Read Chang Naga YOUKOIKJAI 21 Bible Online

YOUKOIKJAI 21 - Chang Naga bible

YOUKOIKJAI 21

¹Ladang kün bangkei, kün longa takshatan Kozi to, hoba nyibounyet Rhoda to hoba khüka Patara to dogo haukei.

²Khünei Foenika danko haubü long che haüyokei hoba künkei atan haukei.

³Künei Kupra limchühko loukei hoba kho nanaenei apyojung Siria to longa loukei; kün Tair to louphambei, aieilausi long kho khünei akletlabü kiteikei.

⁴Khünei eikshuong haüyokei hoba khünei chalou nyet setkei. Soushouei thungeiko haoenei Paul to Jerusalem to ohaula lendang lekei.

⁵Lausikei ladang chalouei sühkei kün wakou athakko haukei. Haoenei, shousi yaksi pendou yoan sangnyu adankhüm shongko kün hangkei. Künei yungkoa khüpetkei hoba welaukei.

⁶Kheijinei kün cheei che la bangmai kuyokei hoba kün long to atkei kheijinei haoen chem to ngaikei.

⁷Kün Tair ka athakko longa hauan phaia Tolomaia sühlangkei. Khünei künei jaisinasi shuong to salem lekei hoba haoen yoa chalou che thüngkei.

⁸Nyibounyet künei kho apyoan Kaisaria to loukei, kün songlendolenbou Filip chem to atkei, ao nyet yoa che, hoba hao yoa kikei.

⁹Haoeibü shou, tetenbü jongsak kibü medei müt lei kiteikei.

¹⁰Kün khünei chalou shijo settoua Jihuda ka Agaba nyenbü thuseibü müt che louyenkei.

¹¹Hao kün jungto louan Pauleibü shembenei sungkei. Haoei khoei hao lolo you si ik khühan laukei, “Soushou Saopobüei hai lauda: Ho shembeinei bunyu Jerusalema Jihudabüei hai khühlabü hoba haoenei hao Küksithang ik to kulabü.”

¹²Ladang künei kho ditkei, kün hoba khükabü mütshuong pendouei hao Jerusalem sühko ohaula sukeijakei.

¹³Kheijinei Paulei jongaikei, “Kan haap- yoko hoba kü maangpon nyatnyintiko ai kümda? Aishanga, ngoje khühlabü ong ayingko Bunyubou Jisu nyena Jerusalema haikulakei lamlean kia.”

¹⁴Hao asuajaensije künei, “Bunyubou maang yingshi” dogo ong lauan nangkei.

¹⁵Khübü chalou phaia kün lamlekei hoba Jerusalem to wakou khangkei.

¹⁶Kaisaria kakei eikshuong at kün yoa haukei. Haoenei kün la Mason nyenbü Kuprabü kün sühtila kibou leibakei; hao shaangbou eik yokabü.

¹⁷Ladang künei Jerusalem sühkei, jaisinasi shuongei kün aeibou maang shikko sungletkei.

¹⁸Nyibounyet Paul yoa Jakob chem to haukei, hoba jaishou shuong pendou kiteikei.

¹⁹Haoen to salem lean phaia, haoeibü khangenbü danko Mühghaüei Küksithang yoa kümbüleibü pendou thenan lenkei.

²⁰Ladang haoenei kho ditkei, haoenei Mühghaü nyen sangkei hoba hao to laukei, “Jaisina, Jihudabü yoa mailembü hajar lajuche ki hoba haoen pendou Ngühkhüma maangdakakei dogo nyi hapda.

²¹Küksithang kaodaka Jihudabü pendou la haoeibü shousi kipan üpla ayingsi Jihudabü song ajungeiko Mosa ka bangla shanga nyi lenko paida dogo ka nyen haoen junga laukua.

²²Kholonga ai kümla? Haoenei no longeiakei dogo ditlabü haang.

²³Hibü künei ai lenlaje kho kümashi. Kün yoa theletlanletbü müt lei kia.

²⁴Haoen ka yoto leian haushi, hoba haoen yoa saüenbü leashi. Haoen khushubü mu nyi atkuashi, kholongaje müt pendouei ka shanga mütshuongei laueibü kho amlang, lausikei nyi mangkei ngühkhüm kho tükde ong jungeida dogo ngelabü.

²⁵Küksithang mailembü shuong jungtoje silip jabü shausiyung ayingsi sii ayingsi nyatettibü shausiyung hoba asangalanbü shanga maangsangashi dogo künei yeibü kutiko le doa.”

²⁶Nyibounyet Paulei haoen leikei hoba haoen yoa liko saüenkei. Hao lembü chem to atkei hoba saüenbü jihsiphai penlabü hoba laonyet haoen mütpem weko shanga lembü kulabü kho ngetikei.

²⁷Ladang chalou nyet kho wanla nyangkei, Asia kabü Jihudabü shuongei hao lembüchema hapbei. Haoenei mütshuong pendou pangyo sakyotikei, hoba haoenei Paul lapan

²⁸hai ngekkei, “Israelbü shuong thuiashi! Ho mütei müt pendou la, kaoen pendoua sen mütli hoba Mosa ngühkhüm khulimbo lenda; hoba lembüchem to Grikbü to liko leiyeda hoba ho saopobü kaoen shedti shatia.”

²⁹Aishanga thedang to haoenei sangnyu khünei Efesiabü Trofima hao yoa hapa, hoba Paulei haoen lembüchem to leibakei dogo haoenei dambei.

³⁰Sangnyu khümbo saknyinko la pangyokei hoba mütshuong pendou liko laangyokei. Haoenei Paul lapbei hoba lembüchem ka senlangkei, hoba khoyam kou khinkei.

³¹Haoenei hao haitila komeiko kijinei, Jerusalem khümbo pühnyinakei dogo Rom sepai san chenei hajar thükkabou jungto ngühlang loukei.

³²Haoei khoyam sepai shuong hoba saongao thükkabou shuong leian jungan shuong yoto atkei. Ladang haoenei hajar thükkabou si sepai shuong hapbei, haoenei Paul to ngümbü thakkei.

³³Kheijinei hajar thükkabou sühlangan hao to jungkei hoba hao yangmen penyiei phenla shanga ngühkhüm kukei. Hao ao hoba ai kümbei dogo haoei haoen ka phekei.

³⁴Shuong yo khünei atei phang- che hoba atei phangche dogo ngekkei. Lemenbüei tükdebü kho lapenla athükko, haoei hao lapheishon to leilangla shanga ngühkhüm kukei.

³⁵Mütshuong sekbülakbü ka chung to Paul sepai shuongei tonkei.

³⁶Aishanga püh pendou “Hao haitiashi” dogo ngekko sembei.

³⁷Paul lapheishon to leiyetlamto haoei hajar thükkabou to laukei, “Ngei ka to aiche lenla thükasao?” Haoei jongaikei, “Nyi Grik ngekei lao?

³⁸Chalou tuisho dana, lapangyotian, kokshoua müt haitibü dan müt hajar lei lamang to leilangbou Ijepbü kho no aying si?”

³⁹Paulei laukei, “Ngo Kilikiaa kongnyu sangnyu che kabü mütli che, Tarsus müt, Jihudabü che ki. Mütshuong to ngüh lenla kü la sakkubü dogo ngei ka to suda.”

⁴⁰Haoei hao la sakkukei, hoba Paulei chung jabüa loan mütshuong haoeibü ikei küpjemtikei. Ladang pendou sangsembei haoei Ibri ngühei laukei: