Read Chang Naga YOUKOIKJAI 28 Bible Online

YOUKOIKJAI 28 - Chang Naga bible

YOUKOIKJAI 28

¹Ladang kün maisho satenkei kheijinei su kho Malta nyenkei dogo künei ngekei.

²Sangbü shuongei kün to aeibou sanou lenkei. Lang loula khangkei hoba aeibou khambei, khoei wan metan kün pendou olinko sungletkei.

³Paulei bujikshou thep che haushaikei hoba wan to jinkei. Kheijinei aubü ka pinyu che longan haoeibü ika kaikei.

⁴Ladang khükabü mütshuongei pinyu haoeibü ika saüan hapbei, haoen cheei che to laukei, “Kho müt kho müt haitibü che yinglabü haang. Hao yungnyu ka khümenkei, lausikei maanglanbou soushouei hao lang aphokulabü.”

⁵Lausikei haoei pinyu kho wanmang to wenan attikei hoba hao la ai aying.

⁶Haoenei hao mang poklabü ayingsi mangde tuonglabü dogo chüheiko kikei. Haoenei lounyu kho dambo chüheikei, lausikei haoenei hao la amaiko haüthükbü ai ühüpsije haoenei haoeneibü dambü jeileikei hoba hao mühghaü che yingkei dogo laukei.

⁷Kho lepa Publia nyenbü kho su kabü thükkabou müt cheeibü kaoen sekphai kikei. Haoei kün leiyetkei hoba chalou sem kün pangteiko sühtikei.

⁸Publia bou mangbok si siisenbüei shatko kiteikei. Paul atkei hoba welaukukei. Kho phaia haoei haoeibü ikei shangetan hao maitikei.

⁹Kho haüthüksije kho su kabü shatbü shuong pendou loukei hoba maitikei.

¹⁰Haoenei kün la jongsak juongnyu kukei, hoba ladang kün longa meimeijung haukei, haoenei kün shanga khambü peisilei pendou long to jinkukei.

¹¹Lit sem kian phaia kün kho sua poang angtibou long chenei haukei. Kho Alexandria long kiteikei, hoba kho nyen kho “Khuthükbü Phokbüshou” kikei.

¹²Kün Sirakusaa thakkei hoba khünei semnyet thüngkei.

¹³Khüka kün kaijung hauan Rijiaa sühkei. Natche kian yungthang yei soula khangkei hoba chalou nyia kün Puteoli to loukei.

¹⁴Khünei künei jaisina at hapbei hoba kün haoen yoa chalou nyet thüngla sukeijakei. Hobaje kün Rom to haukei.

¹⁵Khünei kün jaisinasi shuongei kün shanga ditan kiteikei hoba haoen Apia Namyakshang si Yensühchem Sem sühko kün shuokla loukei. Ladang Paulei haoen hapbei haoei Mühghaü nyen sangkei hoba maang khaingaitikei.

¹⁶Ladang kün Rom sangnyu to atkei, Paul hao lombou sepai yoa hao ong kila sakkukei.

¹⁷Chalou sem kian phaia haoei khükabü Jihudabü khuleibü dan chela ngashaikei. Ladang haoen yoshaikei haoei haoen to laukei, “Jaisinasi shuong, ngo hanei Jerusalem ka thüngbü che tegü kia. Ngeije sen mütli khulimbo ayingsi sen pisibou songsido khulimbo ai akümsikei, ngo Rombü la khümbo kuan apbei.

¹⁸Ladang haoenei ngo takteian chühkei haoenei ngo litimang sühkei aieilausi kü mata aikei hailabü kayang muko akitei,

¹⁹lausikei Jihudabüei kho khulimsije ngei Kaisar to künngailabü lele ong yeikei; kho ngei jembü phang khulimbo attibü ngüh sungbalabü shangakei aying.

²⁰Khoei ngei kan to haüyomang sühbü ka hoba joyomang sühbü ka kan ngakei; aieilausi Israelbü maanglema ngei ho yangmen phenan ki.”

²¹Haoenei hao to laukei, “Künei Jihuda ka ka shangabü ai lekei ühüp, ayingsi sen jaisinasi shuong atei ongkei louan alen ayingsi ka shangabü amaibü ai alau.

²²Nyi ai damdaje kho küneikei ditmang sühda; aieilausi pendou aenei ho tan khulimbo ong lauda dogo küneikei ngean ki.”

²³Haoenei hao shanga chalou che pienkei hoba haoeibü yen tegü müt juong lousühkei. Hobaje ngeyang ka chasem sühko haoei Mühghaü Sangle shangabü aukabü kuko wanan lenkei, hoba Mosa ngühkhüm si thuseibü le ka sungenan lenko Jisu shanga suletla haujembo laukei.

²⁴Laubü ngüh to atei mailembei, ateije maialem.

²⁵Paulei ngühkung che ho lensilengko haoen kanglanga ngühthang ayenko apbei hoba linkei: “Soushou Saopobüei kaneibü pisibou shuong to Isaia thuseibü danko hainyu maian laukei,

²⁶‘Habü mütshuong jungto hauashi hoba lenashi, Kanei ditdang lelabü lausikei ladangkei aditenlabü; kanei hapdang lelabü lausikei ladangkei ashenlabü.

²⁷Aishanga habü mütshuongeibü maangpon ngouan shema, haoenei haoeneibü nouei ushaleko ditda, hoba haoenei haoeneibü nyek mua. Khei aying tegüje, haoenei haoeneibü nyekei haplabü, haoeneibü nouei ditlabü, haoeneibü maangponei ditenlabü, hoba sepeilabü hoba ngei haoen maitikulabü.’

²⁸Mühghaü khümenbü sei Küksithang jungto hautiakei dogo kanei ngeashi, ditlabü kho haoen ki.”

²⁹(Ladang haoei kho laukhümbei, Jihudabü shuong haoen yoa aeibou ngühthang ayensapbo linkei.)

³⁰Hao khünei chemmu atko po nyi onko kikei, hoba hao jungto loubü dan pendou haoei sungletkei.

³¹Haoei Mühghaü Sangle shanga songlenkei, hoba Bunyubou Jisu Khrista shangabü aeibou tang khitko hoba toketbü akiko lenkei.