Read Chang Naga ROM 13 Bible Online

ROM 13 - Chang Naga bible

ROM 13

¹Mütpem weko hao thükkabü songdak hau phanga kijan, aishanga hau kho Mühghaü ka louda hoba songdaka kibü shuong kho Mühghaüei heenkei.

²Hibü aoyouei songdak khulimlaje haoenei Mühghaüei pienbü lulimda hoba khei kümbü shuongei haoen lolo matjem senbada.

³Matjembü shuong kho maibü kümbü shuong shanga aying lausikei shedtiyatibü shuong shanga hatlabü ki. Nyi songdaka kibü müt to hatbü ka satenmang sühda sai? Maibü kümashi hoba haoei no sanglabü.

⁴Aishanga kan maila yaangla shanga haoei Mühghaü khangenda. Lausikei nyi ajanbü kümsije no hatlabü ki, aieilausi haoei amlangbüa in ajungeida. Hao kho Mühghaüeibü sambü hoba amaibü kümbü shuong la khauang maangpok sungbabou phoklambü peisilei che ki.

⁵Hibü soushou khauang maangpok shanga ong aying lausikei kaibü sensimaang shangakei phangto atkulabü song.

⁶Khoei ong kanei khümkei kuda; aishanga Mühghaüeibü sambü shuong tegü songdakbü shuongei haoen lolo kho nyekchüh shanga khümbo kuyoda.

⁷Nyi sangh ai ong thekei, sangkhüm yamkhüm hoba hatbü si soumo tegübü pendou mütpem weko la haoei muthüng kungaiashi.

⁸Kaibü haübü sanou phejan to liman aolakei matsangh tethe; aishanga aoei müto sanouda haoei ngühkhüm loushadtida.

⁹Aishanga “Nyi asangalanbü teshon. Nyi müt tühaiti, Nyi tekok, Nyi temangsüh.” hoba lubü ngühkhüm pendou kho ho ngühlin hanei onshaiakei: “Nyi kalepbou to jembü lolo tegü sanouashi.”

¹⁰Nyi ka lepbou to sanousije nyi hao shedtila athük; khoei ngühkhüm pendou kho sanoubüa loushatda.

¹¹Khübü kümjinei nyi janenlabü hoba no yepbü ka lakseplabü jih süha dogo ngeenjan; aishanga khümenbü kho senei shaangla songlebü toje tou aei nyangbou ki.

¹²Nangnak lounyu dana; change phamla nyangakei. Senei nakthühbü kümsilei apyojan hoba sen lolo ngesakbü insiaubu jungjan.

¹³Seneibü hangsilam kho change to jibü yingjan; senei tomyolakyobü hoba yungan khuyo ngümyobü tekikho, jakbümakbü hoba pejapelabüa aying, oyophetyobü hoba nyekto shat- yobüa aying;

¹⁴lausikei Bunyubou Jisu Khrista kaneibü hele la yeitishi hoba sii si pheei dühbü senyühshemtila dambü apyoashi.