Read Chang Naga ROM 15 Bible Online

ROM 15 - Chang Naga bible

ROM 15

¹Sen aoyou mailema hau ki haoenei hau akibü to thuijan hoba jembü shanga ongje adamjan.

²Sen mütpem wekoei jembü lepbü sangmang maila yaangla shanga damjan hoba jilaphailabü lamjan.

³Aishanga Khristaeikei hao shangaje adam. Laishibaei lenbü tegü, “Ka to khükbüokbü shuongeibü ngüh kho khuthüka shatkei,”

⁴Ngühmai maanglan hoba Laishiba ka hau hapbü danko senei maanglem kitilabü lele shangiednyu Laia ai ong dokei kho sen la lenla shanga dokei.

⁵Kanei maang- pon chela lean hoba ngüh cheei liko seneibü Bunyubou Khrista Jisueibü Bou Mühghaü sanglabü lele maang lemenbü hoba hau pendou bakshang Mühghaüei, kan la Jisu Khrista to kibü jibüphaibü sensimaang kushi.

⁷Kholongaje, Khristaei kan sungletbü tegü, Mühghaü soneikangbü shanga kanei cheei che sungletyoshi.

⁸Aishanga ngei lenda, khei shaangla, boukim shuong to theyolanyobü kho shangashattila shanga, Küksithang la Mühghaü nyen sangtilabü lele, Khrista kho Mühghaüeibü ngühmaanglanbü aukabü kulabü lele Jihudabü sambü la yeikei. Laishibaei lenbü tegü, “Hibü ngei Küksithang yoa kan sanglabü. Ngei ka nyen sangbü chia laulabü.”

¹⁰Nyiboubüa lauda, “Kan Küksithang shuong, hao mütshuong yoa liko olinyoshi.”

¹¹Tokei lauda, “Kan Küksithang shuong, Bunyubou sangshi, mütli shuong pendouei hao sangshi.”

¹²Tokei Isaiaei lauda, “Küksithang thüka songdakla shanga Jesse thensilen longlabü; hao to Küksithangei maanglemlabü.”

¹³Mühghaü ao maanglem pakshang ki haoei kan hao to kibü mailem danko kan pendou olinbü hoba sangmaiei shentishi; Soushou Saopobü hau danko kan maanglemei sopbojaiko shentishi.

¹⁴Küjai künasi shuong, ngei ai atoknokko mailemda khei kan pendou maibüei ong shenan, ajanjan pendou hapan ngean, hoba cheei che thungeijangeiyola aeibou thükan minan kilabü.

¹⁵Lausikei kan la ngühnyek at damentila shanga temtemaje ngei kan jungto kaangshangko doa. Ngei kho kü la Mühghaüei kubü onoubü,

¹⁶laobouei ngo Jisu Khrista danko Küksithangeibü sambü la yeitikei kho onoubü danko kümbei. Küksithang shuong to Soushou Saopobüei saüenkubü danko Mühghaü Ngühlang Maibü songlenlabü ho ngeibü ungshed kümsilei ki.

¹⁷Hibü Mühghaü khangenbüa ngei Khrista Jisua soneikangda.

¹⁸Ngei ong maang yaangenko laukho laualonga lubü ai aying lausikei ngo danko Küksithang shuong ngüha letila shanga Khristaei ai kümbei kho ong ki. Ngei, haoei ngühei hoba kümeileiei ai kümbei,

¹⁹sei danko lenbü amaaphilabü hoba maang- panglabü shuong, hoba soushou sei shanga laulabü ki. Hibü khoei ngei Jerusalem ka khangan Illirikuma sühko Jisu Khristaeibü Ngühlang Maibü songlenbüei sühlangtia.

²⁰Aishanga müei yaüenbü aoeibü chemshang thükakei ahuongyola shanga, ngei ponpendou lanei ong Khristaeibü nyen ladangkei aditoukei khünei Ngühlangmaibü lenla kho ngeibü nyekchüh,

²¹Laishibaei laubü tegü, “Aoyouei haoeibü ngühlang aki haoenei haplabü, hoba aoyouei ladangkei adit haoenei ditenlabü.”

²²Khoei ong ngo kan jungto loula kibü ka ponpendou thekei.

²³Ai ai yingsikei, ngei ho kommanga ngei thükbü pendou küma, hoba po juongnyu ngei kan to haüyola chüheiko kibü yingsije

²⁴ngo Spain to hauena longa, ngei kan khünei dantoyoko haüyolabü dogo damda. Shaangla ngei jih tuisho shanga kan to haüyoan olinyolabü hoba ngo haujinei kan la thuitimang sühda.

²⁵Lausikei, ngo touje Mühghaü mütshuong to thuila shanga ngo Jerusalem to hauda.

²⁶Aishanga Makedonia si Akhaia lashong danei Jerusalema kibü Mühghaü mütshuong shale khonsakbü to thuila ajanjan helatakla shanga janenakei.

²⁷Ho haoeneibü janenbü ong kiteikei-lausikei tükdebüei ho haoeneibü kümsilei ki! Aishanga haoenei Jihudabüeibü soushou haülabü janyokei longa, haoenei Jihudabü to akialebüa kaodak haülabüakei shakyo jan- yojan.

²⁸Hibü ladang ngei ho kümsilei ho wanlaje hoba haoenei takshadbü nam kho kuan aplaje, ngo Spain to haulamto ngei kan to haüyolabü.

²⁹Ngei ngeakei ngo ladang kan jungto loulaje kheijinei ngo Khristaeibü haülabüei manan loulabü.

³⁰Jaisinasi shuong, kanei ngo longyobü thunang hanei thuishi, hoba kü nyena Mühghaü to welaukushi dogo ngei Soushou jongsak sanou hoba seneibü Bunyubou Jisu Khrista nyena sudajada.

³¹Tokei ngo Jihudaa kibü maialembü shuongeibü ikmang ka khümentila hoba ngei Jerusalem pheian chühbü ho Mühghaü mütshuongei sungletenlabü che yingtishi dogo welaukushi.

³²Hibü, Mühghaüei maangangbü yingsije, ngo kan jungto olinangko lousühlabü hoba kan yoa haksolabü.

³³Sangmai kubou Mühghaü kan pendou yoa kishi. Amen.