Read Chang Naga ROM 12 Bible Online

ROM 12 - Chang Naga bible

ROM 12

¹Hibü jaisinasi shuong, Mühghaüei sen to aeibou sanouabü, kaneibü mang kho langkei lembüsabü, saopobü hoba sungletenlabü lele lemashi dogo ngei kan to sudajada.

²Kaodak hangsilam ae teyei lausikei kaneibü maangpon haanbü che la yeingaibü danko kaneibü langkei jakshaishi; kheijinei kanei Mühghaüei maangangbü, ai to maibü, sungletenlabü hoba penbüsoubü, dogo lauda kho ditenlabü.

³Aishanga Mühghaüei kü la onoubü kubü danko ngei mütpem weko to jembü shanga aei ashamla shanga lenda; kanei Mühghaüei kan mütpem weko la kubü mailem to takteian chühko eaaoa damshi.

⁴Mütmang chenei lulu phejan kümbo küksihuo juongnyu ki.

⁵Kho tegütham, juong yingasikei, Khrista to phenyoan, mang che la yeida, hoba sen lulu yingasikei cheei che to küksihuo la yeian ki.

⁶Sen la kubü onoubü thüng seneibü soushou jongsakkei lulu lulu ki. Jongsak kho thusei ngüh yingalonga, senei ho seneibü mailem tetei jungeikho;

⁷ho khangenbü jongsak yingan kialonga senei khünei sen lolo khümbo kukho; lenbou cheei haoeibü jongsak kho lenbüa jungeijan;

⁸ao to thungeijangeilabü jongsak ki haoei kho khünei jungeijan; müto janyola jongsak kibouei kho maangshikko janyojan. Aoyou songdak haua ki haoenei maangdakbü lenjan; aoyouei müto sanou lenda khokei olinangko kümashi.

⁹Sanou kho takshatjan. Amaibü mangsenshi hoba maibü hatlepshi.

¹⁰Cheei che to tükdebü chempen sanou lenshi; soumo kuyobüa cheei che shaangtiashi.

¹¹Kaibü maangdakbü tekouti; Soushoua sekokan kishi. Bunyubou khangenbüa hautaknepshi.

¹²Maanglema olinshi. Shieinangeibü natenshi. Welaua kaangashi.

¹³Mühghaü khangenbü shuong akialebü to thuishi; ponpendou yensiau to maishi.

¹⁴Kan shieikoebü shuong haükushi; haü, haükushi hoba haoen to tekhüktuok.

¹⁵Olinbü shuong yoa olinyoshi, haapbü shuong yoa haapyoshi.

¹⁶Kan yoa dambü jiyoan kishi; tühang teyaangen lausikei hanbü shuong to paplepashi. No sangbüdobü shanga ong dameiko teki.

¹⁷Amaibü jeila amaibü tekungai. Pendouei maiakei dogo chühlabü kümsilei kümla ong nyek theashi.

¹⁸Thükalonga nyije pendou to sangmaia kishi.

¹⁹Phoktelam, küthangbou shuong, lausikei soushou khauang maangpok shanga apyoshi; aishanga Laishibaei lauda, “Phoklambü kho küshangabü; ngei shemmeilabü, dogo Bunyubouei lauda.”

²⁰Aying, kaibü dangbou mühei haialonga oknyinashi; hao dei laalonga hao la inashi; khei jungeibü danko nyi haoeibü khua wankak yasebü kho kushaikuda.

²¹Amaibü la no tethükti, lausikei amaibü kho maibüla thüktiashi.