Read Chang Naga ROM 2 Bible Online

ROM 2 - Chang Naga bible

ROM 2

¹Hibü, küthangbou, ao ao yinga tegükei, no kho matjembü che tegü setalongaje nokei asatenkei. Müt ateibü matjemjinei nyi no lolo attida, aieilausi nyikei nyi shedbü kubü jeteibü kümsilei kho jungeida.

²Kanei lauda, “Mühghaüeibü matjembü kho khübü kümbü shuong thükto tükde lotda dogo künei ngeakei.”

³Küthangbou, nyi khübü jungeibü shuongeibü matjemda lausikei nyije khübü kho kümda; kanei kan Mühghaü matjemshang ka satenlep dogo damda lo?

⁴Ayingsi nyi haoeibü sanoubü, senetbü hoba natenbü nyaksinam to awe asüngda sai? Kaneije Mühghaü sanou kho kan maangpon sepeibü to leila shanga dogo adamenda lo?

⁵Lausikei kan tubüsekbü hoba maangpon sepeila adambü shuong yingkei. Mühghaüeibü ngühmaang matjemnyet tang khitla kibü Maangshat Chalou shanga kanei jembü lolo khauang maangshat thanshaida.

⁶Khünyet haoei mütpem wekoeibü kümsilei kho luluei kümbü hangsilam ka jemlabü:

⁷hangsilam maibüa kümenleienla haujembü hoba soneikangbü, soumo hoba ühaibü lambü shuong la haoei athonbü langkei kulabü;

⁸aoyou jembü ong maikubü, saopobü to ngüha aleko asaopobüei lenbü ditbü shuong ki, haoen jungto khauang maangshat loulabü.

⁹Amaibü kümbü müteibü jongsakje sekbü hoba khonku khonsak kilabü; kho Jihudabü shaang hoba tokei Grikbükei;

¹⁰lausikei maibü kümbü müt shangaje jongsak kho soneikangbü, soumo hoba sangmai kilabü. Kho Jihudabü ka shaang khanglabü, lausikei tokei Grikbükei.

¹¹Mühghaü thedangaje maangshik thechüh ai aki.

¹²Aoyouei Ngühkhüm aikei angeko shabü shonkei, haoenei Ngühkhüm ai angesidogokei, haoen maulabü; aoyouei ngühkhüm shenshen ngenge shabü shonkei haoeneibü ngüh Ngühkhümei panlabü.

¹³Müt cheei Ngühkhüm kho dit ong ditbü shangaje, Mühghaü thedanga haomat amaitida; müt cheei ngühkhümei ai mangsühda kho jungeisi ong, haoei Mühghaü thedanga janbü haplabü.

¹⁴Ladang kükeithangei Ngühkhümje akiko hao haangei ngühkhümei mangsühbü kho jungeida, haoenei Ngühkhüm akisi dogokei haoen kho haoeneibü ngühkhüm ki.

¹⁵Haoenei haoeneibü maangpona doan kibü Ngühkhüm kho, haoeneibü ditenbü danko lenenda;

¹⁶Mühghaüei, Jisu Khrista danko, müteibü huphang kümsilei pendou matjemnyet, ngeibü ngühlang maibüei lenbü tegü, haoei haoeneibü dambü maangkaboutham la, jijidang to chühan, shedbü kulabü ayingsi amai apbulabü.

¹⁷Nyi no tetlabü leshi. No Jihudabü hoba kho shanga yonglamda; no Ngühkhüma youphen younak lamakei; nyi no Mühghaüeibü müt dogo lauenda.

¹⁸Aieilausi no Ngühkhüm phanga weenbüei nyi haoei maangangbü ngeakei hoba tangbü si shedbü ainei lulu ki kho lenenda.

¹⁹Nyi no lolo nyekthubü shanga lamleibou, nakthühbüa kibü shanga ngesakbü,

²⁰amin angebü shuong la songlenbou hoba nashou hanbü shuong shanga lenbou dogo damda. No Ngühkhüma tükdebü hapbüngebü mang ki.

²¹Khei yingsije nyi lubü la lenda; nyi no lolo lenngaidalao? Kokla haubü khulimbo nyi songlenda; nyi kokdalao?

²²Nyi asangalanbü thangetda; nyi asangalanbü shondalao? Nyi heangsho kho mangsenlabü tegü damda; nyi Lembüchem shatidalao?

²³Nyi Ngühkhüma yonglamda; nyi Ngühkhüm lulimbü danko Mühghaü shatidalao?

²⁴Laishibaei lenda, “Küksithang yoa Mühghaü nyen kho shatida, hoba kho kaneibü on.”

²⁵Nyi Ngühkhüm jungeisije nyi kipbü kho lejim ki, lausikei nyi Ngühkhüm lulimalonga kipbü kho akipbü jam yeilabü.

²⁶Akipbü Küksithang cheei Ngühkhümei mangsühbü jungeisije, maimaitham, haoje akipasikei kipbü hima welabü.

²⁷Nyi Ngühkhüm leilusije, kaibü dobü ngühkhüm si kipbü ham apyoan, khüpeinyu haoei ong Ngühkhüm tükde jungeisije, kho tegübü akipbü müt che khoei kamat jemlabü.

²⁸Aishanga tanga chühlabü khoei tükdebü Jihudabü la ayeida, hoba kipbü kho tanga phe chühlabü che aying.

²⁹Aishanga tükdebü maangkabou tham khoei ong Jihudabü tükde yeitida; hao kipbü kho maangpon maangkabü thu, kho dobü ngühkhümei aying lausikei Soushouei. Hao sungletbü kho mütei aying, lausikei Mühghaüei.