Read Chang Naga YOUKOIKJAI 27 Bible Online

YOUKOIKJAI 27 - Chang Naga bible

YOUKOIKJAI 27

¹Ladang künei Itali ka longa haula janenkei, Agusta sepai san chenei saongao thükkabou, Julia nyenbü ik to Paul hoba lubü thüngbü shuong at yoan kuan apbei.

²Kün Asia yungkoa thakko thakko haulabü long chenei Adramitia ka long to angkei hoba yungnyu to meimeikei. Thesalonika ka Makedoniabü Aristaka kei kün yoa kikei.

³Nyibounyet kün Sidona thakkei, hoba Juliaei Paul to aeibou sanouko, thangbou shuong jungto haula hoba hao thounoutila sakkuko jungeikei.

⁴Kün khüka meimeikei hoba Kupra yungko yetko likei aieilausi yeilam khüpeian kün ae soukei.

⁵Kho phaia kün Kilikia si Pamfilia yungnyu peithetjung haukei, hoba Lukiaa Mera sühkei.

⁶Khünei saongao thükkabouei Alexandria ka Itali to haubü long che hapbei hoba haoei kün khüto leiyetkei.

⁷Chalou juong kün maangyangsho haukei, hoba ushaleko Naida nyangko sühlangkei. Yei kho athaksije, kün Kreta yungko yetko Salmone to haukei.

⁸Kün yungko sünga aeibou khonsakko haukei, hoba Lasia sangnyu nyangko kibü Longthakshang Maibü dogo nyenbü kaoen che sühlangkei.

⁹Ladang chalou lounyu dankei hoba longa paila thushed yingan apbei, aieilausi Mühei nyengbü kho mangkei danan kikei. Hibü Paulei haoen la thungeijangeibü kuko

¹⁰laukei, “Yaangbü shuong, long on si long ham shanga wakou ho aeibou leilubü yinglabü dogo ngei chühenda; seneibü langkeikei thushed yinglabü.”

¹¹Lausikei saongao thükkabouei Paulei lenbü toje longleibou si long bunyuei lenbü bouje ditkei.

¹²Aieilausi longthakshang kho poang sünga dantilabüje ayingbü ka, ushaleko Fonika ongkei sühan poang khünei dantila daman long khüka lotan apla juongbouei maang angan kikei. Kho yungkük si yungthang chanep ae yeibü Kreta longthakshang che kiteikei.

¹³Ladang yungthang aeka yei inyaishoule soula khangkei, haoenei haoenei dambü tegü haüthüka dogo dambei, hoba haoenei longthakbou yaüenkei hoba thükthüng Kreta yungko nyangko haukei.

¹⁴Longche kian phaia chaang naphei yei dogo laubou yei kaangbü che kao aeka loukoukei.

¹⁵Long kho khünei minetkei hoba yeilam ae ayeienko apbei; hibü kün lolo ngüha leko khola soulangtikei.

¹⁶Kauda nyenbü shushou che phangto libüje shayangleko künei longshou che kho senlibakei.

¹⁷Longleibü danei kho tonenkei hoba long kaijembo lühei minetkei. Sirti phetsena toklabü dogo jemtenbü ka, haoenei longlei nei lotikei hoba kho tegü yei lolo kün jangeitikei.

¹⁸Nyibounyet, kün yeinak khoei sekkolakko soulangsije, haoenei long on akletla khangkei,

¹⁹hoba sembounyet ikei long kabü peisilei panletla khangkei.

²⁰Aieilausi chalou lounyu chanyu ayingsi khanshoulitshou ongkei ühüp hoba yeinak kho aeibou kaangko lotkei, khoei thonlaje kün püetlabü dogo dambü maanglem khümbo litian apbei.

²¹Kho tegü, ladang haoen chalou lounyu ashauayungko khüpbei, Paul haoen yoa loenkei hoba laukei, “Yaangbü shuong, kanei kü ngüha lejan kikei hoba Kreta ka ohoulabou kikei. Khei yinga tegüje kan lusakbü hoba maubü telongkhoulabü.

²²Lausikei tou ngei kan maang kaangashi dogo thungeida, aishanga kan yoka langkei ai amaulabü, lausikei longei ong konglabü.

²³Miou, ngo aoeibü ki hoba ngei ao to lemda kho Mühghaü khuthük hangangbü kü junga lokei.

²⁴Haoei laukei, ‘Tehüt, Paul; no Kaisar junga lojan, hoba Mühghaüei onouko ka yoa longa kibü shuong pendou ka la kua.’

²⁵Hibü maang kaangashi, yaangbü shuong, aishanga ho kü la lenbü tegü ong yinglabü dogo ngei Mühghaü to mailemda.

²⁶Lausikei sen su chenei thangyolanglabü.”

²⁷Ladang anthükleibou you sühkei, kün Adria yungnyua phongeishoueiko kijinei methuphanga longleibü shuongei kaomai sühda dogo ong dambei.

²⁸Haoenei taksi phak saoche haüan kikei, hoba longche hauan phaia takan chühsi phak anthükngao kiteikei.

²⁹Kün yungko laanglip to thangyolangla hatbü ka, haoenei longshing aeka longthakbou pemlei teklian langesaobü chüheikei.

³⁰Longleibü shuong kho long ka satla haujembei hoba longkhu ka longthakbou yantibü la nyeian haoenei longshou kho dei to yantian kiteikei.

³¹Hibü Paulei saongao thükkabou si sepai shuong to laukei, “Habü mütshuong longa akitei tegüje kan kan loloje püetla athükkei.”

³²Kheijinei sepai shuongei longshou kabü lüh wapthetkei hoba kho attikei.

³³Chanyu phamlamto Paulei haoen pendou to shaulayungla shanga hai lauko thungeikei, “Chalou anthüklei sühko kan haiteiko hoba müh kia; hoba kanei ai ashauayungkei.

³⁴Ngei kan to shaulayungla sudajada, aieilausi kan lang kimang sühalonga, kho shanga kümsilei. Lausikei kan aoeibü khukakei khulou langpem che ongkei amaulabü.”

³⁵Kho lauan phaia haoei wentek che sungkei hoba pendou thedanga Mühghaü la nyensang kukei; kho phaia haoei shaknyinkei hoba shaula khangkei.

³⁶Kheijinei haoen pendouei maang kaangngaikei hoba haoeneikei shaukeiyungkei.

³⁷Long khünei pendouei kün müt saoanto anjinleito lak yingan kikei.

³⁸Ladang haoenei photko shaukei, haoenei ang si to tekan koutiko long kho songoktila khangkei.

³⁹Ladang lang ngekei haoenei kao ashen, lausikei haoenei phetsen jonbü yungko che chühenkei, hoba thükalonga long kho khüto leilila shanga janenkei.

⁴⁰Haoenei longthakbou lühenkei hoba si to attikei; khüto yoko haoenei longlei wa sengkei, yeilam to shaangbou longleinei tonenkei, hoba deiko to meimeikei.

⁴¹Lausikei haoen yungnyu penyi haüyoshang to atkei hoba long kho kao to thangyokei. Khünei long kho thangjinlangan atopeiko apbei hoba deishou hauei longshing ae saakletla khangkei.

⁴²Thüngbü shuong ka che ongkei dei itjung hauan satenbüla dogo sepai shuongei haitila huon kümbei.

⁴³Lausikei saongao thükkabouei Paul langkei püetmang sühbü ka haoeneibü kümsilei kho shiletkei. Aoyou dei itla minkei haoen shang long ka tomletjung kaomai to liashi,

⁴⁴hoba joubü shuong kho wa si longkabü buthema hauashi dogo haoei ngühkhüm kukei. Kho tegü pendou kho kaomai to maisho satenkei.