Read Chang Naga ROM 16 Bible Online

ROM 16 - Chang Naga bible

ROM 16

¹Ngei kan jungto Kenkhra lashonga khangennyu seneibü nousina Foebe hautikuda.

²Sao kho Khristan yen che tegü hoba Mühghaü mütli che tegü mubü hangalama sungletashi hoba saoei kaneibü thuibü mangsühbü pendoua thuishi; sao kho, ngokei yoan müt juong shanga thuibü yaangbü che yingan kikei.

³Jisu Khrista khangenbü thangjama kü to liko khangenbü Priska si Aquila ham la ngeibü salem lenshi;

⁴haoenei ngeibü langkei shanga haoeneibü ngüm thokukei. Ngo ong ayingko Küksithang lashong dan pendouei haosi to olinda.

⁵Tokei chema kamshaibü lashong to kei ngeibü salem lenshi. Asiaa Khrista jungto maangpon sepeibü shaangbou Epaeneta to salem lenshi.

⁶Kan shanga haujembo kümbuleikunyu Mari to salem lenashi.

⁷Kü yoa shaangla thüngdanga kibü Jihudabü thangbou Andronika si Junia to salem lenshi. Haosi kho youko- ikjai shuong yoa nyenshen hoba kü to shaangbou Khristan yingkei.

⁸Bunyubou khangenbüa küthangbou Ampliata la ngeibü salem kushi.

⁹Khrista khangenbüa sen liko kümbouleibou Urbana, hoba ngeibü sanoubü thangbou Stakhi to salem lenshi.

¹⁰Apelle to salem lenshi, shieikoean natenbü Khristan kho hao ki! Aristobula chemdang to salem lenshi.

¹¹Küthangbou Jihudabü Herodion to salem lenshi. Khristan yeibü Narkissa chemdang to salem lenshi.

¹²Bunyubou seka haujembo khüpbou Trifaena si Trifasa la salem lentida. Bunyubou khangenbüa haujembo kümbou ngei sanoubü thangbou Persis la salem lenshi.

¹³Nyenshen Khristan Rufo si haonyu, ao künyulakei yeikei, haosi ham to salem lenshi.

¹⁴Asinkrita, Flegon, Herme, Patroba Herma hoba haoen yokabü likobü Khristan shuong pendou la salem ngetida.

¹⁵Filologa hoba Julea, Nerea si haona, hoba Olimpa hoba hao yoa kibü Mühghaü mütshuong pendou to salem ngetida.

¹⁶Cheei che to saopobü salem leyoshi. Khrista lashong dan pendouei kan la haoeneibü salem küntida.

¹⁷Jaisinasi shuong, kanei sungletbü lenbü to ajiko janyinbü longtibü, hoba müt hau thettibü khübü khüto maangsangko chühko kila shanga ngei kan to sudajada. Haoen apyoshi

¹⁸aishanga kheibü mütshuongei seneibü Bunyubou Khrista akhangenda, lausikei haoeneibü shiang shanga kümda. Haoenei müt la mailemtilabü songlen hoba ngüh teibüei müteibü shedbü akibü maangpon huonettida.

¹⁹Mütpem wekoei kanei Ngühlangmaibü to ngüha lebü shangabü dida. Ngo kan shanga aeibou olinda; lausikei ngei kaneibü maangpon kho amaibü to akheinepbo maibü la kuan aptimang sühda.

²⁰Hobaje sangmai kubou Mühghaüei Satan kho kaneibü you phanga nakeitilabü. Bunyuboueibü onou kan yoa kishi.

²¹Küsi liko kümbou Timoti, hoba kü mütli Lukia, Jason hoba Sosipaterei kan la salem lentida.

²²(Ngo, Tershiaei ho le doletkei; ngei kan jungto Khristan sanou salem küntida).

²³Kü yenbou hoba lashong pendoueibü yensühbou Gaiaei salem lentida. Sangnyu namthanbou Erasta hoba haona Quarta haosiei kan la salem küntida.

²⁴(Seneibü Bunyubou Jisu Khrista onou kan pendou yoa kishi. Amen).

²⁵Senei tou, Mühghaü, ao to ong songsido ki, hao la Jisu Khrista danko soneikangbü kukho. Mühghaüei kan anyaakeiko lotila thükakei. Ho ngei Jisu Khrista shanga phinthonko songlenbü