Read Chang Naga ROM 3 Bible Online

ROM 3 - Chang Naga bible

ROM 3

¹Hibü Jihudabü shanga ai aei dühlabü ki? Kipbü danko maibü ai ki?

²Hangsilam pendoua khei ong, shaangbou Jihudabü kho Mühghaü ngühlang ik jaitikei.

³Khei yingsije, at maangalanbü yingasikei khoei Mühghaükei maangalanko yeitilep lo?

⁴Ladangkei aying! Müt pendou yepeija- webü yingasikei Mühghaüje ngühmai dogo lenenjan. Laiei lenbü tegü: “Nyi ladang ngüh laulaje no janbü dogo aukabü kuenjan hoba ladang kamat jemlaje kho thükjan.”

⁵Lausikei seneibü asaopobüei Mühghaü ngühmai aukabü kula khangensije, senei ai ong laula? Mühghaüei haoeibü maangshat ho kaodaka jungeialonga Mühghaü khoje maang alan dogo senei laulep sai? (Ngei ho müt aedang ka lauda.)

⁶Ladangkei aying! Khei yingsije Mühghaü kho lai küman kaodaka matjembou yingla?

⁷Ngeibü amlangbüei Mühghaü ngühmai aei takshatbou khangenalonga, hoba hao la soneikangbü aei sungbaalonga, ngo aila toukei shabü müt che tegü yuktida?

⁸“Maibü nalongla senei amaibü akümlep si?” dogo laubü ngüh kho künei laukei dogo müt ateije nyikuko laukuda; haoen la kujana shedbü kua.

⁹Khei yingsije, sen Jihudabü müto aeije thükkabou sai? Ladangkei aying, aieilausi künei Jihudabü si küksithang jeteibü shabü hau phanga kibü shanga lenda.

¹⁰Laishibaei lenbü tegü: “Saopobü müt aokei aki, che ongkei aki;

¹¹ditenbü ao aki, Mühghaü lambü ao ayokei.

¹²Pendou ayinglam to satkei, pendou liko amlangbü la yeia; sanou jungeibü aokei aki. che ongkei aki.

¹³Haoeneibü sanglou kho heekhün tegü asaopobü, haoenei haoeneibü lishangei huonetyouettida. Pinyu la tegü haoeneibü sembung khopa lüh kia.

¹⁴Haoeneibü sembung kho khüksiuok hoba khauekbüei shenakei.

¹⁵Sii angtila haoen aeibou you sokei,

¹⁶haoenei haoen paishang pendoua lusakbü hoba khonkuei shentida.

¹⁷Haoenei sangmai lamnyu angeenkei.

¹⁸Haoen thea Mühghaü la soumo kubü aki.”

¹⁹Thepetbü ngühkhüma kakbü pendou kho ho phangto lotbü shuong shanga ki dogo senei ngeakei; apyola athükbü kho ho ki, khei aokei satenla athük hoba kaodak pendou kho Mühghaü matjembü phanga kilabü.

²⁰Ho shanga aukabü ngüh kho ho ki aokei ngühkhüm jungeibü shanga Mühghaü thedanga mat amailabü. Ngühkhüm danko mütei shabü kho shangshenda.

²¹Lausikei tou tükdebüei Mühghaüei müt hao thedanga mat maitibü kho tang khida hoba ho ngühkhüm to aphenyokei. Ngühkhüm si thuseibü danko ho shanga aukabü künkei, lausikei

²²ho Mühghaüei khunakshousi pendou Jisu Khrista danko mailemei hao thedanga mat maitikei hoba ho janyinbü akiko mailembü pendou shanga ki.

²³Pendouei shabü shona hoba Mühghaü soneikangbü kho asühlang.

²⁴Haoen Jisu Khristaeibü angthetbü kümsilei danko onoubüei haoen thedanga thamtham mat maitikei.

²⁵Hao haibü danko, hao to mailem kibü shuongeibü shabü apentikula shanga, Mühghaüei hao lemla kukei. Aieilausi haoei natenbüa, haoei danbü meten kabü shabü aphaneiko, haoeibü ngühmaanglanbü lenla shanga lemlabü kho kümsilei yingan kiteikei.

²⁶Hobaje danbü thuakei haoeibü ngühmaanglanbü lenla shanga, hoba hao kho ngühmai hoba Jisu to mailembü shuong, haoei hao thedanga mat maitida dogo lenla shanga janbü yingan kiteikei.

²⁷Yaangenlabü kümsilei ai ki? Ho aweeida. Ai younaka? Ho mütei kümbüleibüa thonkei sai? Aying, mailema ong phenakei.

²⁸Mailem danko ong müt kho Mühghaü thedanga mat maitida dogo senei thonshang to louda. Ho “kümsilei” ngühkhümei aying.

²⁹Mühghaü kho Jihudabüeibü ong si? Hao Küksithangeibü kei aying lo? Haü, maimaitham,

³⁰aieilausi Mühghaü kho che ong. Jihudabüei kipbü khokei mailemei; jeteibü mailem khoei ong Küksithangei akip, hoba Mühghaüei ham kho hao thedanga janbü haptilabü.

³¹Khülonga senei haüko mailembüei ngühkhüm khoje leiluda sai? Khei aying! Ngühkhüm kho senei hatlepda.