Read Chang Naga YOUKOIKJAI 7 Bible Online

YOUKOIKJAI 7 - Chang Naga bible

YOUKOIKJAI 7

¹Thükkabou ungshedbouei phekei, “Kho tükde sai?”

²Stefenei laukei: “Jaisinasi shuong hoba bousijai shuong ditashi. Soneikangbü Mühghaü seneibü bou Abraham jungto, hao Harana mo akijinei, hao Mesopotamiaa kian longan lenkei,

³hoba hao to laukei, ‘Kaibü kaonyek hoba chempen shuong apyoashi, hoba ngei ka to lenlabü kaonyek to hauashi.’

⁴Kheijinei haoei Khaldia kaonyek apyoan Harana sang lekei. Haobou haibü phaia Mühghaüei hao khüka kan tou kibü kaonyek to kuktikei.

⁵Haoei khünei hao la ai nyaksinam aku, younakshang ongkei aku, lausikei hao kheijinei shousi akiteisi dogokei, haoei hao la hoba haophai kabü thensilen pendou la kho kaonyek kimleptila shanga thekukei.

⁶Khoei Mühghaüei hai laukei: ‘Haoeibü thensilen kho küksithang kaodaka yen la yeilabü, hoba po saongao lei sühko khübüei haoen aao la lelabü, chühmang asühlabü;’

⁷hoba ‘Ngei haoen aaola lebü phangshuong mat jemlabü, hoba kho phaia haoen khüka longenlabü hoba ho kaoena kü to lemlabü.’

⁸Hobaje Mühghaüei Abraham la kipbü danko maangangyobü thesilan che kukei. Kho tegü hao Isakeibü bou la yeikei hoba hao la chalou setbounyeta kipbukei. Kho tegü ong Isak la Jakob bukkukei, hoba Jakob la boukim shuong haoen anthüknyi bukkukei hoba haoen pendou kipan apbei.

⁹“Khübü boukim shuongei Josef to nyekto shatkei hoba Ijepbü la yaakshaukei; lausikei Mühghaü hao yoa kiteikei.

¹⁰Haoei hao khonku pendou ka püetkei, hoba Ijep Choba Farao la haoeibü songsihon danko hao maibü shentikei. Haoei hao Ijep thüka hoba haoeibü chemsibung pendou thüka hao governor yeitikei.

¹¹Kheijinei Ijep kaodak hoba Kanan pendoua mühsinou yaang longkei; seneibü pisibousi shuongeikei shausiyung ühüp.

¹²Lausikei Ijepaje nyak kia dogo Jakobei ditkei hoba shaangboula seneibü pisibousi shuong hautikei.

¹³Nyiboubüaje Josef kho haojaisi shuong la ngeentikei hoba Josef mütli kho Farao la ngeentikei.

¹⁴Hibü Josefei haobou Jakob hoba haoen chempen pendou, pendoueije müt anjinleito ngao la ngabü ngühlang hautikei.

¹⁵Kheijinei Jakob hoba seneibü pisishuong Ijep to yanlangkei, laonei haoen haikei.

¹⁶Haoen Shekhem to künbakei hoba Shekhema Hamor shousi shuong ka Abrahamei namei jekthetbü hee khünei apbei.

¹⁷“Abraham la Mühghaüei thekubü loushedbü jihsiphai sühlangjinei, Ijepa mütshuong kho aei aei haakei.

¹⁸Tokei Ijepa Josef angebü lubü Choba longkei.

¹⁹Haoei sen phang to makhetkei hoba seneibü bousi shuong kho haoeneibü nasak shousi shuong ühaa ayaangtila shanga shingekko shangshenko amaiko jungeikei.

²⁰Mosa kho jihsiphaia bukkei. Hao kho aeibou haangmaibü nashou che kiteikei. Hao lit sem sühko haobou chema chingenkei.

²¹Ladang hao kho pühdaka loushedkei, Faraoeibü shouei hao kho saoeibü shou la leko samenkei.

²²Hobaje Mosa kho Ijepbüeibü songsihon pendoua hapen ngeenbü la yeikei; hao ngühadeia hoba kümaleia aeibou seian yeikei.

²³“Hao ladang po saonyi onkei haoei haojai haona Israelbü shuong pheian chühmang sühkei.

²⁴Kheijinei haoen müt che aeibou amaiko jungeiko hapan haoei hao la pü lekukei; hoba haoei Ijepbü kho ngüman koutian hao la phok lambukei.

²⁵Hao danko Mühghaüei haoen püetkei dogo haoeibü jaisinasi shuongei khei damenan kilabü dogo haoeije dambei, lausikei haoenei kho aditen.

²⁶Nyibounyet haoen kanglanga ong müt nyi oyophetyoko hapbei, kheijinei haoei ‘Kan jaisinasi ong yingkei; aila kan kan yoa aji- aphaiko jungeiyoda?’ dogo lauko haoei haosi papleptila shanga haujembei.

²⁷Lausikei hao thangbou ngümeiko kibou khoei Mosa aüan sattikei hoba laukei, ‘No kün thüka songdakbü hoba matjembou yingtila shanga aoei heenkei?

²⁸Nyi miet Ijepbü haitibü tegü ngokei haitimang sühda sai?’

²⁹Kho ngüha Mosa satan apbei hoba hao Midian kaodaka yenla lean kikei. Khünei hao müt nyieibü bou la yeikei.

³⁰“Ladang po saonyi dankei khuthük hangangbü che Sinai Shongh yamlamanga hamlong danko hao la wanlong chenei longan lenkei.

³¹Khüto chühan Mosa maangpangkei, hoba ladang khüto chühla nyangko loukei Bunyubou ngüh ho ditkei;

³²‘Ngo kaneibü pisiboueibü Mühghaü, Abraham Mühghaü, Isak Mühghaü hoba Jakob Mühghaü ki!’ Kheijinei Mosa lühkei hoba chühla asom.

³³Bunyubouei hao to laukei, ‘Kaibü nguok sungenashi, aieilausi no loshang ho saopobü kaoen ki.

³⁴Ngei maimaitham Ijepa kibü ngeibü jaisinasi shuong aweasüngko jungeibü hapa, ngei haoen ngühbü wibü dida hoba haoen püetla loukei. Tou kaiya, ngei no Ijep to hautilabü.’

³⁵“Kho Mosa, ao haoenei asungletko ‘No aoei songdakla hoba matjemla heenkei?’ dogo laubou kho hao ki. Mühghaü khuthük hangangbü danko hamlonga wan longan lenkei, hoba haoei hao songdakbou si leiyenbou ham shanga hautikei.

³⁶Ijep kaodaka hoba yamlamanga po saonyi sühko maangpanglabü hoba tetsida kümbo haoen leijung haubou kho hao ki.

³⁷Israelbü to ‘Haoei ngo longtibü tegü, Mühghaüei kan jaisinasi shuong yo ka thuseibü che longtilabü,’ dogo laubou kho hao ki.

³⁸Yamlamanga Israelbü takshatbüa yobou kho hao ki. Hao kho Sinai shongha hao to joyobou khuthük hangangbü hoba seneibü pisibousi shuong ham yoa kikei. Sen la kula langkeibü soushou ngüh sungletbou kho hao kikei.

³⁹Lausikei seneibü pisibousi shuongei hao to ngüha lemang asüh; haoenei hao aüan sattikei hoba haoeneibü maangponje Ijep to ngaikei.

⁴⁰Haoenei Aron to laukei, ‘Kün thedanga hautila shanga kün la mühghaü kümbü. Aieilausi Mosa, aoei kün Ijep kaodak ka leibakei, hao la ai haüthükkeije künei angekei.’

⁴¹Kheijinei haoenei masu pongsu shoushou che kümbei hoba haoenei kho heangsho to lembei; hoba haoeneibü ikei kümenbü khüto aeibou maangshikyokei.

⁴²Lausikei Mühghaüei sepeinyu haoen la khuthük kabü shuong lemtikei, thuseibü lea hai doan kibü tegü: ‘O Israel phangshuong, kan po saonyi sühko, yamlamanga kijinei kü la haitibü meisiauei lembei sai ayingsi lembüsabü kukei sai?

⁴³Aying, kanei Molokeibü neichem, hoba kaneibü khanshoulitshou mühghaü Refan hoba khübü to khüpetan lemla shanga kaneibü ikei kümenbü heangsho shuong kan yoa liko sungbakei. Ngei kan Babilon to langtilabü.’

⁴⁴“Seneibü pisibousi shuongei aukabü neichem yamlamanga kikei. Ho Mosa la Mühghaüei haoei hapbü kho phatko ong kümtikei.

⁴⁵Seneibü pisi shuongei ho thenei thenko sungletkei, hoba haoenei seneibü bousi shuong la nangan sattikubü phangshuongeibü kaodak kimlepbü jihsiphaia Joshua yoa sungbakei. Kho Dawid jihsiphai sühko thenkei.

⁴⁶Haoei Mühghaü to maangshikbü hapbei hoba Jakobeibü thensilenei jungeila shanga hao la kishang kaoen che dangkula shanga phekei;

⁴⁷lausikei Mühghaü shanga chem dangkubou khoje Solomon kiteikei.

⁴⁸Lausikei Thükkabou kho müteibü ikei kümbü chema akida. Thuseibüei lenbü tegü,

⁴⁹‘Khuthük kho ngeibü Choba setshang hoba kaodak kho ngeibü younakshang. Kanei kü la ailaibü chem dangkula, ayingsi ngo haksoenlabü kaoen kho lanei ki? dogo Bunyubouei lauda.

⁵⁰Khübü pendou kho ngei kümbei aying lo?’

⁵¹“Kan lulimbü mütshuong, dambü hoba ditenbüa küksithang shuong, kanei ponpendou Soushou Saopobü khulimda; kaneibü pisibou shuongei tubüsekbü tegü kaneikei jungeida.

⁵²Kaneibü pisibou shuongei ashiakoebü thuseibü ao ki? Haoenei Saopobou kho loulabü shanga lenbü shuong haitikei; kan tou hao yaakshaubü hoba müt haitibü shuong la yeikhüma.”

⁵³Kanei youkoikjai shuong danko Ngühkhüm sungletkei, lausikei kanei kho ajungei.

⁵⁴Haoenei kho ditjinei haoen khau angyokei hoba hao to chühan hauh uyokei.

⁵⁵Lausikei hao Soushou Saopobüei shenan, khuthük aeto nyek thean chühkei hoba Mühghaü soneikangbü hapbei hoba Jisu mae aenei loan hapbei.

⁵⁶Haoei laukei, “Ngei khuthük ipan hapda hoba Jisu Mühghaü mae aenei loan hapda.”

⁵⁷Kheijinei haoenei kaangbang hinyoko haoeneibü nou sakkei hoba haoen pendou hao jungto nyuyokei,

⁵⁸hoba sangnyu ka shian sattian haoenei laangei sonkei. Aukabü shuongei haoeneibü neisimei kho Saul dogo nyenan heshou müt cheeibü you junga shaangan phokukei.

⁵⁹Haoenei Stefen to laangei sonjinei haoei Bunyubou to hai lauko ngakei, “Bunyubou Jisu, ngeibü soushou sungletshi.”

⁶⁰Haoei khüpetan hai lauko kaang ngekkei, “Bunyubou, ho shabü ho haoen la tejinyoku.” Kho lauan phaia hao haikei.