukhika si Trofima hao yoa haukei.

⁵Khübü shuong thedangto paiteikei hoba Troaa kün haiteikei.

⁶Künkei Tokai Ajinbü Wentek Lem phaia Filipi ka longa haukei, hoba chalou ngao danan phaia haoen kibü Troa to loukei; khünei kün chalou nyet thüngkei.

⁷Balea shaangbounyet, ladang kün wentek shaknyinla liko yoshaian kikei, Paulei haoen to songlenko kikei, aieilausi hao ngiet kho ngaila dambü phoan kikei, hoba haoei metuphang sühko laubü athon.

⁸Kün kaman kibü thangtet thükkaboua wanthung juong kikei;

⁹hoba Eutikha nyenan heshou müt che, kouloma setan, Paulei ngühlau aeibou süngsije nyeket shikotham ngakkei. Eutikha nyeket shian thangtet semboubü ka atetkei hoba haian phonenkei.

¹⁰Lausikei Paul yankei hoba hao lolo bamyolangkei. Haoei haoeibü ikei baman sungan haoen to laukei, “Lemenbü küpjemashi, hao lang kia.”

¹¹Hao tokei thükkabou thangtet to angan wentek shaknyinkei hoba shaukei. Haoei lang angeshongko haoen to joyoan phaia hao ngaikei.

¹²Haoenei nashoubou kho chemto sungngaian lang leian ngaikei hoba maangpon aeibou haksokei.

¹³Kheijinei kün thedangto longa hauan Aso to meimeikei, khünei Paul leiyetlabü dogo dambei; aieilausi haoei lolo youlam ong haula lamlekei.

¹⁴Haoei kün Melitaa haüyokei hoba khünei hao leiyetan Metilen to haukei.

¹⁵Kün khüka longa haukei hoba nyibounyet Khiotangkünga sühkei; nyibounyet Samo to dankei hoba kho phainyet Melita to loukei.

¹⁶Aishanga Asiaa jih üpla shanga Paulei longa Efesia kojung danla janenan kiteikei. Thükalonga Pentekostaje Jerusalema kiteila shanga hao panteiko kikei.

¹⁷Melita ka haoei Efesia to lashongbü jaishou shuong ngala hautikei.

¹⁸Haoen ladang lousühkei, haoei haoen to laukei, “Ngei Asiaa youei naksühlangbü ka jaüan jihsiphai pendoua ngo kan yoa

¹⁹sembüambüa, nyeksi angbüa hoba Jihudabüei huonbüyoubü danko kü thükto lotbü khonsak pendoua lai Bunyubou khangenko loukei kho kanei ngeakei.

²⁰Kanei ngeakei, ngei kan mailayaangla songlenjinei pühthea yingsikei chema yingsikei aikei asenetko lenkei.

²¹Ngei Jihudabü si Grikbü ham to Mühghaü thedanga maangpon sepeilabü hoba seneibü Bunyubou Jisu to mailemlabü shanga aukabü kuko lena.

²²Hobaje tou ngo, soushoua khühbü chenei, Jerusalem to hauda. Khünei kü la ai haüthüklaje ngei angekei.

²³Lausikei khühbü hoba khonkuei ngo haiyeida dogo sangnyu wekoa Soushou Saopobüei kü la lenkei.

²⁴Lausikei Mühghaü onou Ngühlang Maibü aukabü kuko phinthonla, ngei Bunyubou Jisu ka sungletkei, kho kümsilei hoba khangenbü wantilabü shanga ngei kü langkei aikei namsek tegü weko aki.

²⁵Touje, kan aoyou yoa ngei Sangle shanga phinthonko paia, khübü yoka cheei ongkei ngeibü thenyek ühüpmailabü dogo ngei ngekei.

²⁶Hibü kan aoeibü thu shangakei ngo onat aki dogo ngei tat kan to aukabü kuda.

²⁷“Aishanga kan to Mühghaüeibü lamthen khümbo ngetila ngei ladangkei asukatem.

²⁸Kan shanga hoba sanshuong, laobou yoka kan Soushou Saopobüei lombou la piena, haoen shanga maangsangashi; hao Shou ja- yangshou haibü danko haoei jekthetbü Mühghaü lashongeibü sanlombou shuong yingshi.

²⁹Ngei ngeakei, ngo ngaian phaia sekbülakbü sho shuong kan yoto lotlabü hoba sanshuong ajoutilabü;

³⁰hoba ngühmai yepeijaweko nongtian, eikshuong haoen phai leilangla shanga kan shuong yo ka müt at longlabü.

³¹Hibü, ngei po sem sühko change nangnak alauko nyeksi angko kan mütpem weko to songlenkei dogo damenan, pheieiko lomashi.

³²Tou thonla, Mühghaü hoba haoeibü onoubü ngühlang, laobou kan chingtilabü, hoba kan la, laobouei pienbü shuong pendou yokabü haülabü haptilabü ki, kho ngühlang la ngei kan khümbo nongkuda.

³³Ngei aoeibü chandinam, hon, ayingsi neisimeikei adühda.

³⁴Kaneikei ngeakei, ngeibü ik hoei ngo hoba kü yokabü shuong khangenkei.

³⁵Ngei ponpendou kan la lena, ho tegü haujembo kümbüleibü danko kanei hau akibü thuijan, hoba Bunyubou Jisuei laubü ngüh damenjan, aishanga haoei laukei, ‘Sungletbü toje kubüei bouje olinbü sungbada.’ ”

³⁶Haoei kho lauan phaia hao hoba hao yoa kibü pendou khüpetkei hoba welaukei.

³⁷Haoen aicheküman haapyokei; haoenei Paul aplepan sembung shepbei.

³⁸Haoen juongbou la, haoenei haoeibü thenyek nyibou ühüplabü dogo haoei ngühkung che laubüei maanga lamyokei. Kho phaia haoenei hao long to hangan haukei.