Read Chang Naga ROM 1 Bible Online

ROM 1 - Chang Naga bible

ROM 1

¹Ho le ho Paul ka, Mühghaüeibü youkoikjai che yingla ngabü, hoba Mühghaüeibü Ngühlang Maibü künla shanga pienbü, Jisu Khristaeibü sambü cheei,

²lounyu dana ho Ngühlang Maibü Mühghaüei haoeibü thuseibü shuong danko saopobü Laia thekukei.

³Ngühlang Maibü kho hao Shou, ao phe aedang ka tangshaitham Dawid thensilen ki,

⁴lausikei sao- pobü thechüh aeka hao Mühghaü Shou yingla shanga langngeijung loubüei khümbomeiko tang khida, hao shangabü ki. Hao seneibü Bunyubou Jisu Khrista ki,

⁵ao danko youkoikjai che yeila shanga sungletkei kho aoyoueibü kümsilei phangshuong mütli pendou hao to mailema ngüha lela shanga ki.

⁶Kankei khünei haoen yoa yoakei, aieilausi kan Jisu Khristaei ngakei.

⁷Rombü Mühghaüei sanoubü shuong hoba hao mütla ngabü pendou jungto: Kan pendou jungto seneibü Bou Mühghaü hoba Bunyubou Jisu Khrista ka olinbü hoba haülabü yingshi.

⁸Shangla ngei ho lenmangsühda, kanei hao to mailembü ngühlang kaodak pendoua ditbü shanga ngei Jisu Khrista danko Mühghaü la nyensang kuda.

⁹Mühghaü ao ngei hao Shoueibü Ngühlang Maibü phinthonbü danko khangenda, ngei lai kan ponpen ngeibü welaua damenda, kho haoei ngekei.

¹⁰Mühghaüei maangangbü yingsije, ngo thonla ongkei kan jungto louenlabü lele lam naipbua dogo ngei ponpendou welauda.

¹¹Kan soushoua hau kitila, kan yoa soushou jongsak janyola shanga, kan to haüyola ngei aeibou waangko chüheida;

¹²khei laulabüei, ngei ladang kan to haüyolaje, kaneibü mailemei ngo, ditenyobüei sen hau kiyolabü.

¹³Ngei kan la ho ngetimangsühda, jaisinasi shuong, tat sühko ngo alouenko toketsi dogokei, ngeikei khei, lubü Küksithang kaodak dana tegü, kan yoakei ngeibü kümsilei kho mai hektilabü shanga, ngo kan jungto loula aeibou takteikei.

¹⁴Ngei Grikbü hoba Grik ayingbü, hapbü ngebü hoba ühüp angebü pendou yoa jetei kümjan kia.

¹⁵Khoei ngei kan Rom kabü shuonglakei Ngühlang Maibü songlenla aeibou haiyeida.

¹⁶Ngo Ngühlang Maibü aoa ihimouda; khei Jihudabü ka khangan Grikbüa sühko, mailembü weko shanga ho Mühghaüeibü khümenbü sei ki.

¹⁷Aishanga Ngühlang Maibü danko ho tang khitda, khei khangbü ka shembüa sühko Mühghaüei müt hao yoa saopotham kitila kümbü kho mailem ki. Ho doakei, “Ao Mühghaü yoa mailem danko janbü ki hao lang kilabü.”

¹⁸Asaopobü si amaibü mütshuong aoyouei ngühmai amaiko thangetda haoen khulimbo khuthük ka Mühghaü maangshat kho tou tang khida.

¹⁹Haoen shanga Mühghaü ngelabü pendou kho lansanbü, aieilausi Mühghaüei ho lansanbü kümbei.

²⁰Kaodak yaüshembü ka jaüan haoeibü achühenbü hangsilam, kho thon akibü sei hoba Mühghaübou. khübü kho haoeneibü maangponei hapentila shanga haoei kümbü yaübü kümsilei thonan kiteikei, khoei haoen shanga ap kubü aki.

²¹Haoenei Mühghaü ngean kikei lausikei haoenei hao la kujan nyensang ayingsi maangshikbü aku. Aeiko tokei haoenei amlangbü lenbüa maang kuyokei hoba haoeneibü tak ashatbü maangpon kho nakthühei khuilepbei.

²²Songsido kibü tegü lenko haoen ngoubü la yeikei;

²³haoenei ühaibü Mühghaü, müt phatko kümbü hoba au phatbü hoba meisiau si shanbü yangsikok phatko kümbü haibü heangsho to jeiyoda.

²⁴Hibü haoen lulueibü maang jembü lolo asaopobü hoba cheei che yoa haoeneibü mang awe- asüngko jungeitila Mühghaüei haoen apyokei.

²⁵Haoenei Kümbou, Mühghaü ngühmai kho amlangbü to jeiyokei, hoba haoenei, ao ponpen shanga sangjan kikei, kho jeila haoenei kümenbü shuong to ong khümbo kukei hoba lembei. Amen.

²⁶Hibü Mühghaüei haoen aseasangbü khonkua apyokei. Yaksa shuongei haoen yoa ajanbü dühbü hangsilam jungeila shanga bousu yoa jungeilabü janbü hangsilam apyokei,

²⁷hoba kho tegü bousueikei yaksa yoa jungeilabü janbü hangsilam kho apyoda, hoba haoen yoa ajanbü dühbü hangsilam jungeida. Bousuei him yoa himou akakbü kümsilei jungeibü hoba sanglea akakbü jungeibü danko haoenei mubü üepenkubü kayang sungbakei.

²⁸Kho ong ayingko, haoenei Mühghaü ngebü hatlepjan dogo adamensije, Mühghaüei haoenei akümjan kümtilabü shanga himou akakbü shabü maangpon la haoen khümbo kuan apbei.

²⁹Haoen amaibü, aeilam aeiphopbü hoba maangsha maangkok, khübü amaibü pendouei nyakan ki. Haoen nyekto shatbü, müt haitibü, oyongümyobü, khüpsilang hoba mangsenyobüei shenakei. Haoen shayotayobü shuong, jukbüsabü, münyen jungeibü, Mühghaü maabü, hoba Mühghaü khulimbü shuong la yeikhümakei.

³⁰Haoen kho lilisese, yonglamshamle, amaibü haanbü haanbü hapen sungenla sekokbü, nyungüh boungüh ashaubü,

³¹ditenshokenbü akibü, soumo akakbü, chemdanga apaplepyobü hoba sanou akakbü shuong ki.

³²Khübü kümbü mütshuongje haila mukei dogo laubü Mühghaü ngühlang haoenei shangashatakei; yingankei haoenei ong khübü kümda aying, khübü jungeibü shuong to haoenei ik ipbo shoda.