Read Chang Naga ROM 10 Bible Online

ROM 10 - Chang Naga bible

ROM 10

¹Kü shangaje, jaisinasi shuong, ngei ngeibü maangpon pendouei aeibou waangda hoba haoen khümentila shanga Mühghaü to welauda.

²Haoenei Mühghaü shanga maangdakbü yaang kia dogo ngei aukabü kula thükakei lausikei kho ditenbü akiko yingkei.

³Mühghaüei müt hao thedanga lai mat maitida kho haoenei angekei hoba haoenei haoen lolo lam at lamenla haujembei.

⁴Aishanga Khristaei mailem kibü shuong pendou Mühghaü junga mat maitibü danko ngühkhümeibü nyekchüh kho khümbo wantia.

⁵Ngühkhüm jungeibü danko loushedbü Mühghaü junga mat maitibü shanga Mosaei hai doakei khei müt atei ngühkhüm jungeibü ka thük hapalonga, hao kho phenyobü khünei kilabü.

⁶Lausikei mailem danko loushadbü phenyobü shanga Mosaei hai lauda; “Khuthük to ao angla?” dogo nyi jembü lolo telau, (khei laubü kho Khrista leiyanlabü ngüh ki),

⁷ayingsi “Yemkhünyet to ao yanla?” dogo telau, (kho Khrista haibü ka nyibou sungailabü ngüh ki.)

⁸Haoei ai lauda? “Ngüh kho kan junga kia, kaneibü sembunga hoba kaneibü maangpona ki.” Künei phinthonbü ho Mühghaü ngüh ki:

⁹khei nyi Jisu kho Bunyubou dogo tang khittialongaje, hoba Mühghaüei hao haibü ka langngaitikei dogo maangphanga mailemsije, no khümenlabü;

¹⁰aishanga müt cheei Mühghaü thedanga mat maitila shanga maangpona mailemjan, hoba khümenlabü shanga haoei haoeibü mailem kho tang khittijan.

¹¹Laishibaei lenda, “Hao to mailembü aokei akongtilabü.”

¹²Jihudabü si Grikbü kanglanga aikei janyinbü aki, aishanga pendoueibü Bunyubou che ong ki hoba haoeibü thuibü maangshikko ngabü shuong pendou shanga hao apsileko keiakei.

¹³Aishanga “Bunyubou nyena ngabü shuong pendou khümenlabü.”

¹⁴Lausikei hao to maije alemnyu hao nyena ngalabü shuong kho ao ki? Hao shangaje aditnyu hao to mailemlabü kho ao ki?

¹⁵Hobaje haoen ohautinyu mütshuongei lai songlenla? Laishibaei laubü tegü, “Ngühlang maibü künbabü shuongeibü youyaü lai he maikei!”

¹⁶Pendoueije Ngühlang Maibü to maang aku. Isaiaei lauda, “Bunyubou, küneibü ngühlang to aoei mailembei?”

¹⁷Hibü mailem kho ditla maangdakbü ka louda hoba ditletbü kho Khrista shanga lenbü ngüh ki.

¹⁸Lausikei ngei phekei, Ho mütshuongei ditoulabü jih maibü ühüpoubü ka sai? Maimaitham haoenei ditoua. “Songlenbou shuongeibü langh kaodak pendou to haukei, hoba haoeneibü ngüh kaodak thon sühko aakei.”

¹⁹Ngei tokei phekei, “Ho Israelei aditenbü kaje teyingkaoba?” Mosaei laubü shaang ditshi: “Ngei kan phang ayingbü che la nyekto shattilabü, ngei ngoubüloubü phang che kan to khau angtilabü.”

²⁰Isaiaei maangei natko lauda, “Ngo alambü mütshuongei ngo hapoukei, kü shanga aphebü mütshuong junga ngo loushadkei.”

²¹Lausikei Israel shanga haoei hai lauda, “Ngühtokbü hoba kü khulimbü mütli to subüjabüa ngei chalou sünga ngeibü ik shingkei.”