Read Chang Naga YOUKOIKJAI 26 Bible Online

YOUKOIKJAI 26 - Chang Naga bible

YOUKOIKJAI 26

¹Agripaei Paul to laukei, “Nyi ka shanga lenla sakkuda.” Kheijinei Paulei haoeibü ik tuokan hao janbü ngüh laula khangkei.

²“O Agripa Choba, Jihudabü shuongei kü khu limbo attiko sungbabü pendou shanga ngei ngo janbü at ka thedanga lenlabü ho ngo thu maibü dogo weeida.

³Aieilausi kongnyuleko noje Jihudabü songsido hoba lemenbü hangsilam pendou ngebüa penetsouetnyu yingkei. Hibü kü to natenko ditkushi dogo ngei ka to sudajada.

⁴Kü langkei khangbü ka thama ngo jembü mütli yoa hoba jerusalema kijung loukei dogo Jihudabü pendouei ngeakei.

⁵Haoenei ngo shangieda ngeakei; ngo küneibü songle yoa kaangboutham che tegü, Farisi langkei kijung loukei, haoenei ong maangangsije kho haoenei aukabü kula thükakei.

⁶Hobaje Mühghaüei küneibü pisibou to theletbü,

⁷laobou theletbü, kün phang anthüknyiei haoeneibü maangdakbü pendouei chalou nangnak sünga kho hapenla maanglem phoan lembei, kho haoei haüthüktilabü dogo ngei maanglembü ka ngo tou matjemshanga loan ki. Ho kho maanglem shangabüa, O Choba, kü la shedbü kuda, hoba kü la shedbü kubü shuong kho Jihudabü ki.

⁸Aila kan Jihudabü shuong yoa Mühghaüei haibü langngeitida laubü kho mai- alemenlabü la yeitida?

⁹Ngeikei Nazaretbü Jisu nyen khulimbo kümsilei juongnyu kümjan dogo dambei.

¹⁰Ngei Jerusalema khei kümbei. Thükkabou ungshedbou shuong ka hau hiletan ngei Mühghaü mütshuong juong thüngdang to jinkei. Ladang haoen la haitilabü lele shedbü kukei kheijinei ngei haoen khulimbo ik tuokkei.

¹¹Hanghangleko, sinagoga haoen shieikoeko haoen la Mühghaü khükeiuokeitila ngei haujembei. Ngo haoen to danan maangpokjineije küksithang sangnyu danakei ngei haoen shieinangeia.

¹²“Kho kümsilei shanga ngo thükkabou ungshedbou shuong ka hau hoba ngühkhüm hiletan Damaska to hauko kikei.

¹³Hobaje chajihboua, O Choba, ngo lama paiko kijinei, chanyu to ngesakbou ngesakbü che ngei müh ka ngo hoba kü yoa yangbü shuong kaijembo hauan hapbei.

¹⁴Kün pendou kao to atkei, hoba ngei kü to Ibri ngühyema, ‘Saul, Saul, nyi aila ngo shieikoeda?’ dogo ngüh cheei lauko ditkei. ‘Julo to keingaibüje jembü to ong akda.’

¹⁵Ngei laukei, ‘Bunyubou, no ao?’ Bunyubouei laukei, ‘Ngo nyi shieikoebou Jisu.

¹⁶Lausikei pienashi, hoba no lolo loenashi. Ngei no ngeibü khangenbou la pienla shanga ngo ka la longan lenkei. Nyi kü shangabü ai hapa, hoba ngei ka la toukei ai tang khittilabü ki khonei nyi aukabü künlabü.

¹⁷Ngei no hautilabü mütshuong hoba Küksithang ka ngei no püetlabü.

¹⁸Kü to kibü haoeneibü mailemei haoenei shabü ap kubü hoba Mühghaü mütli la yeian kibü dan yoa kaoen che hapenlabü lele, haoen nakthühbü ka ngesakbü to hoba Satan hau ka Mühghaü jungto sepeitila shanga nyi haoeneibü nyek khittilabü ki.

¹⁹“Hibü khoei, O Agripa Choba, ngei khuthükbü mangsang to ngüha aleko aki,

²⁰lausikei Damaska si Jerusalem ka shaang khangan, kho phaia Jihuda kaonyek pendoua hoba khüka ong Küksithanga dogo, haoen maangpon sepeijan hoba Mühghaü jungto sepeijan, hoba maangpon sepeibü thüng kümjanleijan dogo ngei ngekletkei.

²¹Khoei Jihudabüei ngo lembüchema lapbei hoba ngo haitila haujembei.

²²Lausikei Mühghaüei kü to thuikei, hoba Messia kho khonkujan, hoba haibü ka langngaibü shaangbou yingsije, haoei Jihudabü si Küksithang la kho ngesakbü ngekletkulabü shanga thuseibü shuong si Mosaei lenbü loushedlabü dogo hanbü yaangbü pendou to aukabü künbü to liman lubüje ai alauko ngo tat sühko hanei kia.”

²⁴Paulei hao janbü ngüh hai lauko kijinei Festaei ngüh yaangbüei laukei, “Paul, no langet angbü. Nyi yongko ngebü ka no langet angtida.”

²⁵Paulei Festa to laukei, “Yaangenbou, ngo langet üangda; ngei ka to ai lenda kho ngühmai hoba maiabü.

²⁶Chobaei habü thu shanga ngeakei, hoba hao thedanga ngei kaangko laula thükakei; aishanga ngei ngeakei habü ngühlang che ongkei haoei angeko aki, aieilausi ho popanoba kümbü aying.

²⁷O Agripa Choba, nyi thuseibü ngüh to mailemda lao? Nyi mailemda dogo ngei ngeakei.”

²⁸Agripaei Paul to laukei, “Nyi tongde ngo khristan yeitila suletla haujemda!”

²⁹Paulei jongaikei, “Tongde yingasikei maangyangsho yingsikei no ong aying lausikei tat kü ngüh ditko kibü shuong pendou, ho yangmen hato limanje, ngo tegü ong yeila shanga ngei Mühghaü to welauda.”

³⁰Choba, governor hoba Bernika hoba setan kibü shuong loenkei,

³¹hoba haoen kukan phaia haoen haoen lauyokei, “Ho mütei hailabü ayingsi thüngdang to jinlabü lele amaibü kümbo aki.”

³²Agripaei Festa to laukei, “Ho mütei Kaisar junga lauetla akün, tegüje hao litian kikhoulabü.”