Read Chang Naga ROM 14 Bible Online

ROM 14 - Chang Naga bible

ROM 14

¹Müt che haoeibü mailema hau akibü khokei ka yoto leiyetashi lausikei kho hao to ngüh wetyolabü shanga aying.

²Müt cheeibü mailem kho hai kia khei haoei haüpangteiko shaula thükkei; lubü cheje mailema hau aki, hoba haoei pikshik ong shauda.

³Pendou ajemtenko shaubouei khei ashaubou la tenyiku; hoba takü ashaubouei che kho ashajan, aieilausi Mühghaüeije hao sungleda.

⁴Müeibü sambü cheeibü mat jembo pailabü lele no ao? Hao tang khitlabü ayingsi aditlabü lele matjemlabü kho haoeibü chembubou ki. Hobaje haoei thükenlabü aieilausi Bunyubouei hao khei yingtila thükan ki.

⁵Müt cheei nyetchebü chalou kho nyishoubü to aei kongnyubou dogo damda; müt cheeije chalou pendou kho jetei dogo damda. Mütpem wekoei jembüeibü dambüa maisho loenjan.

⁶Aoei chalou aeila sungenan nouda haoei kho maangphanga Bunyubou to liko nouda; hoba aoei shauda yungda haoeikei maangphangaje Bunyubou to liko shauda, aishanga haoei Mühghaü la nyensang kuda. Hobaje aoei shaubü yungbü ka bangenda khokei maangphangaje Bunyubou to liko kümda; aieilausi haoeikei Mühghaü la nyensang kuda.

⁷Sen aokei hao shanga ongje ühangda hoba aokei hao shanga ongje ühaida.

⁸Sen lang kialongaje kho Bunyubou shanga kida, hoba sen haisije kho Bunyubou shanga haida. Kholonga langsikei haiasikei sen Bunyuboueibü ki.

⁹Khoei ong hao haibü si langbü hameibü Bunyubou yeila shanga Khrista haikei hoba langngaikei.

¹⁰Nyi aila kaibü jaisina nyikuda? Aishanga sen pendou Mühghaü matjembü setshang junga lolabü.

¹¹Laishibaei lauda: “Ngo ki shongko, dogo Bunyubouei lauda, mütpem wekoei kü junga khüpetlabü, hoba mütpem wekoei Mühghaü nyen sanglabü.”

¹²Hibü sen mütpem wekoei Mühghaü la lulu shangabü lenlabü.

¹³Hibü senei cheei cheeibü mat jemyobü thakakho, nyi kathangboueibü haanga aikei toketkhi- petlabü ayingsi phaiyetlabü aikei aphokula shanga maangpon kümetashi.

¹⁴Ngo Bunyuboueibü yingsije aikei asaopobü aki dogo ngei khümbomeiko sungletenda; lausikei müt atei ho asaopobü dogo damsi ong kho asaopobü ki.

¹⁵Shaueiyungei nyi kathangbou ngangtia longa, nyi hao thedanga sanouko ajungeida. Kaibü shausiyung danko ao shanga Khrista haikei, hao la leilubü tesungba!

¹⁶Ka shanga ai janbü dogo dambei kho müyomüyanga amaibüla yeiko alaueitila maangsangashi.

¹⁷Mühghaü sangle khoje shaubü yungbü aying; ho Soushou Saopobü ka loubü saopobü, sangmai hoba olinbü ki.

¹⁸Aoyouei Khrista khei khangenda haoenei Mühghaü ka maangshikbü hapda hoba müt thedangakei nyenmai hapda.

¹⁹Hibü senei aiei ong sangmai longtida hoba seneibü thechüh hangsilam hau kitida kho shiakho.

²⁰Shausiyung aoa Mühghaü kümsilei teleiluti. Shausiyung pendou kho shaula sombü yingla thükkei lausikei ho danko müt at mailema tuongettilabü yoan kialonga shausiyung pendou kho shedbü.

²¹Kho danko kajai kana senyüh ashemtilabü kialonga nyi phe ashauko apbü ayingsi ayungko nangbü kho ong khaibou.

²²Kaibü boushou mailem kho Mühghaü kasi kanglanga ong jungeiashi. Ao mütei hao shanga janbü dogo maileman kümbüleibüei hao la shedbü akungaida kho müt olinbou.

²³Lausikei aoei maanga shuko shauda yungda haoei shedbü shona, aieilausi haoeibü kümsilei kho haoeibü mailem ka longbü aying; ai ong mailem ka alongda kho shabü ki.