Read Chang Naga YOUKOIKJAI 4 Bible Online

YOUKOIKJAI 4 - Chang Naga bible

YOUKOIKJAI 4

¹Peter si Johanei mütshuong to lenko kitoua ungshedbü shuong, Lembüchem lombü shuong yoa leiyeibou hoba Sadukibü shuong haoen jungto louan

²aeibou panglangtikei aishanga haosiei mütshuong la songlenkei hoba Jisu haibü ka mütsanga langngaibü shangabü phinthonkei.

³Haoenei haosi to ik shatkei hoba haosi nyibounyet sühko thüngdanga khinlepan phokei, aieilausi kho chasemlamto yingan kikei.

⁴Lausikei ngühlang ditbü shuong juongei mailembei, hoba lühbakei hajar ngao thüng onko yeikei.

⁵Ngiet kho haoen songdakbü shuong, jaishou shuong, Ngühkhüm lenbou shuong,

⁶thükkabou ungshedbou Ana, Kaifa, Johan, Alexander hoba lubü khukabü ungshed aedang kabü pendou Jerusalema takshatkei.

⁷Haoenei haosi haoen thedanga lotian phekei, “Ai hauei ayingsi ao nyena kasiei ho kümbei?”

⁸Soushou Saopobüei shenan, Peterei haoen to laukei, “Mütshuongeibü songdakbü dan hoba jaishou shuong,

⁹shatbü che to maibü kümsilei kümbü aoa kanei tat kün takteian chüha longa, hoba hao lai kümbü ka maikeije kho pheda longaje,

¹⁰kho, kanei peiseia thüngettibou hoba Mühghaüei haibü ka langngaitibou Nazaretbü Jisu nyena kho müt kho shat maian kan thedanga loda dogo müt pendouei hoba Israelbü shuong pendouei ngeashi.

¹¹Hao kho kan chemdangbüei aweko apbü hoba chemnyeka kongnyu la yeibü laang kho ki.

¹²Aotokei khümenbü aki, aishanga ho nyenei ong sen khümenlabü ki, hoba ho to limanje kaodaka mütshuong la aolakei nyen akukei.”

¹³Ladang haoenei Peter si Johan maangkaangbü hapbei hoba haoen dobüshibü ühüp angebü shuong dogo damenkei, haoen maangpangkei, hoba haoen kho Jisu yoa kibü dogo haoenei shenkei.

¹⁴Haoenei haosi kho attila athükko apbei aishanga haoenei maitibü müt kho haosi yoa loan hapbei.

¹⁵Hibü haoenei haosi kho Sanhedrin ka satan apla shanga ngühkhüm kukei hoba liko kamshaian

¹⁶lauyokei, “Khübü mütshuong to senei ai kümsi ong maila? Haoen danko amaaphilabü sei kümbü kho Jerusalem kabü shuong pendouei chongchinga; senei kho atheletla athük.

¹⁷Ho mütshuong yoa aei aei aphaktila shanga senei haoen hatlenkho, hoba haoen to Jisu nyena aolakei ai alenla shanga lenkho.”

¹⁸Hibü haoenei haosi ngakei hoba Jisu nyena jimlatangla ngüh üanglabü ayingsi alenla shanga ngühkhüm kukei.

¹⁹Peter si Johanei haoen to jongaikei, “Mühghaü to ayingko kan to bouje ditla kho Mühghaü thedanga janbü si ajanbü yingkeije kanei matjem kujan.

²⁰Kün shangaje künei ai hapbei hoba ditkei kho alenlabü kho athük- aminlabü che ki.”

²¹Khünei aeiko haoenei haosi aeibou hatlenkei hoba litikei. Haüthükbü shanga mütshuongei Mühghaü la soneikangbü kubü hangshong haoenei haosi shieikoela kho athükaminlabü che yeikei;

²²aishanga haosiei maitibü seikümseilei kümbou müt kho po saonyi thüka jailebü yingan kiteikei.

²³Ladang Peter si Johan litikei haosi haoen thangbou shuong jungto haukei hoba haoen la ungshed jaishou shuongei hoba jaishou shuongei haosi to lenbü pendou lenkei.

²⁴Ladang haoenei kho ditkei haoen pendouei liko Mühghaü to kaangbang hai welaukei: “Bunyubou, khuthük si kaodak hoba yungnyu hoba khükabü pendou kümbou kho no ki,

²⁵hoba Soushou Saopobü danko küneibü pisibou Dawidei laubü tegü, ‘Küksithang shuong aila khau angkei, hoba aila phangshuongei jim akibüa huon takkei?

²⁶Bunyubou khulimbo hoba haoeibü Messia khulimbo kaodak Choba shuong liko takshatkei, hoba songdakbü shuong chela yoshaikei.’

²⁷“Aishanga Küksithang si Israel mütshuong yoa Herod si Pontia Pilat yoan liko kaibü saopobü sambü Messia Jisu khulimbo sangnyua takshatkei;

²⁸Kaibü ikei hoba maangangbüei ai kümlabü dogo takenkei kho kümla haoen yoshaikei.

²⁹Hobaje tou, Bunyubou, haoenei theshoubü khüto chühashi hoba nyi ladang ong maitila shanga kaibü ik shinglaje hoba kaibü saopobü sambü Jisueibü nyen danko sei hoba maangpanglabü lenlaje kheijinei kaibü sambü shuongei kaibü Ngühlang maangkaangko lauentishima.”

³¹Ladang haoen welaukhümbei, haoen kamshang kho nyaakeikei hoba haoen pendou Soushou Saopobüei shenkei, hoba haoenei athakko Mühghaü ngühlang maangkaangko laukei.

³²Mailembü mütshang pendou dambü hoba maangpon chela lekei; aoeiche ongkei kho haoeibü nyaksinam dogo alau, lausikei ajanjan pendou haoeneibü hambü la yeikei.

³³Youkoikjai shuongei athakko hau yaangbüei Bunyubou Jisu langngaibü aukabü kula haujembei, hoba Mühghaü onouei haoen pendou thüka athakko kümbeileikei.

³⁴Maimaitham haoen yoa aokei apenasouko akitei, aieilausi kao, chemshang sekphai pendou yakan kho yakletbü nam sungbakei.

³⁵Hobaje hangangbü shuong thedanga phokuko kikei. Haoenei mütpem weko la hao southüng jankukei.

³⁶Josef nyenbü müt che kikei, hao la youkoikjai shuongei Barnaba, tetlabü, “Thungeijangeibü Shou” dogo nyenkuan kikei. Hao Kupra mütli ka, Levibü che kikei,

³⁷hoba haoei sek che kikei. Haoei kho phoukei hoba kho yakletbü nam kho youkoikjai shuong jungto sungbaan phokei.