Read Chang Naga YOUKOIKJAI 8 Bible Online

YOUKOIKJAI 8 - Chang Naga bible

YOUKOIKJAI 8

¹Hao haitila maangangbü kümsilei khünei Saul kei yoan kikei. Khünyet Jerusalem lashong khulimbo shieikoebü yaang longkei. Youkoikjai shuong to liman haoen pendou Jihuda hoba Samaria kaonyek to linkhümbei.

²Songlea khümbo kubü shuongei Stefen khünkei hoba hao shanga mang haapyobü yaang kikei.

³Kheijinei Saul lashong dan shian apbo paikei. Hao chem chemto atan bousu yaksa pendou senjung louan thüngdang to jinko paikei.

⁴Linan kibü shuongei kaoen pendoua songlenkei.

⁵Filip Samaria sangnyu to yankei hoba haoen la Ngühlangmaibü lenkei.

⁶Mütshuongei ladang Filipei lenbü ditkei hoba tetsida sei kümbü hapbei, haoenei lenbü to khoyam ong liko maangangan nou haangko ditkei.

⁷Aishanga müt juong to asaopobü soushou kikei hoba haoen ka soushou shuong kho kaangbang ngekyoko longan apbei; hoba phei haibü hoba sokebü shuong juong maitikei.

⁸Hobaje sangnyu khünei olinyobü yaang longkei.

⁹Simon dogo nyenan sangnyua müt cheei sei jungeiko kikei, hoba hao kho khei phangche dogo lenko Samaria mütshuong pendou maangpangtikei;

¹⁰hoba hanbü yaangbü pendouei “Ho müt ho la Yaangenbou dogo laubou Mühghaüeibü sei kia” dogo lauko haoei lenbülebü to aeibou ngüha lekei.

¹¹Haoenei hao to ngüha lekei aieilausi jih lounyu haoen kho haoei sei kümbüa maangpangtiko loukei.

¹²Lausikei Filipei haoen la Mühghaü Sangle hoba Jisu Khrista nyen shanga songlenkei, hoba haoenei hao to mailembei. Haoen bousu yaksa juong baptikukei.

¹³Simoneikei mailembei, baptikei hoba Filip yoa yangkei; tetsida hoba amaa- philabü kümbü kho hapan haokei aeibou maangpangkei.

¹⁴Ladang Jerusalema kibü youkoikjai shuongei Samariaa Ngühlangmaibü sungleda dogo ditkei haoenei haoen la Peter si Johan hautikukei;

¹⁵haosi yankei hoba Soushou Saopobü sunglettila shanga welaukukei;

¹⁶aishanga haoen yoa aothüktokei Soushou Saopobü mo alotko kiteikei. Khün sühkoje haoen kho Bunyubou Jisu Khrista nyena ong baptian kiteikei.

¹⁷Kheijinei Peter si Johanei haoeneibü khua shangkei, hoba haoenei Soushou Saopobü sungletkei.

¹⁸Ladang Simonei Soushou kho youkoikjaibüeibü ikei shangetbü danko louko hapbei, haoei haosila nam kuko

¹⁹laukei, “Ngei aoyou thükto ong ikei shangetlaje Soushou sunglettilabü lele külakei kho sei kho kubüma.”

²⁰Peterei hao to laukei, “Kaibü nam kayoa maushi aishanga Mühghaüeibü maangmai jongsak kho nyi namei jekthetlabü dogo damda!

²¹No Ngühlangmaibü hanei janletbü phejan ai aki, aishanga Mühghaü junga kaibü maangpon atangkei.

²²Kaibü amaibü haka maangpon sepeiashi, thükalonga kaibü dambü shuong kho aptila shanga Bunyubou to welauashi;

²³ka la khauekbü kom jinkuakei hoba no amaibüeibü aaola yeiakei dogo ngei chühenda.”

²⁴Simonei jongaikei, “Nyi laubü khübü kho tetche ongkei kü to ayingtila Bunyubou to kü shanga welaukushi.”

²⁵Haoenei aukabü haüko kukei hoba haoen la Bunyuboueibü ngühlang kukei. Kho phaia haosi Jerusalem to ngaikei hoba lamoua Samaria sang juonga Ngühlang Maibü songlenkei.

²⁶Khuthük hangangbü cheei Filip to lenkei, “Meimeiashi hoba Jerusalem ka Gaza to yanbü yungthang aekabü lamnyu to hauashi.” (Kho yamlamang lam.)

²⁷Hao meimeikei hoba haukei. Tou Ethiopia kabü Kandake Chobasao phanga saoeibü nyaksinam pendou thüka chühbou, Ethiopiabü sungphatbü yaangbü müt che Jerusalem to lemla haukei.

²⁸Hao kailonga setan longeijinei haoei Isaia thuseibü le weko kikei.

²⁹Soushouei Filip to laukei, “Hauashi hoba khünei setyoashi.”

³⁰Filip hao jungto laangkei, hoba hao Isaia thuseibü le weko ditan phekei, “Nyi weko ditbü kho nyi tükde ditendaoba lo?”

³¹Haoei laukei, “Atei alenshongkoje ngei lai küman ditenla?” Hobaje haoei Filip to lotan hao yoa setla shanga phekei.

³²Haoei weko kibü Lai kho ho kiteikei: “San che tegü hao haitila nangkei; hoba sanlon shoushou haoeibü wi khebü junga ngüh alongbü tegü hao haa akou.

³³Hao himoutikei hoba ngühmai matjem sunglangkei. Haoeibü thensilen aoei wanenla? Aishanga haoeibü langkei kho kaodak ka langa.”

³⁴Kheijinei sungphatbou khoei Filip to laukei, “Thuseibou khoei hao shangabü laungeida si ayingsi müt at shangabü laudaje sanoudaman kü la lenkai.”

³⁵Filipei lau khangkei, hoba kho Lai ngüh ka khangan hao la Jisu Khrista shangabü Ngühlang Maibü lenkei.

³⁶Haosi haujinei deikhün che sühlangkei, hoba sungphatbou khoei laukei, “Chüh- ashi, hanei dei kia. Ngo hanei baptikulabü ka aieije toketda sai?”

³⁷(Filipei laukei, “Kaibü maangpon khümboei mailema longa ho kümla thükakei.” Haoei jongaikei, “Jisu Khrista kho Mühghaü Shou dogo ngei mailemda.”)

³⁸Haoei kailong kho thaktikei hoba Filip si sungphatbou haosi ham deikhün khüto atkei; hoba Filipei hao baptikukei.

³⁹Ladang haosi dei khüka longkei Bunyuboueibü Soushouei Filip kho leilangkei hoba sungphatbou khoei hao ühüp; hoba hao haolam to olinangko ngaikei.

⁴⁰Lausikei Filip Azataa loushedkei hoba hao Kaisar to aloushongko haoei sangnyu pendoua Ngühlang Maibü songlenjung dankei.