Read Chang Naga YOUKOIKJAI 23 Bible Online

YOUKOIKJAI 23 - Chang Naga bible

YOUKOIKJAI 23

¹Paulei kambü shuong to nyek theko chühan laukei, “Jaisinasi shuong, tat sühko ngo Mühghaü thedanga sensimaang tangbüei ong kü langkei kijung loua.”

²Thükkabou ungshedbou Ananiaei hao nyangko loan kibü shuong to sembung to ipla ngühkhüm kukei.

³Kheijinei Paulei hao to laukei, “No thupaibü kümthang, Mühghaüei ka to ngümlabü! Nyi ngühkhüm ka matjembo setakei, hoba nyi kü to ngümla ngühkhüm kuko nyi lolo ngühkhüm leiluda si?”

⁴Khünei nyangko loan kibü shuongei laukei, “Nyi Mühghaüeibü thükkabou ungshedbou nyikuda lo?”

⁵Paulei laukei, “Jaisinasi shuong, ngei hao thükkabou ungshedbou dogo ange; aishanga Laishibaei lenda, ‘Nyi kaibü mütshuong leiyeibou che amaibü alaueilabü.’”

⁶Ladang Paulei tan che Sadukibü hoba tan che Farisibü dogo shenkei, haoei kambü to ngekko laukei, “Jaisinasi shuong, ngo Farisibü hoba Farisibü shou che ki. Haibü ka langngailabü mailem shanga ngo tat ho matjembüa kia.”

⁷Haoei kho laubüsi Farisibü tan si Saduki tan yoa oyo khangkei, hoba kambü kho penyila sakletan apbei.

⁸Aishanga Sadukibü shuongei langngaibü, khuthük hangangbü ayingsi soushou ai aki dogo lauda lausikei Farisibüei khübü pendou kia dogo sungletda.

⁹Aeibou phangyokei hoba Farisi aedang kabü Ngühkhüm lenbou shuong at loenkei hoba khau angko laukei, “Ho müt to künei ai shedbü ühüpenda. Soushou che ayingsi khuthük hangangbü cheei hao to joyoan kia tegükei ai?”

¹⁰Aishanga oyobü aei kaangbou hausije, Paul netla yeiko jitnyinan aplabü dogo daman hajar thükkabou kho hatkei. Haoei sepai shuong to yanan hao haoen yo ka lapan lapheishon to sungbala ngühkhüm kukei.

¹¹Khüyou Bunyubou Paul junga lokei hoba laukei, “Maang kaangashi! Nyi Jerusalema kü shanga aukabü lebü tegü Rom akei nyi aukabü künlabü.”

¹²Ladang lang ngekei Jihudabü shuong dangan huon takkei. Haoenei hao ühaiti shongko shaukei ashaulabü yungkei ayunglabü dogo theyolanyokei.

¹³Kokshoua huonbü shuong kho haoen saonyi to aeian kiteikei.

¹⁴Haoen ungshedbou hoba jaishou shuong jungto haukei hoba laukei, “Künei Paul ühaiti shongko ai ashaula shanga kün lolo theyolanyoakei.

¹⁵Hibü touje kan hoba Kambüei, khei haoei kanei haoeibü thu chongchingko phanenla kümda dogo daman hao kan jungto naleibatila hajar thükkabou jungto ngühlang künjan; hao nyangko alousühtoua haitila shanga kün lamleakei.”

¹⁶Lausikei Pauleibü noueibü shouei haoenei thobü kho ditoukei hoba hauan lapheishon to atkei hoba Paul la lenkei.

¹⁷Paulei saongao thükkabou yoa che ngakei hoba lenkei, “Nashoubou ho hajar thükkabou jungto leian hauashi; haoei hao to aiche lenlabü kia.”

¹⁸Hibü hao hajar thükkabou jungto leian hauan lenkei, “Thüngdanga kibou, Paulei ngo ngakei hoba nashoubou kho ka jungto leibala shanga phekei. Haoei ka to aiche lenlabü kia.”

¹⁹Hajar thükkabouei hao nongbü kaoen to leilangkei, hoba hao to phekei, “Nyi kü to lenlabü kho ai?”

²⁰Haoei laukei, “Jihudabü shuongei ngiet Paul Kambü to hai haoeibü thu aei shangashatko phela tegü ong leibala shanga ka ka phela thangjambo yeia.

²¹Nokei haoen la tesuletti, aieilausi haoen müt saonyito aeianei thola kümda. Haoenei hao ühaiti shongko shaukei ashaulabü yungkei ayunglabü dogo theyolanyoakei; hoba toukei haoen ka ka sakkubü hapla haiyeiko lamleakei.”

²²Hajar thükkabouei nashoubou kho, haoei kho hao la lena dogo aolakei alenla shanga ngühkhüm kuan ngaitikei.

²³Kho phaia haoei saongao thükkabou yoa müt nyi ngaan laukei, “Tao angh güa Kaisaria to haula sepai saoan, hoba kolia setbü shuong anjinlei hoba aubu jungbü müt saoan lamleashi;

²⁴Paul setlakei koli lamlekushi hoba hao governor Felix jungto maisho leian haushi.”

²⁵Haoei le che hai dokei:

²⁶“Klaudia Lisia ka Yaangenbou Felix jungto: Salem.

²⁷Ho müt ho Jihudabü shuongei lapbei hoba haoenei haitilabü lele kikei. Hao Rom mütli che dogo ngei ditletkei, khoei ngo sepai shuong yoa hauan hao püetkei.

²⁸Haoenei hao la aishanga shedbü kudaje ngei kho ngemang sühkei; khoei ngei hao haoeneibü Kambü thükkabou to sungbakei.

²⁹haoeneibü ngühkhüm shangabü pheyobü laüa hao la shedbü kukei dogo ngei chühenkei, lausikei hao haitilabü ayingsi thüngdang to jinla muko shedbü akitei.

³⁰Aieilausi ho müt shanga huonbü ditbü ka ngei khoyam ka jungto hautikuda, hoba hao shieibü dan tokei haoeibü shedbü kho ka thedanga lenyola lenan hautida.”

³¹Hibü sepai shuongei haoen la ngühkhüm kubü tegü Paul leilangkei hoba nangnak hao Antripatri sühko leian haukei.

³²Nyibounyet kolia setbü shuong hao yoa haula phoyoan hao lapheishon to longeikei.

³³Khübüei Kaisaria sühkei, governor la le kho kukei hoba Paul hao thedanga apyokukei.

³⁴Ladang haoei le kho wekei, hao laobou kaonyek kabü dogo phekei, hoba hao Kilikia ka dogo ditletkei.

³⁵Haoei laukei, “Ka la shedbü kubü dankei lousühan ngei kaka ditlabü;” hoba hao lombü yoan Herodeibü Choba Chema photeila ngühkhüm kukei.