Read Chang Naga YOUKOIKJAI 25 Bible Online

YOUKOIKJAI 25 - Chang Naga bible

YOUKOIKJAI 25

¹Festa kaonyek to louan chalou sem phaia Kaisaria ka Jerusalem to angkei.

²Thükkabou ungshedbou hoba Jihudabü khuleibü shuongei Paul khulimbo ngühlang künkei,

³hoba hao to haoen to onouko, Paul Jerusalem to leibala sukeijakei; aieilausi hao haitila lama thola lamleko kikei.

⁴Paul Kaisariaa lombü phanga phoakei, hoba haokei khüto enyu haula kia, dogo Festaei jongaikei.

⁵Haoei Laukei, “Kaneibü leiyeibü shuong kü yoto kai, hoba kho müt to shedbü aiche kialonga, haoenei hao khulimbo shedbü kutiashi.”

⁶Haoen yoa chalou set ayingsi an to aei athüngko hao Kaisaria to yankei, hoba nyibounyet hao matjembü setshanga setkei hoba Paul leibala ngühkhüm kukei.

⁷Ladang hao sühlangkei, Jerusalem ka loubü Jihudabü shuongei hao kailepbei, hoba hao khulimbo attibü kaangbü juong sungbakei, laobou shanga tükdebü aukabü kulaje haoenei athük.

⁸Paulei hao janbüa laukei, “Ngei Jihudabü ngühkhüm khulimbo yingasikei, ayingsi lembüchem khulimbo, ayingsi Kaisar khulimbo yingasikei ai shedbükei ashonkei.”

⁹Festaei Jihudabü lemsetimang sühko Paul to jongaikei, “Nyi Jerusalem to angan kü thedanga habü mat jemla maang angdalao?”

¹⁰Paulei laukei, “Ngo Kaisar matjembü setshanga loakei, hoba ngo hanei jemlabou ki. Ngei Jihudabü to ai shedbü aküm, kho nyi maisho ngeakei.

¹¹Ngei aiche shedbü kümda longa hoba haila muko denche kümshedtian kialonga, ngei khüka satenla apheda; lausikei habü mütshuongei kü khu limbo attibü sungbabü ngüha shedbü akilonga, aoeikei ngo haoen la kuan apla athük. Ngei Kaisar la jemtila pheda.”

¹²Kheijinei hao meitangbou shuong to joyoan phaia Festaei jongaikei, “Nyi Kaisar la jemtilabü laukei; Kaisar sühko no haulabü.”

¹³Chalou tuisho kaangan phaia Agripa Choba si Bernika Karsaria to loukei hoba Festa la olinbü salem kukei.

¹⁴Haoen khünei tuisho kitoua, Festaei Choba thedangto Pauleibü ngüh hai lauko sungbakei, “Hanei Felixei müt che thüngan phoan satakei.

¹⁵Ladang ngo Jerusalem to haukei, thükkabou ungshedbou hoba Jihudabü jaishou shuongei hao shangabü ngúhlang kü thedangto sungbakei, hoba hao attiko matjem kula shanga kü to phekei.

¹⁶Lausikei matbou si shedbü kubou shuong the thenthen üattiyo shongko hoba matbouei hao lolo janbü ngüh laula jihsiphai maibü along shongko müt che khümbo kuan apla Rombü songa aki dogo ngei haoen to jongaikei.

¹⁷Khola haoen hanei yoshaikei, hoba aphaiko nyibounyet ngo matjemshanga setkei hoba müt kho leibala ngühkhüm kukei.

¹⁸Ladang attibü shuong loenkei, haoenei hao la ngeibü dambü tegü amaibü shedbü kuko hao ayukti.

¹⁹Lausikei haoenei haoeneibü songle hoba Paulei lang kia dogo aukabü kuenbü müt che, Jisu, haibü shanga hao to oyobüa ong jimbei.

²⁰Khübü ngüh lapenla ngo maang phenyeman apbei hoba hao Jerusalem to hauan kho mat jemmang sühdalaoje dogo phekei.

²¹Lausikei ladang Paulei thükkabou Chobaei janenbüa leko mat jemmeila shanga nangteila phekei, ngei hao Kaisar jungto ohauti shongko lombü phanga photeila ngühkhüm kukei.”

²²Agripaei Festa to laukei, “Ngei bouje hao ka ditmang sühda.” Festaei jongaikei, “Ngiet nyi haoei laubü ditlabü.”

²³Hibü nyibounyet Agripa si Bernika, soneikangko lamlean, hajar thükkabou shuong si sangnyu khulei laanglei shuong yoa püh shaibü chem to atkei, hoba Festa ngühkhümei Paul leibakei.

²⁴Festaei laukei, “Agripa Choba, hoba hanei kün yoa shaibü shuong pendou, Jihudabü püh pendouei Jerusalema hoba haneikei haoje lang kila amukei dogo ngekyoko kü to laukubou müt kho ho ki.

²⁵Kü aedangkaje, haoei haila muko aikei kuan aki dogo lapena, ladang haoei lolo Thükkabou Choba junga jemlabü dogo laukei, ngei hao hautila shanga janenkei.

²⁶Ngei Choba jungto hao shanga dolabü aikei chongchingko aki. Khoei ngei hao kan thedangto leibua, hoba ngei aicheje dolabü lele kongnyuleko ka thedangto leibada, O Agripa Choba.

²⁷Aishanga thüngbü müt che, hao la shedbü kubü aikei alenko hautikula khoje kü shanga aikei ngühchung akiko damda.”