Read Chang Naga ROM 4 Bible Online

ROM 4 - Chang Naga bible

ROM 4

¹Khülonga seneibü pisibou Abra- hamei haoei lolo ong hapenkei dogo laulasi ai?

²Aishanga Abrahamei haoeibü hauei ong hao Mühghaü thedanga janbü hapbei longaje hao yonglamlabü ki. Lausikei Mühghaü thedanga aying;

³aishanga Laishibaei ai lauda? “Abrahamei Mühghaü to haoeibü mailem phokei hoba kho danko hao Mühghaü thedanga saopobü dogo weeikei.”

⁴Müt cheei haoeibü mu kho maangshikbü che tegü aying lausikei hao la thebü che tegü noda.

⁵Lausikei, haoeibü hau to nongan kikhoulabü jeila, müt cheei Mühghaü, aoei hao angeko kibü shuong hao thedanga mat maitida, hao to ong mailemsije, Mühghaüei hao kho haoeibü mailem thüngei sungletda.

⁶Kho tegü haoei kümenbüei ayingko Mühghaüei sungletbü müt cheeibü olinbü shanga Dawidei hai lauda:

⁷“O, shedtibü shanga Mühghaüei amai apbubü hoba shabü apbubü danshuong latetche olinlabü!

⁸O, aoeibü shabü Bunyubouei nomaukua, hao lai olinlabü!”

⁹Haülabü kho kipbü shuong shanga ong si akipbükei yoan? Aieilausi senei laubü kho, “Mühg- haüei Abraham haoeibü mailemei sungletkei.”

¹⁰Kho haüthükjinei hao ai thua kiteikei? Kipan si akipbo? Kipan aying lausikei akipbo.

¹¹Kipbü tetsida khoje phaito ong, hoba kipbü kho hao akipjinei thama kibü mailem, Mühghaüei hao sungletbü shangjinbü tang khitbü ong ki. Kho tegü hao kho, aoyou akipsi dogokei mailem ki hoba aoyou Mühghaüei sungleda khübüeibü bou la yeikei,

¹²hoba tokei aoyou kip ong kipbei ayingko seneibü bou Abrahamei akipjineithama kibü mailem youyaü phai semda khübü kipbü shuongeibü bou la yeikei.

¹³Abraham to ayingsi haoeibü thensilen to haoei kaodak phet phanlabü dogo thekubü kho si ngühkhüm aineikei aphenyokei; Mühghaüei sungletbü khoje mailema ong nongan ki.

¹⁴Ngühkhümei ong langda hoba khübüei ong kaodakkei pailetda lausije, mailem kho kongbü hoba theletbü kho amlangbü,

¹⁵aieilausi ngühkhümei khauang longtida; lausikei lan ngühkhüm aki khünei shedtibü alongda.

¹⁶Hibü touje Mühghaü onoubü to ong sou nonglabü lele ajanjan pendou mailem ka ong pakakei; aieilausi ho Abrahameibü shisishousi pendou la, theletbü kho Ngühkhüm phanga kibü shuong ong aying lausikei Abraham mailema paibü shuong lakei shangashattila shanga ki. Aishanga hao sen pendoueibü bou ki.

¹⁷Laishibaei lenda, “Ngei no phangshuong juongeibü bou la yeitia.” Thekubü kho haoei haoeibü maanglem phobü Mühghaü, aoei haibü langngaitida hoba mo abukko kisikei lang kibü tegü meten pendou jungto ngabü ngühlang hautida, kho Mühghaü thedanga sungletkei.

¹⁸Kho tegü haoeibü mailem khoei damlabü akibü thu cheneikei maanglemkei. Khoei ong hao phang juongeibü bou la yeikei. Mühghaüei laukei, “Kaibü thensilen kho juongnyu kilabü,”

¹⁹hao kheijinei po saongao thüng onan kisikei, mailema hau athet hoba haoeibü mang kho haibü him, hoba Saraeibü nasetshangkei haibü dogo ngean kikei.

²⁰Hao ladangkei aphenyem ayingsi Mühghaüei thekubüa hau athet. Haoei Mühghaü sangkei;

²¹Mühghaüei haoei theletbü haüthüktilabü haang dogo haoei maisho maangleman kikei, hoba kho mailemei haoeibü nyishoubü haukei longeikei.

²²khoei “Mühghaüei hao sungletkei.”

²³“Mühghaüei hao saopobü che tegü sungletkei” dogo laubü ngüh kho hao shanga ong ado

²⁴lausikei sen shangabükei yingkei; sen aoyouei haoei seneibü Jisu haibü ka langngaitikei dogo mailemda,

²⁵aoei Jisu senei shedtiyatibü shanga haibü la khümbo kukei hoba Mühghaü thedanga sen mat maitila shanga langkeitikei dogo mailemlaje, khübü khokei pendou sungletlabü.