Read Chang Naga ROM 6 Bible Online

ROM 6 - Chang Naga bible

ROM 6

¹Senei lai laula? Onoubü aei haatila shanga shabüa hangnyu thünglep sai?

²Khei aying! Sen shabüa haibü shuong athakko khün ongje lai kila?

³Sen Khrista yoa baptibü danko hao to thangjambü shuong kho hao haibüakei thangjamei dogo kanei angekei lo?

⁴Hobaje hao haibüa sen baptibü danko hao yoa khünbü tegü hao Bouei soneikangbü kümsilei danko hao haibü ka langngaitibü tetlabü kho sen shanga langkei lamnyu haanbü che ki.

⁵Aishanga sen hao haibü tegübüa hao to shangshenkei longaje, sen tokei hao tegü langngaibüa hao yoa shangshenlabü.

⁶Hao senei ngekei, seneibü shabü mang ho leilulabü hoba touje shabü aaola lalok ayeila shanga seneibü shaangbou mang kho hao yoa peiseia thüngkei;

⁷aishanga ao Khrista yoa haia haoei shabü to jongailabü ai aki.

⁸Touje senei mailemda sen Khrista yoa haikei longa sen tokei hao yoa lang kilabü,

⁹hoba senei ngekei Khrista haibü ka laksepa hoba touje ladangkei nyibouje ühailabü. Touje haibüei hao thüka song atakda.

¹⁰Aishanga hao haibü kho, pendou shanga che ong shabü la haikukei, hoba hao tou kibü langkei kho, Mühghaü to lang kida.

¹¹Hibü kho, kanei lolo kan shabü la haikukei hoba Jisu Khristaa Mühghaü to lang kida dogo kanei damlabü ki.

¹²Hibü shabüei touje kaneibü hailabü manga song atakjan hoba hoei dühbü la kanei kaukhok akujan.

¹³Kanei touje kaneibü mangsisau ka phejan che ongkei shabü peisilei che tegü teku; lausikei, kan kho haibü ka langkeibü mütshuong tegü kaneibü mang pendou kho maibü shanga khümbo kushi;

¹⁴aieilausi shabü kho kan thüka bunyu aying; kan ngühkhüm phanga aying; lausikei Mühghaü onou phanga ki.

¹⁵Khülonga ai? Sen ngühkhüm phanga aying lausikei onoubü phanga ki bü dogo senei shabü shonlep sai? Khei aying!

¹⁶Kanei ho maisho ngeakei, kanei kan lolo müt ateibü aaola yeisije, kan kho kanei khangenbü müteibü aao. Shabü kho kaneibü bunyubou yingsije loushedbü kho haibü kilabü; Mühghaü to ngüha lesije loushedbü kho kan hao junga mat maibü kho kilabü.

¹⁷Kan che shabüeibü aao kibü shuongei maangpon pendouei kanei sungletbüei lenbü aenei ngüha lebü shanga Mühghaü nyen sangashi;

¹⁸hoba ladang kan shabü ka satentikei kan maibüeibü aaola yeikei.

¹⁹(Ngei müteibü hangsilam ka lauda aieilausi ngei kan to hau akibü hangsilam ngeakei.) Aishanga kanei kan lolo phe asaopobü hoba ngühkhüm lulimbü, hoba ngühkhüma akakbü ong jungeibü khübü la lai khümbo kukei, kho tegü saopobüa chingla shanga kan lolo maibü la aao tegü khümbo kuashi.

²⁰Kan ladang shabü aao shuong kikei, kheijinei kanei sao- pobü shanga laueila ngüh akitei.

²¹Khülonga, kan laobou hangshong tou himou bauda kho to liman kanei kho jihsiphaia ai pailetkei? Aieilausi haoen haibüa thonkei.

²²Lausikei kan maimaitham shabü ka solo haptia hoba Mühghaü aao shuong la yeia, hoba kaneibü jongsak saopobüa chingko ponpen langkei haplabü kho ki.

²³Shabüei mu che kuda hoba kho haibü; lausikei Mühghaüei kulabü jongsak che kia hoba khoje seneibü Bunyubou, Khrista Jisua thon akibü langkei ki.