Read Chang Naga ROM 11 Bible Online

ROM 11 - Chang Naga bible

ROM 11

¹Khülonga ngei ho pheda. Mühghaüei hao mütli shingekkei sai? Ladangkei aying! Ngokei Israelbü che hoba Benjamin phang kabü Abraham shisishousi che ki.

²Mühghaüei hao mütli ashingek; shangiednyu haoei haoen kho haoeibü dogo sungleda. Laishibaa Elijaei Mühghaü to Israel khulimbo subüjabü kho kanei angekei lo?

³“Bunyubou, haoenei kaibü thuseibü shuong haitia hoba kaibü lemshon pankhümbua; ngo ong joukei hoba haoenei ngokei haitila haujemda.”

⁴Lausikei Mühghaüei hao to lai jongaikei? “Ngei kü shanga Baal to akhüpetbü mütshuong müt hajar nyet phoakei.”

⁵Tokei kho tegü ong ki: Mühghaüeibü onouei pienbü müt ikmok che thüng jouda;

⁶hoba ho onoubüei yingsije touje hoei haoenei kümenleienbü to aikei nongan aki, khei aying longaje onoubü kho ai onoubü jim akilabü.

⁷Khülongaje ai? Israelei saoei lameibü kho ühüpen; lausikei pienbü danei ong ho hapenkei; jouletbü shuong khoje Mühghaüei subüjabü kho ashenko yeitikei.

⁸Laishibaei lenbü tegü: “Mühghaüei haoen tat chalou sühko, haplabü nyekei ühüptiko hoba ditlabü nouei adittiko maia phambo ngoutikei.”

⁹Dawidei lauda, “Haoeneibü nyishoubü shausiyungei, haoen tuongtiko hoba haoen to haklangümla, ngühlaushang haptiko tin hoba sung chela ong yeitishi.

¹⁰Haplabü ka thangetko, haoeneibü nyek kho thutishi. Haoeneibü shenjang athakko khüpettishi.”

¹¹Maimaitham haoenei ladangkei akümetlabü lele shedtikei sai? Kheikei aying! Haoen phaiyetbü hangshong Jihudabüei haoen to nyek to shattila shanga khümenbü kho küksithang jungto louan apbei.

¹²Haoen phaiyetbü kho kaodak shangaje ku yingalonga, hoba haoenei athük hapbü kho Küksithang shangaje ku yingalongaje, haoeneibü khümbobü ngüha lebü langkeije latetche yingla!

¹³Tou kan Küksithang shuong shanga ngüh che: Ngo Kükeithangeibü youkoikjai che yingkei, ngei

¹⁴ngei thükthüng küphanga atje nyek to shatko yeitila hoba kho danko haoen atje khümentila shanga thükpangteiko khangenbü pendouei haujemda.

¹⁵Haoen shingekbü tetlabü kho kaodak pendou Mühghaü to phenyotikei longaje, haoen sungletngaibü khoje khei haibü songdak thona dogo laulabü to liman ai tetlabü ki?

¹⁶Wenon hanbü che ong shakan Mühghaü la lemasikei, tükdebüeije wen pendou khokei saopobü ki. Bunyu li kho saopobü yingalonga, bhek khokei saopobü ki.

¹⁷Oliv bubhek at ngokan apan hoba yambabü oliv (kho, kan Küksithang) bu kheletbü at sapyokei hoba khei li si oliv bu-dei senbala thükan ki.

¹⁸Lausikei kho bhek shanga yongtelam! Nyi khei yonglammang sühalonga ho damashi, nyi li thounouda ji lausikei liei no thounouda.

¹⁹Nyi laulabü hang, “Bhekshuong kho ngokkhümbei, khoei ong ngo sapyokei.” Haü, khokei tükde ong.

²⁰Ho aieilausi haoen mailem akibü ka haoen “pakngokkei,” hoba kan mailem kibüei tou bunyu phejan atla yeiakei. Lausikei yonganje tesungen; maangsangashi.

²¹Mühghaüei haangabü bhekshuong kho üemen tegüje haoei kan aila khei ong phokula?

²²Mühghaü kho lai sanoubü si maang amaibü thaman ki; atetbü shuong shanga maang amaibou, hoba kanei hao sunglet shongko kan shanga sanoubou ki. Kanei ngüha alelonga, kankei khei chengan aplabü.

²³Maimaitham, Jihudabü shuongkei haoen ngühmaang alanko ong akilongaje, haoenkei “thenngaikulabü.” Mühghaüei kho kümla thükakei.

²⁴Aishanga kan Küksithang shuong kaneibü hao- hangkabü yambabü oliv bulong ka chengan sungkei hoba hao hang ayingbü mouenbü oliv bunyu to sapyokei longaje, khülonga Jihudabü haohang oliv bulong to sapyola aeiko latetche sola!

²⁵Jaisinasi shuong, hanei huphang kabü ngühmai kia hoba kanei ho ngejan dogo ngei damda; ngei damda hoei kan sungen yaangenbü ka satentilabü. Huphang ngüh kho ho, khei Israelbü kho laulabüei ngoualoua apbei hoba Küksithang shuong pendou alotkhüm shongko haoen jamde khei kiteilabü;

²⁶ho Israelbü pendou lai khümenlabü kho shanga ki. Ho doakei: “Zion ka Leiyenbou kho loulabü, haoei Jakob ka haoeibü saopobü kümsilei pendou apbulabü.

²⁷Ho ngei haoeneibü shabü apbunyet, haoen to theyolanyolabü kho ki.”

²⁸Ngühlangmaibü lenbü ka loushedbü tegü Jihudabü shuong Mühghaüeibü dangbü la yeikei, hoba kan Küksithang shuong ku pailetbü shuong ki; lausikei Mühghaüei haoen pienkei hoba haoeneibü pisibou nyena haoen kho athakko haoeibü ki.

²⁹Aishanga haoei ladang müt at ngabada hoba haükuda, Mühghaüei kho shanga haoeibü dambü ajaksheida.

³⁰Jih chenei kanei Mühghaü to ngüha ale lausikei Jihudabü lenbü aditbü danko tou kanei onoubü sungletakei.

³¹Kho tegü ong, kanei onoubü sungletbüei haoen tou ngüha aleyoko ki, lausikei kho to liman haoeneikei tou onoubü sungletla thükkei.

³²Aishanga haoei pendou to onoubü lenenla shanga, Mühghaüei müt pendou kho haoen lulueibü lenbü phanga khinlepakei.

³³Mühghaüeibü keisiyaang, songsihon hoba hapbüngebü latetche yaangkei! Haoei matjemda lausikei aoei kho lenenla? Hao hao lama kümdaleida lausikei kho aoei phanenla?

³⁴“Aoei Bunyuboueibü maangpon ngekei? Hao to songlenla ao kian chühkei?

³⁵Mühghaüei hao la shemmailabü lele, hao la aoei ai kuan chühkei?”

³⁶Aishanga ajanjan pendou haoei kümbei, hoba ajanjan pendou hao danko hoba hao shanga lang kida. Ponpen shanga Mühghaü to soneikangbü yingshi. Amen.