Read Chang Naga YOUKOIKJAI 22 Bible Online

YOUKOIKJAI 22 - Chang Naga bible

YOUKOIKJAI 22

¹“Jaisinasi shuong hoba bousijaisi shuong, ngei kan thedanga ngo tangbü lenbü ho ditashi.”

²Ladang haoenei haoei Ibri ngühyema lauko ditkei haoen sangsemshangbou yeikei. Haoei laukei,

³“Ngo Jihudabü, Kilikiaa Tarsasa bukbü ki, lausikei seneibü pisibou ngühkhüm kaangbüei sakkubü tegü Mühghaü shanga aeibou maangdakko ho sangyanga chingenkei.

⁴Lamnyu phai sembü shuong haibüa sühko ngei shieikoekei; ngei bousu yaksa pendou la yangmen jinkuan thüngdang to jinkei,

⁵maimaitham thükkabou ungshedbou hoba jaishou kambü shuongei kü shanga aukabü kuenlabü. Damaskaa kibü jaisina Jihudabü jungto dobü le mangkei ngei haoen ka sungletkei, hoba khünei kibü dan Jerusalem to yangmenei khühbaan shieikoela shanga meimeikei.

⁶“Ladang ngo lama Damaska sühla nyangko hauko kikei, mangde chajih aoa müh ka ngesakbü yaangbü che lotan ngo kaijembo haukei.

⁷Ngo kao to atkei, hoba ngüh cheei kü to hai lauko ditkei, ‘Saul, Saul, aila nyi ngo shieikoeda?’

⁸Ngei jongaikei, ‘No ao Bunyubou?’ Haoei kü to laukei, ‘Ngo nyi shieikoebü Nazaretbü Jisu.’

⁹Kü yoa kibü shuongei ngesakbü kho hapbei, lausikei haoenei kü to joyobü ngüh khoje adit.

¹⁰Ngei laukei, ‘Ngei ai kümla, Bunyubou?’ Bunyubouei kü to laukei, ‘Laksepashi, Damaska to atashi, hoba khünei ka la ai kümtila pienan phokukei kho pendou ka to lenlabü.’

¹¹Ngesakbü sonei ngei ühüpbo apbü danko, kü yoa kibü shuongei ngo jenkei hoba Damaska to leian atkei.

¹²“Müt che Anania nyenan, ngühkhümei sakkubü tegü mailema maangtakbü, hoba khünei kibü Jihudabü pendouei aukabü kuenbü müt,

¹³kü jungto loukei. Hao kü junga lokei hoba laukei, ‘Jaisina Saul, kaibü nyek khitngaiashi.’ Khoyam ngeibü nyek khitkei hoba hao to chüh- angtikei.

¹⁴Haoei laukei, ‘Seneibü pisibou Mühghaüei hao maangangbü ngela shanga, Saopobü Che kho hapla hoba haoeibü ngüh tükdebü kho ditla shanga pienkei.

¹⁵Aieilausi nyi ai hapa hoba dida kho shanga mütshuong pendou thedanga hao shanga no aukabü kilabü.

¹⁶Hibü no aila phaida? Laksepashi hoba hao nyena ngaashi; baptiashi hoba kaibü shabü sakan apashi.’

¹⁷“Ladang ngo Jerusalem to ngaikei hoba lembüchema welauko kikei ngo yemto hauko nyeket shikei,

¹⁸hoba haoei kü to hai lauko hapbei, ‘Panteiashi hoba tongde Jerusalem apyoashi, aieilausi haoenei kü shangabü kaibü aukabü asungletlabü.’

¹⁹Ngei laukei, ‘Bunyubou, sinagog ka sinagog to shonko mütshuong lapan khühbou hoba ka to mailembü shuong ngümeibou kho ngo yingkei dogo haoenei ngo maisho ngekei;

²⁰hoba ladang kaibü aukabou Stefen sii koukei khüneikei ngo nyangko loan kho tükde dogo aukabü lea hoba hao haitibü shuongeibü neisimei lombo kikei.’

²¹Haoei kü to laukei, ‘Hauteiashi, aishanga ngei no Küksithang to saako hautilabü.’ ”

²²Haoei kho ngüh alaushongko haoenei hao to ditkukei. Kho phaiaje haoenei ngekkei, “Ho mütje kaodak ka bangtisapashi! Kheibü mütje lang kila amukei.”

²³Ladang haoenei haoeneibü neisimei tekan angtiko hoba kuito thamngu phinan angtiko ngekyokei,

²⁴hajar thükkabouei hao lapheishon to leiyetan, aila hao khulimbo ngekyodaje kho lapenla shanga hao to semeiko ngüh phetila shanga ngühkhüm kukei.

²⁵Ladang haoenei semeila shanga hao khühkei Paulei nyangko loan kibü saongao thükkabou to laukei, “Nyi hoba kaibü eikei Rom mütli hoba shedbü akibü che semeila thükkei lo?”

²⁶Ladang haoei kho ditkei, saongao thükkabou hauan hajar thükkabou la ngühlang kuko laukei, “Nyi ai kümla dambo ki? Ho müt Rom mütli che yingkei.”

²⁷Hajar thükkabou kho loukei hoba hao to laukei, “Kü to lenshi, no Rom mütli che lo?” Haoei laukei, “Haü.”

²⁸Hajar thükkabouei jongaikei, “Ho mütli jekthetla ngeije nam juongnyu ada.” Paulei laukei, “Lausikei ngoje bukbü mütli.”

²⁹Hao to semla lamlean kibü shuong hao jungka khoyam phai sukkei; hajar thükkabou mangkei Paul Rom mütli dogo ngean haoei hao laptibü shanga hatkei.

³⁰Nyibounyet, haoei Jihudabüei Paul la aila shedbü kudaje kho lapenmang sühbü ka hao litikei hoba thükkabou ungshedbou shuong si thükkabou kambü shuong pendou yoshaila ngühkhüm kukei. Hobaje haoei hao leibaan haoen thedanga phokukei.