Read Chang Naga YOUKOIKJAI 3 Bible Online

YOUKOIKJAI 3 - Chang Naga bible

YOUKOIKJAI 3

¹Peter si Johan welaubü jihsiphai chenei chasemlamto angh sem thünga Lembüchem to angko kiteikei.

²Kheijinei buknyet ka thama sokebü müt che kei leibako kikei. Chaangboua haoenei hao kho Hemaibü Bakou dogo laubou Lembüchem koukhüna Lembüchem to loubü shuong ka hishau hiyungtila shanga apyoko kikei.

³Haoei Peter si Johan Lembüchem to atla kümjinei hapbei hoba haosi ka hikei.

⁴Haosi hamei hao to tangko chühkei hoba Peterei laukei, “Küsi to chühkai.”

⁵Haoei haosi ka denche hapoulabü dogo daman nyek thean chühkei;

⁶lausikei Peterei laukei, “Ngei hon ayingsi chandinam aki, lausikei ngei ai ki kho ka la kuda: Nazaretbü Jisu Khrista nyena paiashi!”

⁷Haoei mae ikei hao jenan loentikei. Khoyam haoeibü you si youngümshang pendou hau kingaikei;

⁸hao toman shatko loenkei hoba paikei, hoba hao haoen yoa Lembüchem to saiko lakko hoba Mühghaü nyen sangko paijung haukei.

⁹Müt pendouei hao paiko hoba Mühghaü nyen sangko hapbei,

¹⁰hoba haoenei hao kho Lembüchem Hemaibü Bakoua hishau hiyungko setbou kho yingkei dogo shenkei; haoenei hao to haüthükbü kho hapan haoen mokbü hoba maangpangbüei shenkei.

¹¹Ladang hao Peter si Johan yoa kakyoan hapbei, mütshuong maangpangbüa Solomoneibü chemsophang dogo laubü khüto lang- yoko yoshaikei.

¹²Ladang Peterei kho hapbei haoei mütshuong to laukei, “Israel mütshuong, kan aila ho to maangpangda, alausikei hao küneibü seiei hoba saopobüei paitikei laula maiko kanei aila kün to hainyu chühda?

¹³Abraham Mühghaü, Isak Mühghaü hoba Jakob Mühghaü, hoba sen pisibousieibü Mühghaüei, kanei Pilat thedanga asungletbou hoba khümbo kuan apbou haoeibü sambü Jisu soneikangtikei. Pilatei hao litila maangangkei,

¹⁴lausikei kanei saopobü hoba ngühmai kho asunglet. Kanei müt haitibou kho kan la litikula shanga phekei,

¹⁵hoba kanei ao ka langkei hapda hao bouje haitikei. Lausikei Mühghaüei hao haibü ka langngeitikei. Kün khoeibü aukabü shuong ki.

¹⁶Ho haoeibü nyen hoba kho mailem nyena ong kanei hao tou hapbü hoba ngebü tegü ho müt to hau kikei, hoba kan pendouei hapbü tegü kho müt la hao danko ong hau longeiko maitikei.

¹⁷“Hobaje tou, jaisinasi shuong, ngei ngeakei, kaneibü songdakbü shuongei kümbü tegü, kanei amin angeko kümbei.

¹⁸Mühghaüei kho tegü shaanglathama thuseibü shuong pendou danko haoeibü Messia khonkulabü dogo lenan phokubü loushedkei.

¹⁹“Hibü kanei shabü haman apla shanga maangpon kümetashi hoba Mühghaü jungto sepeiashi.

²⁰Hibü shangiednyu Mühghaüei haoeibü thuseibü shuong danko lauan phokubü tegü, ao pendou kümetbü jihsiphai asüh shongko khuthüka sungletan kiteijan kho Jisu, kaneibü piensapbü Messia kho kan jungto hautiashi hoba Bunyubou yobü ka kan la maang pibülembü longtishima.

²²Mosaei laukei, ‘Haoei ngo longtibü tegü Bunyubou kaneibü Mühghaüei kan jaisinasi shuong yoka thuseibü che longtilabü. Haoei ai ong lenlaje kanei haoei lenbü ditjan.’

²³Lausikei kho thuseibüeibü ngüha alebü danje müt yoka saopotham mautikulabü.

²⁴Samuel hoba hao jeibü shuong ka khangan, thuseibü shuong pendouei laubü khokei habü chalou shuong shanga laukei.

²⁵Kan kho thuseibü shuongeibü shousi shuong ki hoba Mühghaüei Abraham to hai lauko kaneibü pisibousi shuong to theyolanyojinei, ‘Kaibü thensilen danko kaodak phangshou shuong pendou haükulabü’ dogo laubü phet kho kanei phanda.

²⁶Kan mütpem weko lulueibü amaibü lam ka sepeitibü danko kan haütikulabü shanga Mühghaüei haoeibü sambü langngaitikei hoba kan jungto shaang hautikukei.”