Read Chang Naga YOUKOIKJAI 24 Bible Online

YOUKOIKJAI 24 - Chang Naga bible

YOUKOIKJAI 24

¹Chalou ngao phaia thükkabou ungshedbou Anania, jaishou at yoa Tertula nyenbü matjembou che yoan loukei, hoba haoenei governor Felix thedanga Paul khulimbo ngüh künkei.

²Ladang Tertula ngakei, haoei Paul attiko hai lau khangkei, “Yaangenbou, kün mütli hainyu haksoa kibü hoba kümetbü yaang longbü kho no danko ki.

³Ho künei hangsilam pendoua aeibou maangshikko sungletda.

⁴Lausikei kaibü jih aei alekula shanga, kün to tuisho ditan chühkula ngei ka to sudajada.

⁵Künei ho müt kipjim naangjimtibou che dogo lapena; haoei kaodak pendoua Jihudabü shuongyo pendoua lemen longtida hoba hao Nazaren tan yoa khuleibou che ki.

⁶Haoei lembüchem mangkei shedti shatila haujembei, hoba künei hao lapbei. Hobaje küneibü ngühkhüma kibü haangei mat jemla haujembei,

⁷lausikei hajar thükkabou Lisia loukei hoba küneibü ik ka tukosekko langkei.

⁸Haoeibü shedbü lapbü shuong ka thedangto loula haoei ngühkhüm kukei. Nyi hao ka pheko lamalonga künei hao khulimbo aukabü sungbabü pendou nyi lolo lapenlabü.”

⁹Jihudabü shuongeikei khübü aukabü kho tükde dogo lauko hao attibü shuong to yingkuan shedbü kukei.

¹⁰Ladang governorei hao la lautila ikei sheko jih kukei, Paulei jongaikei, “Ho phangshuong shanga nyi ngühmaia po juong songdakkei dogo ngean ngei lolo ngo tangbü lenla olinda.

¹¹Ngo Jerusalem to lemla angbü phaia tatei chalou anthüknyi to üaikei dogo nyi shuokenla thükkei.

¹²Lembüchema yingasikei, sinagoga yingasikei, hoba sangnyua yingasikei ngo aotokei oyophet- yoko ayingsi shuong pühnyintiko haoenei ühüp.

¹³Haoenei kü khu limbo ai shedbü sungabada kho ka la aukabü kula athükkei.

¹⁴Lausikei ngühkhüma kibü ngüh shuong tegü, hoba thuseibü lea doan kibü haangei, khübü pendou mailembo, laobou to haoenei tan dogo lauda kho Lamnyu haangei ngei küneibü pisibou Mühghaü lemda, khoje ngei ka to theletda.

¹⁵“Aieilausi haoenei tegütham ngei saopobü si asaopobü ham langngailabü dogo mailemda.

¹⁶Khoei ngeikei Mühghaü hoba müt thedanga jih pendoua sensimaang tangshaitham kila maibouthamei haujemda.

¹⁷Po shijo auan phaia, kü mütli shalebü la thuibü künbala

¹⁸ngo lembüchema saüenbü letoua haoenei ngo hapbei. Khonei noknyüh akitei hoba pühnyinbükei akitei.

¹⁹Lausikei Asia ka Jihudabü at yoan kiteikei; haoenei kü khu limbo ngühsidei kialonga, haoen hato ka thedangto louan laujan kikei.

²⁰Ayingsi ngo haoeneibü Kambü thedanga haoen yoa loan, ‘Haibü ka langngaibü shangabüa ngo tat kan thedanga matjembüa loakei,’ dogo ngühkung che ngekbü to liman haoenei ngeibü shedbü aiche lapenan kisije haoen hanei kibü danei lenashi.”

²²Lausikei Lamnyu shangabü Felixei shangashatko ngean kisije haoei laukei, “Ladang thükkabou khuleibü Lisia loulaje kheijinei ngei kaneibü mat jemlabü.” Kho phaia haoei Kambü kho lintikei.

²³Hobaje haoei saongao thükkabou to hao thüngdanga phojan, lausikei hao maang letijan, hoba haoeibü jenabou aokei hao khangenla teshilet dogo sakkukei.

²⁴Chalou shijo phaia, Felix haoyak Jihuda sao Drusila yoa loukei; haoei Paul ngalikei, hoba hao la Jisu Khrista to mailembü shangabü lautikei.

²⁵Haoei sao- pobü, jembü lolo thepetbü hoba loulabü matjembü shangabü laujinei, Felix aeibou hatenkei hoba jongaikei, “Tou shangaje no ngaila thükkei; ladang ngo jih haplaje ngei no ngalabü.”

²⁶Paulei hao la nam shangkulabü dogo maanglembo kikei. Kho aoa haoei tokei tokei hao ngala hautikei hoba hao to joyokei.

²⁷Po nyi thonan phaia Felix kho Porkhia Festaei jeikei. Jihudabü olintila shanga Felixei Paul thüngdanga phoyokei.