Read Chang Naga YOUKOIKJAI 5 Bible Online

YOUKOIKJAI 5 - Chang Naga bible

YOUKOIKJAI 5

¹Lausikei müt che Anania dogo nyenan kikei, hoba hao yak Safira haosiei peisilei at yakkei,

²hoba yakeikei ngeko haoei nam at hao shanga phongaikei. Haoei joubü kho sungbakei hoba kho youkoikjai shuong junga phokukei.

³Peterei laukei, “Anania, nyi Soushou Saopobü huonettilabü hoba sek yaakletbü ka ka shanga jamde huan pholabü lele lai küman Satanei kaibü maangpon hainyu shentikei?

⁴Ho ayaakjinei kaibü aying lo, hoba ho yakan phaia dogokei yakletbü nam kho kamaang aying lo? Nyi müt thedanga ayingko Mühghaü thedanga yepeikei.”

⁵Ananiaei ladang khübü kho ditkei hao tuongetnyu haikei. Ho ditbü shuong pendou hatbüei shenkei.

⁶Kheijinei heshou shuong meimeikei hoba hao sholepbei; hoba haoenei hao sunglangan khünan apbei.

⁷Angh sem thüng danan phaia ai haüthükkei kho ai angeko hao yakkei loukei.

⁸Kheijinei Peterei sao to laukei, “Kü la lenbü, kasiei sek kho khüjoche lu phoukei lo?” Saoei laukei, “Haü, khüjoche lu phoukei.”

⁹Peterei sao to laukei, “Bunyubou Soushou takteila kasi aila ngühthang yenkei? Ditashi, kalao khünbü shuong koukhüna kia, haoenei no tonlanglabü!”

¹⁰Khoyam sao kho haoeibü you junga tuongetkei hoba haikei. Kheijinei heshou shuong lotkei hoba sao haian hapan haoenei saokei tonlangkei hoba haolao junga khünkei.

¹¹Lashongbü dan pendou hoba kho ngühlang ditbü shuong pendou hatyokei.

¹²Mütshuong yoa youkoikjai shuongei seikümseilei hoba maang- panglabü juong kümbei. Haoen pendou Solomoneibü chemsophanga kambei.

¹³Haoen yoa yola aoeikei asom, lausikei mütshuongei haoen nyen sangkei;

¹⁴lausikei athakko Bunyubou to mailembü shuong bousu yaksa juong haoen lühbaka jinyokei.

¹⁵Hibü haoenei lamnyu to liko shatbünyatbü shuong sungbakei, hoba Peter danji phaijinei müt che nyi thükto ongkei haoeibü mangh nadanoua dogo daman yepshanga si amnyua lengtian phokukei.

¹⁶Lepsang lepkhong ka shuong shuonga Jerusalem to shatbünyatbü shuong hoba shabü souei lapbü shuong leibakei hoba haoen pendou maikei.

¹⁷Kheijinei khukabou ungshed hoba hao yoa kibü shuong, hoba Sadukibü eikshuongeikei haoen to nyekto shatkei.

¹⁸Haoen loenkei hoba youkoikjai shuong lapbei hoba haoen sangnyu thüngdanga phokei.

¹⁹Lausikei nangnak Bunyubou khuthük hangangbüei thüngdang koukhün ipan sattikei hoba laukei,

²⁰“Hauashi hoba Lembüchema loashi hoba mütshuong la ho langkei shangabü lenashi.”

²¹Ladang haoenei kho ditkei haoen Lembüchem to haukei hoba chanyu louphambü ka jaüan lenla khangkei. Ladang khukabou ungshed hoba hao yoa kibü shuong loukei, haoenei Sanhedrin hoba Israelbü jaishou shuong thangyen takshatkei, hoba hangangbü shuong kho leibala shanga thüngdang chem to ngüh hautikei.

²²Ladang pangsa shuongei kho sühlangkei haoenei haoen khünei ühüp. Haoen ngaian lenkei,

²³“Künei thüngdang chem kho kaangkhühtham khinan, lombü shuong kho koukhüna loan hapbei, lausikei ladang künei kho ipbei chemmaanga aokei akitei.”

²⁴Ladang haoenei kho ditkei, Lembüchem lombü shuongeibü leiyeibou si ungshed jaishou shuongei khübü youkoikjai shuong la ai haüthükkei dogo mangan apbei.

²⁵Müt atei louan haoen la lenkei, “Kanei thüngdanga khinbü mütshuong kho maimaitham Lembüchema kia; haoen khünei mütshuong la lenko loakei.”

²⁶Kheijinei leiyeibou kho haoeibü eikshuong leijung hauan, mütshuongei laangei sonsi amaibüla dogo khau üangko eaaoa leibakei.

²⁷Haoenei haoen leibakei hoba Sanhedrin thedanga lotikei. Khukabou ungshedbouei haoen to hai

²⁸lauko phekei, “Künei kan la kho nyena alenla shanga ngühkhüm kaangkhühtham kua hoba kanei Jerusalem pendou kaneibü lenbüei nyaktia hoba kho müt haibü on kho kün la küntimang sühda.”

²⁹Peter si youkoikjai shuongei jongaikei, “Künei müt ngüha ayingko Mühghaü ngüha lejan.

³⁰Seneibü Mühghaüei kanei peiseia thüngettibou Jisu Khrista kho langngaitikei.

³¹Israel maangpon sepeitila hoba saoeibü shabü apbula shanga Mühghaüei haoeibü maenei Leiyeibou hoba Khümenbou che tegü tonenbou kho hao ki.

³²Khübü loushedbü shanga hao to ngüha lebü shuong la Mühghaüei kubü Soushou Saopobü, hoba kün shuong aukabü ki.”

³³Haoenei kho ditan maangpokkei hoba haoen haitila takenkei.

³⁴Lausikei Farisibü Ngühkhüm lenbou müt che Gamaliel dogo nyenan mütshuongei soumo kuko kibü müt che, Sanhedrina loenan, mütshuong kho insing che tangto leilangla shanga haoen to lenkei.

³⁵Haoei haoen to laukei, “Israelbü shuong, kanei khübü mütshuong la ai kümbula damdaje maangsangashi.

³⁶Aishanga jihsiphai tuisho dana, Theudaei hao khei phangche yaangkei dogo lauan meimeikei, hoba hao phainei müt saongao lei thüng sembei. Lausikei hao kho haitian apbei hoba haoeibü eikshuong kho linkei, hoba haoen khünei thonkei.

³⁷Kho phaia lühbak webü jihsiphaia Galilbü Judas dogo nyenan müt che, hao phainei mütshuong at yoan khulimbo loenkei. Haokei khei maukei hoba haoeibü eikshuong pendou linto jankei.

³⁸Hibü ngei kan la lenda, tou kaneibü ik kho haoen ka litiashi hoba khübü mütshuong kho khei ong apyoshi, aishanga haoenei kümbotakko kibü kho müteibü kümsilei yingan kialonga ho mauan aplabü.

³⁹Lausikei ho Mühghaüeibü kümsilei yingan kisije, kanei haoen amauentilabü, maimaitham kan bouje Mühghaü to jakkokei thonada.” Haoen haoeibü ngühlam to loukei.

⁴⁰Haoenei youkoikjai shuong kho ngayetan ngümeikei hoba Jisu nyena song alenla shanga ngühkhüm kaangkhühtham kukei. Kho phaia haoenei haoen litikei.

⁴¹Hibü haoen Sanhedrin ka olinyoko ngaikei, aishanga haoen kho Jisu nyena aweasüngko shieinangeila muan kikei;

⁴²hoba chalou weko haoenei Lembüchema hoba mütshuongeibü chema Jisu kho Messia yingkei dogo lenbü hoba songlenbü kho athak.