Read Chang Naga YOUKOIKJAI 9 Bible Online

YOUKOIKJAI 9 - Chang Naga bible

YOUKOIKJAI 9

¹Saulei athakko Bunyuboueibü eikshuong to chühmang asühsapbo haitila shanga khukabou ungshed jungto haukei.

²Haoei, Lamnyu to mailembü eikshuong, bousu yaksa haüpangteiko lapan Jerusalem to khühan senbala shanga, hao Damaska sinagog to atla shanga sakkubü le hikei.

³Hao hauko kijinei Damaska sühlamto müh ka ngesakbü che hao khuilepbo haukei.

⁴Hao kao to atetkei hoba ngüh cheei hao to hai laukei, “Saul, Saul, nyi aila ngo shieinangeida?”

⁵Haoei laukei, “Yaangbou, no ao?” Haoei jongaikei, “Ngo nyi shieinangeibou Jisu ki.

⁶Lausikei laksepashi, sangnyu to atashi, hoba nyi ai kümjan yingkeije ka la lenlabü.”

⁷Hao yoa paibü shuongei ngüh khoje ditda, lausikei aokei ühüpbü ka ngüh alongko mangan apbei.

⁸Saul kao ka laksepbei hoba ladang hao nyek longkei haoei ai ühüpbo apbei; hoba haoenei hao ika jenan Damaska to leian atkei.

⁹Chalou semnyet sühko haoei ai ühüpbo setkei, hoba ai ashau ayung.

¹⁰Damaskaa eik che Anania dogo nyenan kikei. Bunyubouei hao to mangsanga hai laukei, “Anania,” haoei laukei, “Bunyubou, ngo hanei kia.”

¹¹Bunyubouei hao to laukei, “Meimeiashi hoba Tangsheibü dogo laubü lamnyu to hauashi, hoba Saul nyenbü Tarsasbü müt shangabü Judas nyenbü chema pheashi. Hao welauko kia,

¹²hoba haoei mangsanga Anania dogo nyenbü müt che hao jungto louan hao la nyekei haptila shanga hao to ikei shangko hapa.”

¹³Ananiaei jongaikei, “Bunyubou, kho mütei kaibü mütshuong to Jerusalema latet- che amaiko jungeikeije kho shangabü ngei müt juong ka ditoua.

¹⁴Hobaje tou sema kaibü nyen to ngabü shuong pendou lapan haula shanga haoei ungshed jaishou shuong ka hau hiakei.”

¹⁵Lausikei Bunyubouei hao to laukei, “Hauashi, aieilausi kho müt kho Küksithang hoba Choba shuong hoba Israelbü shuong jungto ngeibü ngühlang künla shanga ngei pienbü peisilei che ki.

¹⁶Kü nyen aoa hao latet- che khonsaklabü kije kho ngei hao la lenlabü.”

¹⁷Ananiaei apyoan chem khüto haukei. Haoei haoeibü ikei Saul to shangetan laukei, “Jaisina Saul, Bunyubou Jisu, ao no loubü lama ka thedanga haüyokei, haoei ngo ka nyekei haptila hoba Soushou Saopobüei shentila shanga hautikei.”

¹⁸Kheijineitham haoeibü nyek ka kou tegütham ekei hoba haoeibü nyekei hapngaikei; hao laksepbei hoba baptikei,

¹⁹hoba shauan yungan phaia hao la hau longeikei. Saul Damaskaa eikshuong yoa longche khüpbei,

²⁰hoba khoyam haoei sinagoga Jisu shanga hai lauko phinthonkei, “Hao Mühghaü Shou ki.”

²¹Haoei laubü ditbü shuong pendou maangpangkei hoba laukei, “Ho müt ho Jerusalema hao nyena ngabü shuong pendou khonsaktibou, hoba ungshed jaishou shuong jungto khühan haukula shanga loubou kho aying si?”

²²Lausikei Saul kho haua aei chingyokei, hoba haoei Jisu kho Messia ki dogo aukabü kubüei Damaskaa kibü Jihudabü shuong aei panglangtikei.

²³Chalou juong kian phaia Jihudabüei hao haitila huonkei,

²⁴lausikei haoenei huonbütakbü kho Saulei ngeenkei. Haoenei hao haitila shanga chalou nangnak pendou bakhüna lombei,

²⁵Lausikei haoeibü eikshuongei hao nangnak sangba ka kam chenei tonletkei.

²⁶Ladang hao Jerusalema sühlangkei haoei eikshuong yoa yomang sühkei, lausikei haoen pendou hao to hatyokei, aieilausi hao kho eik che yingkei dogo haoenei maialem.

²⁷Lausikei, Barnabaei hao youkoikjai shuong jungto leibakei hoba haoei haoen la lai küman lama Saulei Bunyubou hapbei, hoba Damaskaa Jisu nyena lai maangkaangko lenkei, kho pendou lenkei.

²⁸Saul haoen yoa Jerusalema ongale hauko longeiko hoba Bunyubou nyena maangkaangko lenko setkei.

²⁹Haoei Grik ngühyem laubü Jihudabü to wetyolauyokei; lausikei haoenei hao haitila lameikei.

³⁰Ladang jaisinasi shuongei kho ngeenkei haoenei hao Kaisaria to leibakei hoba Tarsas to satan aptikei.

³¹Kho tegü Jihuda, Galil hoba Samaria pendoua lashong dan sangmeia olinyokei. Bunyubou la soumo kubü danko ho chingbü haabüa athak, hoba Soushou Saopobü thungeijangeibü danko ho aei haakei.

³²Peterei kongpeiko haujinei Liddaa kibü Múhghaü müt at junga sühlangkei.

³³Kheijinei haoei Aenea dogo nyenan po set shen ka akhokeibü phei haibü müt che hapbei.

³⁴Peterei laukei, “Aenea, Jisu Khristaei ka la maitilabü sungbada. Laksepashi, hoba no lolo shen lamleashi.” Hao khoyam pienkei.

³⁵Hobaje Lidda si Sharona kibü pendouei hao hapbei; hoba haoen Bunyubou jungto sepeikei.

³⁶Joppaa eik müt che Tabitha, tetlabü, Dorka, dogo nyenan kikei. Sao sanoubü kümsilei hoba maangshikbü kümsileiei shenan kikei.

³⁷Kho jihsiphaia sao shatkei hoba haikei. Haoenei saoeibü haibü mang kho sakenkei hoba thükkabou popchema phokei.

³⁸Lidda kho Joppa nyangko kikei, khoei khünei kibü eikshuongei Peter khün kia dogo ditan haoenei hao jungto müt nyi ho subüjabü ngüh yoan hautikei, “Sanoudaman kün jungto aphaiko kai.”

³⁹Peter meimeian haosi yoa haukei. hao ladang sühlangkei haoenei hao thükkabou popchem to leiangkei, hoba latnyu shuong hao nyangko loan haapyoko, hao la Dorka haoen yoa lang kijinei shibü neisimei hoba mangsho shuong sungenan lenkei.

⁴⁰Peterei haoen pendou tangto angtikei hoba khüpetan welaukei. Hao mang yeptian phobü aeto sepeikei hoba laukei, “Tabitha, laksepashi.” Kheijinei saoei nyek longkei, Peter hapbei hoba setkei.

⁴¹Haoei sao la haoeibü ik hautian loentikei. Kheijinei haoei lashongbü hoba latnyu shuong ngayetkei hoba haoei haoen la sao lang kukei.

⁴²Kho ngühlang Joppa pendoua nyakkei hoba müt juong Bunyubou to mailembü shuong la yeikei.

⁴³Hao Joppaa Simon dogo nyenan phekhun shibü che junga chalou lounyu thüngkei.